Hirimiyas.
2.
Ne impanengneng a te Magbebaye ne Manama, 
“Hipanew ka wey ilalag nu seini diye te me matig-Hirusalim: ‘Ware ku nalingawi ka pegkamatinumanen niyu te me bate-bate kew pad, wey ka peggeyinawa niyu dengan keddiey iling te mengebay ne sikan pad nakaasawa. In-ikul a nikaniyu minsan diye te disirtu, diye te inged ne ware me pinamula. 
Inteil ku sikaniyu se me Israilita para keddiey. Egpekeiling kew te an-anayan ne baad te inggaani ne inhalad kayi te keddiey. Eglegparan ku ka egdereet kaniyu, wey egpeuyanan ku sikandan te mangune-kune ne karereetan.’ Sikeddiey se Magbebaye ne Manama ka miglalag kayi.” 
Sikaniyu se keet-etawan te Israil ne kabuhalan ni Hakub, pammineha niyu ka inlalag te Magbebaye. 
Seini ka inlalag din: “Nekey‑a ka sale ku ne nakita te me kaap-apuan niyu ne iyan egpuunan ne mig-inniyuhan a nikandan? Mig-ikul sikandan te ware karuan ne me diyus-diyus, wey tenged due, neyimu degma sikandan ne ware karuan. 
Warad sikandan migsuman-suman keddiey minsan sikeddiey ka migpalihawang kandan puun te Ihiptu, wey ka mig-inahak kandan diye te disirtu ne ware me pinamula, wey diye te inged ne ware mig-ugpe ne due me bitu, wey diye te inged ne mammara, marusilem, ware egbaye wey ware eg-ugpe. 
Induma ku sikandan diye te meupiya ne tane eyew egpakasawit sikandan te meupiya ne eg-uma diye. Piru pegginguma ran diye, nasi dan de iya dereeti ka tane ne imbehey ku kandan tenged te malindit ne me himu ran. 
Ne ka me talagpanubad, warad migpamitew keddiey. Warad nekeila keddiey ka me talagpanulu te balaud, wey migsupak e keddiey ka me igbuyag. Ne migpangguhud ka me prupita pinaahi te ngaran ni Baal, wey migsimba sikandan te ware karuan ne me diyus-diyus.” 
“Purisu egkasuwan ku ka keet-etawan ku, wey ka egsinundul pad ne me kabuhalan dan. Sikeddiey se Magbebaye ne Manama ka miglalag kayi. 
Hendiye kew te pulu te Siprus ne dapit te iglineb, wey hendiye kew degma te inged te Kidar ne dapit te igsile. Ne tengtengi niyu ke due iling kayi ne neyitabu. 
Duen naa nasud ne migliwan te diyus-diyus dan, minsan kene seini ne malehet? Piru sikeddiey se Manama ne migbehey te kabantug te keet-etawan ku, nasi ad e liwani nikandan te me diyus-diyus ne ware igkabulig kandan. 
Ne natanengan ka me langit te sika ne himu ran, wey iling te nangelkel tenged te mangune-kune ne liyas. Sikeddiey se Magbebaye ne Manama ka miglalag kayi. 
Nekeyimu te daruwa ne sale ka keet-etawan ku: mig-engked sikandan keddiey—ka sebseb ne egpakabehey te umul, wey nasi sikandan migkekali te belun ne migbekabeka ne kene egkatahuan te weyig.” 
“Ware neetew eyew egkeuripen ka me Israilita. Ne mania te in-uripen e sikandan te me kuntere dan? 
Egpekeiling te liyun ne migginihel kandan ka me kuntere dan. Ne indereetan dan ka tane dan, wey impangguhus ka me siyudad dan, wey warad minsan sabeka ne mig-ugpe kayi. 
Ne impese degma te me matig-Mimpis wey me matig-Tapinis ka me ulu ran. 
Sikaniyu red iya me Israilita ka egpuunan ne nareetan kew su in-engkeran e ma nikaniyu se Magbebaye ne Manama niyu te timpu ne in-inahak ku sikaniyu te peggipanew niyu. 
Ne kuntee, nekey naa ka naangey niyu te peg-aput niyu diye te Ihiptu wey diye te Asirya? Sikan naa se peg-inum te Weyig ne Nilu, wey te Weyig ne Iyupratis? 
Ne iyan ded eglegpad kaniyu ka maddeet ne me hinimuwan niyu; iyan ded egdew‑ey kaniyu ka peg-inniyug niyu keddiey. Ay-ayari niyu sumsumana ke mamenu kareet wey kalised te mig-inniyug kew keddiey te Magbebaye ne Manama niyu, wey te ware kew migtahud keddiey. Sikeddiey ka Amana ne Maresen ne Magbebaye ka miglalag kayi.” 
