Hirimiyas.
20.
Te seeye ne timpu, si Pasur ne talagpanubad ka labew ne upisyal te timplu te Magbebaye. Ne si Imir ka amey rin. Te pegkarineg din te inlalag ku, 
impepamarasan ad e nikandin, wey impabaku diye te dibabew ne gumawan te timplu ne migngaranan te Gumawan ni Binhamin. 
Te maselem e, te impalekaan ad ni Pasur, ingkahiyan kud sikandin, “Kenad e ne Pasur ka igngaran te Magbebaye keykew, ke kene, ‘Makaliyas-liyas e te minsan hendei.’” 
Su migkahi ka Magbebaye, “Eggimuwen ku ne egkaliyasan ka te pegkeetew nu, wey egkengalliyasan e degma keykew ka me alukuy nu. Ne egkakita nu sikandan ka egpangimatayan te me kuntere dan diye te gira. Igpasakup kud te Hari te Babilunya ka keet-etawan te Huda. Egpamirisuwen din ka duma diye te nasud din, wey egpangimatayan din ka duma te kampilan. 
Igpaahew kud e te me kuntere dan ka langun ne karatuan te seini ne siyudad, ka me karatuan ne immanlimud te me kaap-apuan dan, ka subla ne mahal ne me karatuan, lagkes ka me karatuan te me Hari te Huda, wey egpanguyanen e seini langun diye te Babilunya. 
Ne sikeykew naa Pasur, egkarakep ka wey ka langun ne pamilya nu, wey egpanguyanen kew diye te Babilunya. Ne egpatey kew e diye wey iglebeng kew e duma te langun ne alukuy nu ne immangguhuran nu te ubat.” 
Magbebaye ne Manama, in-akalan a nikeykew, wey naakalan a iya. Manekal ke pad keddiey, wey neelehan ad nikeykew. Eglelemetan ad e te langun, wey egtapek de sikandan te aldew ka egngingisi keddiey. 
Ne iyan ku naan de egkalalag te egpanguleyi ka egkahi, “Kabulut wey karereetan!” Magbebaye, layun ad en iya nikandan egderali-dii wey eglelemeti tenged te pegwali ku te lalag nu. 
Piru emun ke egkahi a te eglingawan kud sikeykew wey kena ad egwali te lalag nu, egkaheram kud ka lalag nu ne iling te meinit ne hapuy ne egkalegleg kayi te pusung ku ne egmekeuma te me tul‑an ku. Inggeraman ku seini te egpegnel, piru kene ku iya seini egkapegnel. 
Narineg ku ka me etew ne egmannaas-naas ne egkahi, “Makaalat-halat minsan hendei! Purisu, igsumbung ta sikandin!” Ne minsan ka me alukuy ku, egtetahad ke egkaseyyup a. Egkahi sikandan, “Kema ke egkaakalan ta sikandin wey egkasapenan ta, wey egpakasuli kid e kandin.” 
Piru duma ku sikeykew Magbebaye ne Manama iling te bubuluti ne bahani. Purisu egkasaligkat seeye se egmanleig-leig keddiey, wey kena a nikandan egkatalu. Egkengeyilawan iya sikandan su kene ma sikandan egmanlampus. Ne kene iya egkalingawan ka pegkeyilawi ran. 
He Amana ne Maresen ne Magbebaye, ne nakanengneng ke hentew ka me matareng, nakanengneng ka te me pusung wey te me suman-suman te me etew. Purisu, papitawa a nikeykew te pegsuli nu te me kuntere ku su insalig kud ma keykew seini se egkeula-ula ku. 
Ulahingi niyu wey dayana niyu ka Magbebaye! Su inluwas din ka egkengaleig-leig puun te maddeet ne etew. 
Meupiya pad perem ke indilus e ka aldew te peglesut ku! Ware panalangini ka aldew te pegpalelesut te iney ku keddiey! 
Indilus ka etew ne migpangguhud ne migpahale-gale te amey ku te migkahi, “Lukes ka anak nu!” 
Egpekeiling perem sikandin te me siyudad ne ingguhus te Magbebaye te ware pegkeyid‑u. Egkarineg din perem te maselem ka pegkuleyi tenged te masakit wey ka kasamuk te timpu te meudtu 
su ware e ma nikandin himatayi te ware e pad ilesut. Iyan kud e perem lebeng ka getek te iney ku. 
Mania te neetew e pad? Eyew re egpakasalerep te kahubut, kalaggew, wey hilew taman te egpatey a?