Isayas.
64.
Magbebaye ne Manama, lukati nu ka langit wey pamaneug ka eyew egkawelwel ka me bubungan te peglepew nu. 
Hendini ka ne egpekeiling te hapuy ne egpakasilab te naggangu ne me kayu ne egpakapakale-kale te weyig eyew egpekeile e keykew ka me nasud ne kuntere nu wey egpangelkelen. 
Te timpu ne miggimu ka te kein-inuwan ne ware ney im-imana, migpamaneug ka wey nawelwel ka me bubungan tenged te kaaldek. 
Puun pad dengan, ware de due nakarineg wey ke nakakita naa te duma ne Manama ne iling keykew, su sikeykew re ka Manama ne egbulig te seeye se migsalig keykew. 
Egdawaten nu seeye se egkahale ne eggimu te matareng, wey ka eg-ikul te me pamaahi nu. Piru nabelu ka kanami tenged su migpabulus key ma ka migsupak te me pamaahi nu. Egkaayun naan pad ne egkaluwas key? 
Nekeiling key langun te etew ne malindit wey nekeiling ka me meupiya ne hinimuwan ney te malindit ne kumbale. Nekeiling key te dewun ne egkalanes, wey nekeiling te kalamag ka mareet ne hinimuwan ney ne nakapalayap kanami. 
Warad iya minsan sabeka kanami ne migparani wey migpakannekal ne miggen-gen keykew. Sika ka egpuunan ne mig-inniyuhan key nikeykew wey imbalahad ne egkengabaku tenged te me sale ney. 
Piru he Magbebaye, sikeykew red ka amey ney. Sikeykew ka talaggimu te kuren, wey sikanami ka tane. Sikeykew ka miggimu kanami. 
Magbebaye, kene nu re ubag pasubleyi ka langet nu kanami, wey lingawi nud e ka me sale ney; pitawa key wey sumsumana nu ne keet-etawan key pad iya nikeykew. 
Ka matulus ne me siyudad nu lagkes ka Hirusalim nekeiling e te disirtu. 
Nasilaban ka matulus wey meupiya ne timplu ney—ka timplu ne insimbaan keykew te me kaap-apuan ney. Nenareetan ka langun ne kasangkapan ne ingkeeyami ney. 
Ne kene key naan pad iya man e egbulihan nikeykew, Magbebaye ne Manama? Egpeeneng-eneng ke bes naan de iya wey egdusaan key nikeykew te mangune-kune?