Ne migkahi ka Magbebaye, “Naluhey e ne insamsamilian niyu ka katenged ku. Ne ware kew e mig-ikul wey migsimba keddiey. Nasi kew e migsimba te me diyus-diyus diye te me bubungan ne panubaran, wey diye te diralem te mallapung ne kayu. Ne egpekeiling kew e te malitan ne egpamelegye te lawa. 
Egpekeiling kew te tetelesi ne paras ne impamula ku. Piru mania te nekeiling kew e kuntee te leew ne paras ne migbebehas te migkepis wey ware karuan? 
Minsan ke eg-ayad-ayad kew pad egpamanihus wey egpanebbun, egkakita ku red iya ka kalindit te sale niyu. Sikeddiey se Magbebaye ne Manama ka miglalag kayi. 
Ne mania te egkahi kew te ware kew nalinditi, wey ware kew migsimba ki Baal? Tengtengi niyu ka peggimu niyu te sale diye te napu te Hinum, sumsumana niyu ka sale ne neyimu niyu. Egpekeiling kew e te beyan ne kamil ne egpallebag ne kenad egkapahen ka eglunglungkesu. 
Ne egpekeiling kew man‑e te beyan ne asnu ne nalayam diye te disirtu. Malised ne egpahutan ke egpallebag, wey kenad keilangan ne egpamitawen pad sikandin te lukesan ne asnu, wey malemu re sikandin ne egpamitawen te timpu te pegpaaharey. 
Me Israilita, neehas e ka me sandal niyu, wey nammaraan kew e ka egsinsinundul te me diyus-diyus. Piru migkahi kew, ‘Kene egkaayun ne eg-inniyug key te me diyus-diyus su inggeyinawaan ney sikandan, wey eg-ikul key iya kandan.’” 
Ne migkahi ka Magbebaye, “Iling te takawen ne egkeyilawan ke egkasapenan, egkeyilawan kew degma se keet-etawan te Israil lagkes ka me Hari wey me upisyal niyu, wey ka me talagpanubad wey me prupita niyu. 
Egkeyilawan kew ka langun ne egkahi, ‘Iyan ney amey ka kayu, wey iyan ney iney ka batu.’ Mig-inniyug kew keddiey, piru egpangananey kew red keddi ke egkaliseran kew. 
“Piru hendeid naan e ka me diyus-diyus ne impangimu niyu? Diye kew pabulig kandan ke egkaliseran kew wey egpitawen ta ke egpakabulig naa sikandan kaniyu. Masulug amana ka me diyus-diyus niyu iling kasulug te me lungsud te Huda. 
Ware katenged niyu te egsagsahukul keddiey tenged su sikaniyu man ded iya ka migsupak keddiey. 
Ware imbaluyan te peglegpad ku te me anak niyu su kene ma sikandan egpepanulu. Egpekeiling kew te mabulut ne liyun, impangimatayan niyu ka me prupita niyu. 
Pammineg kew te eglalahen ku, he keet-etawan te Israil. Wara a nekeiling te disirtu diye te kaniyu wey ke inged naa ne durusilemi. Purisu mania te migkahi kew te egkaayun kew e ne eggimu te minsan nekey ne igkeupii niyu, wey kene kew e egparani keddiey? 
Kene iya egkalingawan te mengebay ka igdayan-dayan te lawa rin, wey te egkasalen ne malitan ka igsaluub din te kasal. Piru naluhey e re mule lingawi te keet-etawan ku. 
Egkateu kew en iya ne egpamitew te inggeyinawaan niyu. Ne minsan ka me malitan ne egmamelegye te lawa, impanulu niyu te me paahi niyu. 
Napulitan e ka me kumbale niyu te langesa te me etew ne ware sale wey egkengaayu-ayu. Impangimatayan niyu sikandan minsan ware niyu sikandan nasapeni ne migseled te baley niyu ka egpanakew. Piru minsan pad due, 
egkahi kew pad man‑e, ‘Ware sale ney, purisu kene egkabelu ka Magbebaye kanami.’ Piru eglegparan ku iya sikaniyu su kene kew ma eg-angken ne nakasale kew. 
Malemu re kaniyu ka egbalew-balew te suman-suman niyu wey ka egliwan te eglapihan niyu ne me nasud. Piru egpeyilawan kew iya te Ihiptu iling te pegpeyilew kaniyu te Asirya. 
Ne eg-engkeran niyu ka Ihiptu wey egmekeuunduk kew naan de te pegkeyilew niyu. Tenged su eg-engkeran kud ma ka nasud ne insalihan niyu, wey kene kew en iya egkabulihan te sika ne me nasud.”