Hirimiyas.
1.
Nasulat te seini ne libru ka meyitenged te me lalag ni Hirimiyas ne anak ni Hilkiyas. Si Hilkiyas, sabeka te me talagpanubad diye te lungsud te Anatut ne diye te inged ni Binhamin. 
Te igkasapulu wey tatelu (13) ne leg‑un te peghari ni Husiyas ne anak ni Amun diye te Huda, migpakiglalag ki Hirimiyas ka Magbebaye ne Manama. 
Ne migpabulus migpakiglalag ka Magbebaye ki Hirimiyas te si Huwakim e ne anak ni Husiyas ka Hari te Huda. Ne kamasulug pad man‑e migpakiglalag ka Magbebaye kandin taman te igkasapulu e wey sabeka (11) ne leg‑un te peghari ni Sidikiyas ne anak ni Husiyas. Te igkalimme e ne bulan te seeye ne leg‑un, impandakep e ka keet-etawan te Hirusalim. 
Ne impanengneng a te Magbebaye, 
“Neilaan kud e sikeykew te ware ku pad sikeykew himuwa diye te aanakan te iney nu, wey te ware ke pad neetew, in-alam kud e sikeykew; inteil kud e sikeykew ne prupita te me nasud.” 
Ne migtabak a kandin, “He Magbebaye ne Manama, kena a ne meupiya ne eglalag-lalag su bate e pad.” 
Piru ingkahiyan a nikandin, “Kene ka kahi te bate ke pad, keilangan ne eggendiyaan nu ka me etew ne egpeendiyaan ku keykew, wey ilalag nu kandan ka minsan nekey ne igpalalag ku keykew. 
Kene ka kaaldek kandan su egdumaan ku sikeykew, wey egbulihan ku sikeykew. Sikeddiey se Magbebaye ne Manama ka miglalag kayi.” 
Ne insamsam te Magbebaye ka be‑be ku, wey ingkahiyan a nikandin, “Intahu kud due te be‑be nu ka igpalalag ku keykew. 
Ne kuntee ne aldew, in-alam ku sikeykew ne eglalag diye te me nasud, wey diye te me migharian. Lalahi nu sikandan te ka duma kandan egbaruten, wey egguhusen, ne eglig‑enen wey igpasasindeg e man‑e.” 
Ne mig-insaan a te Magbebaye, “Nekey‑a ka nakita nu Hirimiyas?” Ne migtabak a kandin, “Sugpang te kayu ne almindras.” 
Ne ingkahiyan a nikandin, “Malehet ka nakita nu, wey migpasabut sika ne imbantayan ku ne egkatuman iya ka inlalag ku.” 
Ne mig-insaan ad e man‑e te Magbebaye, “Nekey pad man‑e ka nakita nu?” Ne migtabak a, “Weyig ne egkale-kale diye te kendiru ne diye te igkahibang ne balabahan, wey iling te egkeitis e seini kayi te kanta.” 
Ne ingkahiyan a te Magbebaye, “Due mangune-kune ne karereetan ne egginguma te langun ne mahinged te seini ne inged puun te igkahibang ne balabahan. 
Pammineg ka! Igpeuyan ku ka me sundalu puun te me migharian ne diye te igkahibang ne balabahan, eyew eglusud te Hirusalim. Ne igtahu te me Hari dan ka me trunu ran diye te me gumawan te Hirusalim. Egguhusen dan ka me matikang wey makepal ne batu ne alad te Hirusalim, lagkes ka duma ne me lungsud te Huda. 
Egparusaan ku ka keet-etawan ku tenged te sale dan. Mig-inniyuhan a nikandan wey migtutung e sikandan te insinsu diye te me diyus-diyus, wey iyan dan e insimba ka me larawan ne inggimu ran. 
Ne kuntee, pangandam kad. Hipanew kad, wey pangguhuri nud sikandan te langun ne igkahi ku keykew. Kene ka kaaldek kandan, su emun ke egkaaldek ka, nasi kud egginaaldeka sikeykew diye te tangkaan dan. 
Pammineg ka! Kuntee ne aldew, eggimuwen ku sikeykew ne iling te malig‑en ne siyudad ne in-alad te matikang wey makepal ne batu wey ke putew naa ne sungkaleg wey ke burunsi naa ne alad. Ne ware me Hari, me upisyal, me talagpanubad, wey me mahinged te Huda ne egpakatalu keykew. 
Egpakigkuntere sikandan keykew, piru, kene ka nikandan egkatalu, tenged su egdumaan ku sikeykew wey egbulihan. Sikeddiey se Magbebaye ne Manama ka miglalag kayi.”