Hirimiyas.
5.
Ne migkahi ka Magbebaye ne Manama, “He matig-Hirusalim! Pangendiye kew te deralanen te Hirusalim. Linguta niyu naa te egpitew, ne emun ke egpakakita kew te minsan sabeka re ne etew ne matareng se eggimuwen wey egpakannekal ne egmatinumanen, egpasayluwen ku ka Hirusalim. 
Su minsan migsaad kew pinaahi te ngaran ku, piru kene ne malehet ka pegsaad niyu.” 
Ne migkahi a kandin, “He Magbebaye ne Manama, egpamitew ka te kamalehetan? Impanlampesan nu ka keet-etawan nu piru ware sikandan miglinga-linga, intamtamanan nu sikandan legpari, piru ware sikandan migpepanulu. Memakehal ka ulu ran wey kene sikandan eg-inniyug te me sale dan.” 
Ne nakakahi a te suman-suman ku, “Ware kaligneepan te seini ne me etew. Egkengeungel sikandan; ware sikandan nakataha te igkeupii te Magbebaye, ke nekey ka igkeupii te Magbebaye ne eggimuwen dan. 
Sikan naa ka eggendiya a te me pangulu wey egpakiglalag a kandan meyitenged kayi. Nakataha a ne nakanengneng sikandan ke nekey ka igkeupii te Manama, ke nekey ka igpeyimu kandan te Magbebaye.” Piru sikandan bes langun ka ware migpammineg te Magbebaye wey ware migpalintutuu kandin. 
Ne tenged kayi, egpangimatayan sikandan te me liyun ne egpuun te puwalas, egdereetan sikandan te me singgalung ne egpuun te disirtu, wey eglingutan te me tigri ka me lungsud dan. Ne egbinbintengen te seini ne me tigri ka minsan hentew ne eglihawang te lungsud. Egkeyitabu sika tenged te dakel ne sale dan, wey tenged te peg-inniyug dan te Manama. 
Ne mig-inse ka Magbebaye, “Mania te egpasayluwen ku ka keet-etawan ku? Mig-inniyuhan ad nikandan wey migsimbe e sikandan te me manama ne kene ne mallehet. Impeyibhibulung ku sikandan, piru migpanlibug sikandan wey migduma sikandan diye te baley te me malitan ne egpamelegye te lawa. 
Nekeiling sikandan te kudde ne lukesan ne in-ay-ayaran te egtanggu wey balinggeren amana. Ne tagse sabeka kandan, egkaalihan te asawa te sumbaley ran. 
Ne kene naa egkaayun ne eglegparan ku sikandan? Kene naa egkaayun ne egsulian ku ka nasud ne iling due? 
Egpeuyan a te me kuntere eyew egdereet te parasan te keet-etawan ku, piru kene dan de egdereetan langun. Igpatengul ku kandan ka me sugpang, su kene ma ne keddiey seeye. 
Kene ne matinumanen keddi ka keet-etawan te Israil wey Huda. Sikeddiey se Magbebaye ne Manama ka miglalag kayi.” 
Mig-uubat ka keet-etawan meyitenged te Magbebaye te migkahi, “Kene ki egmenuwen te Magbebaye. Ware me karereetan ne egginguma kanta; kene ki egpakasalerep te gubut wey ke bitil naa.” 
Ne migkahi sikandan te egpekeiling kun te kalamag ka me prupita; kene kun ne diye egpuun te Magbebaye ka egmanlalahen dan. Ne migkahi ka Amana ne Maresen ne Manama, “Hirimiyas, puun su iling ma rue ka inlalag dan, eggimuwen ku ne egpekeiling te hapuy ka me lalag ku due te be‑be nu, wey egpekeiling e ka me etew te pupud ne egkatutung wey egkeepus.” 
Me matig-Israil, egpalusuran kew te Magbebaye te keet-etawan ne egpuun te mariyu ne nasud. Maresen wey tapey e sika ne nasud, ka nasud ne ware niyu nanengnengi wey kene niyu egkasabut se linalahan. 
Egpakapatey ka me panganiban dan, wey mabbulut sikandan langun ne egpakiggira. 
Eg-aminen dan te egkeen ka naggaani niyu wey ka egkakeen niyu. Egpangimatayan dan ka me anak niyu, ka me mananap niyu wey egdereetan dan ka me parasan niyu wey ka me iggira niyu. Ne egguhusen te me sundalu ran ka egsalsalihan niyu ne malig‑en ne me siyudad niyu. 
Ne migkahi ka Magbebaye, “Piru minsan te seeye ne me aldew, kene ku red eg-aminen te egdereet ka keet-etawan ku. 
Ne emun ke eg-inse ka me etew, ‘Mania te inggimu seini langun te Magbebaye ne Manama?’ Kahii nu sikandan, ‘Tenged su mig-inniyuhan niyu ma sikandin, wey migpamakey kew e te me diyus-diyus due te inged niyu. Purisu egkengeuripen kew e te me lapu diye te lein ne nasud.’” 
Ne migkahi ka Magbebaye, “Kahii nu ka me kabuhalan ni Hakub wey ka keet-etawan te Huda: 
Pammineg kew te eglalahen ku, sikaniyu se me umbeg wey ware aperu. Due mata niyu piru kene kew egmakakita, wey due me talinga niyu, piru kene kew egmakarineg.” 
Ne mig-inse ka Magbebaye, “Mania te kene kew egkaaldek keddi? Mania te kene kew egkelkelen kayi te tangkaan ku? Intahu ku ka pantad ne eletanan te dahat. Ne kene iya eglapey ka dahat minsan derakel ka me bunlud ne egmakalampes-lampes diye te ilis. 
Piru memakehal ka ulu niyu wey masinupaken kew! Mig-inniyuhan ad e nikaniyu wey in-engkeran. 
Warad iya sabeka kaniyu ne nakasuman-suman ne egtahud keddiey te Magbebaye ne Manama niyu ne iyan migpeuran te timpu te ting-uran, wey ka migbehey te egkahaani te timpu te tinggaani. 
Piru ka mareet ne hinimuwan niyu ka nakabalabag ne egkeyitabu seini. Ka me sale niyu ka egpuunan ne kene niyu egkarawat ka me panalangin. 
“Masulug ka maddeet ne keet-etawan ku; iling sikandan te egmanlit‑ag te me bayaku piru iyan dan igpasahad ka me etew. 
Inggipenu dan ka baley ran te me tinakew, iling te kulungan ne napenu te me bayaku. Sikan naa ka nenaddatu e sikandan wey migmabantug. 
Dakel ka egkakeen dan wey migmallambeg sikandan. Ne ware tamanan te mareet ne hinimuwan dan, wey ware dan behayi te eleg ne peggukum ka me ilu, wey ke miglapig naa te seeye se egkengaayu-ayu. 
“Puun due, eglegparan ku sikandan, wey egsulian ku ka sika ne nasud. Sikeddiey se Magbebaye ne Manama ka miglalag kayi. 
Neyitabu e ka makaalat-halat naan de iya te sika ne inged. 
Egpanagne te me ubat ka me prupita; ne egpangulu ka me talagpanubad sumale te suhu te me prupita, wey ingkeupii re iya seini te keet-etawan ku. Piru nekey naan e ka eggimuwen dan ke eggingume e ka peggukum?”