Hirimiyas.
14.
Ne inlalahan a te Magbebaye ne Manama meyitenged te gulabung. 
“Miglungku ka Huda, magguye e ka me siyudad din. Miglungku ka keet-etawan din, wey migmanguleyi ka me matig-Hirusalim ne egpabulig te Manama. 
Ne insuhu te me meyaman ka me suluhuanen dan eyew egsakug te weyig, nangendiye sikandan te me belun, piru warad iya weyig diye. Nanguli de due sikandan ne ware tahu te me gelun. Nenasuhey sikandan, wey imbunbunan dan e ka me ulaula ran tenged te pegkeyilew. 
Ne nambekabeke e ka tane tenged su warad uran. Ne puun te pegkasuhey te me talagbasuk, egpamunbunan dan e degma ka me ulaula ran. 
Ne minsan ka manggianak ne usa, eg-engked e degma te nati rin ne sikan pad miglesut su ware man e hilamunen. 
Ne egmanasindeg diye te puntul te masalad ne bubungan ka mahintalunan ne me mula. Eghalhal sikandan iling te me mananap ne egpekeiling te asu. Kenad sikandan egpakameleg-meleg puun su warad e egkengatabtab dan. 
Ne ingkahiyan a te keet-etawan ku, ‘He Magbebaye, nakasale key keykew. Kamasulug key e mig-inniyug keykew, wey eleg key iya ne eglegparan. Piru bulihi key red ubag eyew egkabantug ka ngaran nu. 
Sikeykew re iya ka egkapallatengan te me Israilita; sikeykew re iya ka egpakaluwas kanami puun te karereetan. Mania te iling kad te lapu kayi te inged ney, iling te eggipanew ne mig-aran de te senge-karusileman? 
Mania te iling kad te etew ne natanengan, iling te sundalu ne ware igkabulig kanami? Nakataha key ne duma ney sikeykew, he Magbebaye! Keet-etawan key nikeykew, kene key ubag engkeri nikeykew.’” 
Nataman, migkahi e ka Magbebaye meyitenged te seini ne me etew, “Egkeupian iya sikandan ne egpariyu keddiey, wey kene sikandan egpakapegnel te pegkeetew ran. Sikan naa ka kena ad e egkeupian kandan. Egtantanuran ku ka maddeet ne himu ran, wey eglegparan ku iya sikandan tenged te me sale dan.” 
Ne ingkahiyan a te Magbebaye, “Kene kad ampu para te keupianan te seini ne me etew! 
Minsan pad egpuasa sikandan, kena ad egpammineg te pegpangananey ran, wey minsan pad ke egtutung sikandan te igpanubad kayi te keddiey, wey eghalad te harina, kene ku egdawaten. Nasi ku re iya egpangimatayi sikandan te gutas, dalu wey te me gira.” 
Piru migkahi a, “He Magbebaye, nakataha ka te ingkahiyan e te me prupita ka me etew te warad e gira wey ke gutas naa ne egginguma, tenged su migsaad ke ma kandan ne egbehayan nu sikandan te keupianan kayi te inged.” 
Piru migtabak keddi ka Magbebaye, “Ubat ka immanlalag te me prupita pinaahi te ngaran ku. Wara a migsuhu wey ke migpakiglalag naa kandan. Ubat ka me taheinep ne ingguhud dan te me etew, wey ware karuan te me pegpanagne dan. 
Sikan naa, sikeddiey ka Magbebaye, ka egkahi kaniyu ke nekey ka eggimuwen ku te sika ne me prupita. Migmanagne sikandan pinaahi te ngaran ku, minsan ware ku suhua sikandan. Migkahi sikandan te ware kun e gira wey gutas kayi te inged. Purisu eggimatayan ku sikandan te gutas wey te gira. 
Ne ka me etew ne ingguhuran dan, iling ded due ka egkeyitabu. Eggimatayan sikandan langun—ka me asawa ran wey me anak dan pinaahi te gutas wey gira. Ne igmandegpak ka me lawa ran diye te me dalan te Hirusalim, wey warad e egmakalebeng kandan. Igpeula-ula kud kandan ka peglegpad ne eleg kandan.” 
Ne insuhu a te Magbebaye ne egguhuran ka me etew meyitenged te peglungku ku, “Warad egtamanan te luwe ku ne egtulayas tagse aldew wey marusilem, su masumpit ka pali te keet-etawan ku wey egkengasakitan amana sikandan. 
Ne emun ke eggendiya a te kamet, egkakita ku ka me lawa te me etew ne nammatey te gira, wey emun ke eggendiya a te me siyudad, egkakita ku ka me etew ne nammatey te gutas. Ne migpabulus ka me prupita wey ka me talagpanubad te himu ran, piru ware sikandan nakataha ke nekey ka eggimuwen dan.” 
Ne mig-inse ka me etew te Magbebaye, “Magbebaye, mig-inniyuhan nud en iya ka keet-etawan te Huda? Nalangetan kad en iya te keet-etawan te Hirusalim? Mania te intamtamanan key e nikeykew pamali-i ne kene key e egkeulian? Mig-iman-iman key te keupianan, piru warad iya meupiya ne neyitabu. Mig-iman-iman key ne egkeulian, piru makaliyas-liyas de iya ka migginguma. 
He Magbebaye, in-angken ney e ka me sale ney keykew, wey ka me sale te kaap-apuan ney. 
Kene key re ubag engkeri. Kene nu re ubag dereeti ka Hirusalim, ka amana ne mabantug ne trunu nu. Tumana nu ubag ka kasabutan ne inggimu nu duma kanami. 
Warad iya minsan sabeka te me diyus-diyus diye te me nasud ne egpakapeuran. Ne minsan ka langit, kene iya egpakapeuran ke sikandin de. Sikeykew naan de iya, he Magbebaye ne Manama ney, ka egkapallatengan ney, su sikeykew man de iya ka egpekeyimu te langun.”