Hirimiyas.
11.
Ne ingkahiyan a te Magbebaye ne Manama, 
“Tantanuri nu ka kasabutan ta, wey kahii nu ka keet-etawan te Huda wey Hirusalim 
te migkahi a se Magbebaye ne Manama te Israil, te egdilusen ku ka etew ne kene egtuman te tahu te seini ne kasabutan. 
Inggimu ku ka kasabutan duma te me kaap-apuan niyu te timpu ne impalihawang ku sikandan puun te Ihiptu, ka inged ne egpekeiling te egkanlabkanlab ne hapuy para kandan. Ingkahiyan ku sikandan te emun ke egtumanen a nikandan, egkeyimu sikandan ne keet-etawan ku wey egkeyimu a ne Manama ran. 
Ne egtumanen ku ka insaad ku te kaap-apuan niyu ne egbehayan ku sikandan te meupiya ne tane ne dakel se eg-uma, ka tane ne naangken niyud kuntee.” Ne migtabak a, “Malehet iya, Magbebaye.” 
Ne ingkahiyan ad man‑e te Magbebaye, “Hendiye ka te me siyudad te Huda wey diye te deralanen te Hirusalim. Ipangguhud nu ka lalag ku wey patantanuri nu te me etew ka kasabutan, wey ipatuman nu seini kandan. 
In-ay-ayaran ku panpanayi ka me kaap-apuan niyu ne egtuman keddiey puun pad te timpu ne impalihawang ku sikandan puun te Ihiptu taman kuntee. 
Piru warad iya sikandan migpammineg wey ke miglinga-linga naa keddiey. Nasi de iya migmakehal ka me ulu ran, wey mig-ikul te maddeet ne me suman-suman dan. Insuhu ku sikandan ne egtuman te kasabutan, piru ware dan seini tumana. Sikan naa ka impeula-ula kud kandan ka langun ne dilus ne nakasulat kayi.” 
Ne ingkahiyan e pad man‑e te Magbebaye, “Migplanu te mareet meyitenged keddiey ka keet-etawan te Huda wey Hirusalim. 
Miggimu e man‑e sikandan te me sale ne inggimu te kaap-apuan dan dengan ne warad iya migpalintutuu keddiey. Migsimba ka me matig-Israil wey ka me matig-Huda te duma pad ne me diyus-diyus, wey ware dan e tumana ka kasabutan ne inggimu ku duma te me kaap-apuan dan. 
Purisu kuntee, egkahi a se Magbebaye ne Manama te egpanpanayan ku sikandan ne egpeuyanan ku te karereetan wey kene sikandan egpakaalihu kayi. Ne minsan pad egpanguleyi sikandan ka egpangananey keddiey, kene ku sikandan egpamminehen. 
Ne egmangendiye ka keet-etawan te Huda wey Hirusalim te me diyus-diyus ne impanutungan dan te insinsu eyew egpabulig, piru kene seini egpakabulig kandan ke eggingume e ka karereetan. 
Iling kasulug ka me diyus-diyus te me matig-Huda te me siyudad dan, wey iling kasulug te me dalan ka me altar ne impasasindeg te me matig-Hirusalim, eyew egpanutungan te insinsu para te mekeyilew-hilew ne si Baal. 
Sikan naa Hirimiyas, kene kad ampu wey ke egsinehew naa ne egpangananey para te sika ne me etew, su kena a egpammineg ke egpangananey sikandan keddiey te timpu te kalised dan.” 
Ne migpabulus ka Magbebaye ne migkahi, “Maddeet ka hinimuwan te keet-etawan ne inggeyinawaan ku. Na, nekey naa ka katenged dan ne eggendiye te timplu ku? Kahiyen dan buwa ne egkabalabahan ka karereetan ne egginguma kandan pinaahi te me saad dan wey te me halad dan? Amana pad iya egkengaggale sikandan te maddeet ne egmangimuwen dan! 
Ingngaranan ku sikandan dengan te malapung ne ulibu ne masulug se behas wey meupiya. Piru kuntee, pinaahi te meemen ne laheng ku, egsilaban kud ka me dewun kayi wey egkengewugmas e ka me sugpang. 
“Sikeddiey, ka Amana ne Maresen ne Manama, ne miggimu te Israil wey Huda. Piru kuntee, egdereetan kud sikandan tenged te mareet ne hinimuwan dan. In-undulan dan ka langet ku pinaahi te pegtutung dan te insinsu diye ki Baal.” 
Ne ingguhuran a te Magbebaye meyitenged te mareet ne planu keddiey te me kuntere ku. 
Egpekeiling a te maamuk ne karniru ne in-uyan diye te gilanganan eyew eglapeen e. Wara a nakataha te migplanu bes sikandan ne eggimatey keddi. Migkahi sikandan, “Egpeleren tad ka kayu duma te me behas kayi pasayu te malambeg pad seini. Eggimatayan tad sikandin eyew egkaawe e sikandin kayi te inged, wey eyew warad e egpakasuman-suman kandin.” 
Ne mig-ampu a ne migkahi, “He Amana ne Maresen ne Magbebaye, eleg ka peggukum nu. Nakataha ka te suman-suman wey pusung te etew. Papitawa a te pegsuli nu te seini ne me etew, su insalig kud seini keykew.” 
Ne igkeupii te keet-etawan te Anatut ne egpatey ad e, wey ingkahiyan a nikandan te eggimatayan a nikandan ke egpabulus a ka egwali te lalag te Magbebaye. 
Purisu migkahi ka Amana ne Maresen ne Magbebaye, “Eglegparan ku sikandan! Egpatey ka me kankanakan dan diye te gira, wey egpatey te gutas ka me anak dan ne me lukes wey me malitan. 
Ware iya egkasame te me matig-Anatut, su egpeuyanan ku sikandan te karereetan ke eglegparan kud e sikandan.”