Hirimiyas.
3.
Ne migkahi ka Magbebaye ne Manama: “Emun ke eg-engkeran e te lukes ka asawa rin, wey eg-asawe e ka asawa rin te lein, keilangan ne kene din e eggawien, su egpakarereet seini te intiru ne nasud. Piru egpekeiling kew se me Israilita te malitan ne egpamelegye te lawa rin. Masulug ka inggeyinawaan niyu ne me diyus-diyus. Piru minsan pad due, eg-umawen ku red sikaniyu eyew eglibed kayi te keddiey. 
Tengtengi niyu ka masalad ne me bubungan. Duen naan pad inged diye ne ware nalinditi? Inlinditan niyu ka intiru ne nasud pinaahi te pegsimba niyu te me diyus-diyus. Egpekeiling kew te malitan ne egpamelegye te lawa rin ne migpinpinnuu diye te ilis te dalan ka egtahad te lukes, iling te tulisan ne egtahad te egtulisen din. 
Sika ka egpuunan ne ware mig-uran te timpu te ting-uran. Piru minsan pad due, makehal red ka ulu niyu iling te malitan ne kene egkeyilew ne egpamelegye te lawa. 
“Ne kuntee egkahi kew keddiey, ‘Amey, duma ku sikeykew puun te bate e pad. 
Mahaan de egkaawe ka langet nu keddiey. Kene egpabulus-bulus ka kabelu nu keddiey.’ Sika ka inlalag niyu, piru inggimu niyu man‑e ka langun ne mareet!” 
Te timpu te peghari ni Husiyas, migkahiyan a te Magbebaye, “Nakita nu naa ka inggimu te kene ne matinumanen ne Israil? Egpekeiling sikandin te malitan ne egpamelegye te lawa rin. Migsimba sikandin te me diyus-diyus diye te tagse matikang ne bubungan, wey diye te malapung ne kayu. 
Ne kahiyen ku ne eglibed e sikandin kayi te keddiey pegkeimpus te inggimu rin ne iling due, piru ware sikandin miglibed. Ne nakita seini te suled din ne akalen ne iyan ka Huda. 
Migpakigsuwey a te Israil, wey impaawe ku sikandin tenged te pegpanlibug din pinaahi te pegsimba te me diyus-diyus. Piru minsan pad due, nakita ku ne ware naaldek keddi ka Huda ka suled din ne akalen. Nakalibug degma sikandin 
pinaahi te pegsimba te me diyus-diyus ne batu wey kayu, purisu nalinditan din ka nasud. Ne ware inggeram din ne minsan deisek ne hilew te peggimu rin kayi. 
Piru minsan pad due, ka kene ne matinumanen ne suled din ne Huda, ware miglibed kayi te keddiey ne egpuun iya te pusung din. Migpapitew-pitew re sikandin ne miglibed keddi. Sikeddiey se Magbebaye ne Manama ka miglalag kayi.” 
Ne migpabulus ka Magbebaye ne migkahi keddiey, “Minsan ke kene ne matinumanen keddi ka Israil, piru meupiya pad sikandin du te akalen ne Huda. 
Ne kuntee, hipanew ka wey ilalag nu seini diye te Israil ne dapit te igkahibang ne balabahan, ‘Libed ka kayi te keddi Israil ne kene ne matinumanen, su hiimenawen a. Kena ad egkabelu keykew taman te katamanan. 
Angkena nu re ne nakasale ka wey migsupak ka keddi te Magbebaye ne Manama nu. Ihuhud nu ne mig-ikul ka te lein ne me diyus-diyus pinaahi te pegsimba nu kandan diye te tagse malapung ne kayu, wey ware ka migtuman keddi. Sikeddiey se Magbebaye ne Manama ka miglalag kayi. 
“‘Libed kew kayi te keddi, me masinupaken ne keet-etawan; su sikeddiey ka Magbebaye ne Manama niyu. Eg-alam a te tigsabeka puun te tagse nasud niyu, wey tigdaruwa puun te tagse tribu niyu, wey eg-uyanen ku sikaniyu diye te Bubungan ne Siyun. 
Ne egbehayan ku sikaniyu te me pangulu ne matinumanen keddi; mangngateu wey matagseb sikandan ne egmandu kaniyu. 
Te pegginguma te timpu ne egkabuhal kew e amana te sika ne tane, kene niyud egkatanuran ka Tahuanan te Kasabutan. Ne kene niyud seini egkasuman-suman su ware niyud ma keilangana seini, wey ware kew e migsuman-suman ne eggimu pad kayi. 
Te seeye ne timpu, egngaranan niyud ka Hirusalim te, “Trunu te Magbebaye ne Manama.” Ne eglibulung ka langun ne me nasud diye te Hirusalim eyew te pegsaye te ngaran te Magbebaye. Kenad e sikandan eggimu sumale te igsuhu te makehal wey mareet ne pusung dan. 
Te seeye ne timpu, egparumeey ne eglibed ka keet-etawan te Huda wey Israil puun te pegkarakep diye te igkahibang ne balabahan peendiye te tane ne imbehey ku te kaap-apuan dan isip egkapanunud.’” 
Ne migkahi ka Magbebaye, “Egkahala a amana ne eg-isip kaniyu ne me anak ku, wey ka egbehey kaniyu te meupiya ne tane, ka tane ne amana ne mateles du te tane ne egkapanunud te duma ne nasud. Ne egkahiyen ku ne eg-isipen ad nikaniyu ne amey niyu, wey kahiyen ku ne kene kew e eg-engked keddi. 
Piru kene kew ne matinumanen keddiey me keet-etawan te Israil, egpekeiling kew te malitan ne kene ne matinumanen te asawa rin. Sikeddiey se Magbebaye ne Manama ka miglalag kayi.” 
“Ne due egkarineg ne laheng diye te puntul te masalad ne me bubungan. Migpandalawit wey migpeyid‑u-hid‑u ka keet-etawan te Israil tenged te maddeet ne himu ran, wey tenged su inlingawan a nikandan se Magbebaye dan. 
Sikaniyu se kene ne matinumanen ne keet-etawan, libed kew kayi te keddiey; su egpasayluwen ku sikaniyu te peg-inniyug niyu keddi.” Ne migtabak sikandan, “Uya, eglibed key due te keykew su sikeykew ma ka Magbebaye ne Manama ney. 
Malehet iya ne ware nakabulig kanami ka kahulub te pegsimba ney te me diyus-diyus diye te me bubungan. He Magbebaye ne Manama ney, nakataha key ne sikeykew re iya ka egpakaluwas te Israil. 
Ne puun te pegsimba ney ki Baal, naawe kayi te kanami ka me anak ney wey ka me mananap ney, wey ka langun ne inlaslasayan te me kaap-apuan ney puun pad te pegkabate ney. 
Eggeles key e tenged te hilew ney; su sikanami, duma te me kaap-apuan ney, nakasale ma keykew te Magbebaye ne Manama ney. Ne puun pad te pegkabate ney taman kuntee, ware key migtuman keykew.”