Isayas.
59.
Pammineg kew! Kene ne malepet ka belad te Magbebaye ne Manama ne kene egpakaluwas kaniyu, wey kene ne tuliyen sikandin ne kene egpakarineg te pegpangananey niyu. 
Ka me sale niyu ka egpuunan ne nakapariyu kew te Manama, ne egpekeiling e te miggeles sikandin kaniyu. Purisu kene din egpamminehen ka me peg-ampu niyu. 
Mangngimatey kew, me ubaten, wey maddeet ne egmanlelalag. 
Ware kew migsuman-suman te eleg ne peggukum wey egpamayung kew re due te duma niyu. Egpalintutuu kew te ubat wey egmanguubat kew. Migplanu kew te mareet wey eggimuwen niyu iya seini. 
Ipakapeiling kew te me atelug te dulepu su egpakarereet ma ka me hinimuwan niyu iling te eggilu. Ka minsan hentew ne eg-abeleng te atelug te dulepu, egpatey iya wey ke egkapese ka atelug, duen e man‑e lein ne uled ne eglihawang. Igpakapeiling kew man‑e te me kalawe-lawe ne egbebaley te egkabugtus ke egsamsamen de. 
Ne iling te baley te kalawe-lawe ne kene egkeyimu ne manggad, ware degma egkeyimu niyu ne egpakabunbun te maddeet ne hinimuwan niyu. Maddeet ka hinimuwan niyu, wey me mabbulut kew. 
Maahet kew ne eggimu te mareet, wey mahaan eggimatey. Mareet ka egsumsumanen niyu wey eggimu kew te karereetan minsan hendei kew egbaye. 
Ware niyu nanengnengi ke hendei egkakita ka keupianan wey ware katareng te langun ne inggimu niyu. Nawingi ka dalan ne in-ikul niyu, wey ka minsan hentew ne eg-ikul kayi, kene degma egpakaneem-neem te keupianan. 
Ne migkahi ka keet-etawan, “Nakataha kid kuntee ke mania te ware ki luwasa te Manama puun te seeye se migdeeg-deeg kanta. Migpallateng ki te malayag piru marusilem ka migginguma, sikan naa ka delem ka miggipanawan ta, 
wey nekeiling kid e te eggipanew ne butud ne egpakapanamsam naan de te alabat. Ne egpakarugsu ki minsan meudtu iling te miggipanew ki te marusilem. Minsan manekal ka me lawa ta, piru ware egkeyimu ta iling te me minatey. 
Iyan tad e ugpe se egsinehew ne egpekeiling kid e te usu ne egginihel wey ke selepati naa ne egkahi iling te eglungku. Migtetahad ki te eleg ne peggukum piru ware migginguma. Migpamitew ki te kaluwasan piru mariyu amana seini. 
Masulug e amana ka sale ta diye te Manama, wey seini ka miggukum kanta. Nabatasan tad e ka eggimu te seyyup wey kene ki egpekeeles ne nakanengneng ki iya kayi. 
Migribildi ki wey mig-apul ki te Magbebaye wey ware ki mig-ikul kandin. Inlupihan ta ka duma, wey migpariyu ki te Manama. Ka makasesale ne pusung ta ka egpuunan te me suman-suman ta wey me lalag ne egpakalimbung. 
Insamsamilian ta ka eleg ne peggukum wey migpariyu ki te katareng. Warad e egkakita ne kamalehetan minsan hendei, wey warad e katareng. 
Warad e egkasalihan, wey sapul due egsupak te mareet, sikandin de iya man‑e ka eggimuwan te mareet.” Ne miglungku ka Manama te nakita rin ne warad eleg ne peggukum. 
Neinu-inu sikandin te nakita rin ne ware migbulig te seeye se indeeg-deeg, purisu inggamit din ka geem din eyew te pegbulig kandan. Egbulihan din sikandan tenged su matareng sikandin. 
Insaluub din ka katareng isip dingding te kumeng, wey ingkekalu din ka kaluwasan isip putew ne hilmit. Ne insaluub din ka pegsuli wey ka langet isip kumbale. 
Egsulian din ka me kuntere din sumale te hinimuwan dan. Igkabelu din iya ka me kuntere din. Egsulian din degma minsan ka diye te me ilis te dahat. 
Ne igkaaldek sikandin wey ka katelesan din diye te iglineb wey diye te igsile. Egginguma sikandin iling te migduu ne weyig ne inggiyup te kalamag te Magbebaye. 
Ne migkahiyan te Magbebaye ka keet-etawan din, “Sikaniyu se kabuhalan ni Hakub, egginguma te Hirusalim ka Manluluwas niyu, wey egluwasen din ka mig-inniyug te me sale dan. 
“Seini ka kasabutan ku kaniyu: Kene iya egkaawe ka Panisingan ku ne due te kaniyu wey ka me lalag ne impalalag ku kaniyu. Ne kene egkaawe ka sika ne lalag diye te me anak niyu wey diye te me kabuhalan dan puun kuntee taman te ware egtamanan.”