Hirimiyas.
25.
Te igkeep‑at ne leg‑un te peghari ni Huwakim ne anak ni Husiyas diye te Huda, inlalahan a te Magbebaye ne Manama meyitenged te keet-etawan te Huda. Seeye ka an-anayan ne leg‑un te peghari ni Nibukadnisar diye te Babilunya. 
Ne ingkahiyan ku ka keet-etawan te Huda wey ka langun ne matig-Hirusalim, 
“Migpakiglalag ka Magbebaye keddiey te daruwa ne pulu wey tatelu (23) ne leg‑un. Migbunsud sika te igkasapulu wey tatelu (13) ne leg‑un te peghari ni Husiyas ne anak ni Amun diye te Huda. Ingguhuran kud sikaniyu meyitenged te langun ne inlalag din keddiey piru ware kew en iya miglinga-linga. 
Ware kew en iya migpammineg minsan migpabulus-bulus ka Magbebaye ne migsuhu te me suluhuanen din ne me prupita. 
Ingkahiyan kew nikandan te egpeinniyuhen kew te maddeet ne me batasan wey me himu niyu, eyew egpekeugpe kew te ware egtamanan kayi te inged ne imbehey te Magbebaye ne Manama kaniyu wey te me kaap-apuan niyu. 
Ingkahiyan kew nikandan te kene egpamakey wey egsimba te me diyus-diyus ne inggimu niyu eyew kene egkabelu ka Magbebaye kaniyu, wey eyew kene kew nikandin eglegparan. 
Piru ka Magbebaye e ka migkahi te ware kew en iya migpammineg kandin. Nasi niyu re iya peyibelua sikandin pinaahi te impangimu niyu ne me diyus-diyus. Sika ka egpuunan ne inlegparan kew nikandin. 
“Purisu migkahi ka Amana ne Maresen ne Magbebaye, ‘Puun su ware kew ma migpammineg keddiey, 
eglibulungen ku ka keet-etawan puun te igkahibang ne balabahan ne impanguluwan te suluhuanen ku ne si Nibukadnisar, ka Hari te Babilunya. Egpalusuran ku kandan ka seini ne inged, wey ka langun ne inged ne nakalingut kayi. Egtamtamanan kud sikaniyu egdereeti wey egkaaldek ka me etew ne egpakakita te egkeyitabu kaniyu. Egderali-dian kew te ware egtamanan. 
Ne egtamanen kud ka peggale-gale niyu. Warad egkarineg ne laheng te peggale-gale te beuhu, wey dahing te me galingan niyu. Ne warad eglayag ne me sulu due te me baley niyu. 
Egkareetan iya ka intiru ne inged wey egkasakup te Hari te Babilunya ka seini ne nasud lagkes ka duma ne nasud ne nakalingut kayi taman te pitu ne pulu (70) ne leg‑un. 
Piru pegkapenga due, eglegparan kud ka Hari te Babilunya wey ka keet-etawan din tenged te me sale dan. Ne egdereetan kud degma ka nasud dan taman te ware egtamanan. 
Igpasalerep kud ka nasud dan te langun ne karereetan ne inlalag ku, ka langun ne karereetan ne nakasulat te seini ne baseen ne inlalag ni Hirimiyas meyitenged te langun ne nasud. 
Ne eg-uripenen sikandan te masulug ne nasud, wey te mabbantug ne Hari. Eglegparan ku sikandan sumale te me himu ran.’” 
Ne ingkahiyan a te Magbebaye ne Manama te Israil, “Kua nu seini se ubab ne napenu te langet ku. Peinuma nu kayi ka langun ne nasud ne egpeendiyaan ku keykew. 
Emun ke egpekeinum e sikandan kayi, egmakatilistilis sikandan wey iling e te egpamusawen tenged su igpasalerep ku ma sikandan te gira.” 
Purisu ingkuwa kud ka ubab puun te Magbebaye, wey impeinum kud ka langun ne nasud ne impabayaan din keddi. 
Impeinum ku ka keet-etawan te Hirusalim, te Huda, lagkes ka me Hari wey me upisyal ran eyew egkareetan sikandan. Ne makaliyas-liyas ka neyitabu kandan, intetampele e sikandan te me etew wey inderali-dian iling te neyitabu kuntee. 
Impeinum ku degma ka Hari te Ihiptu lagkes ka me upisyal rin, me pangulu rin, wey ka langun ne keet-etawan din 
lagkes e ka langun ne me lapu diye te Ihiptu; ka langun degma ne Hari wey keet-etawan te inged te Us, wey ka langun ne Hari te me siyudad te Pilistiya: ka Askilun, Gasa, Ikrun, wey ka langun ne me etew ne nasame diye te Asdud. 
Ne imbehayan kud degma ka me Hari te Idum, Muwab, Amun, 
ka me Hari te Tiru wey te Sidun, wey ka me Hari diye te inged ne talipag te dahat ne Miditiranyu. 
Ne imbehayan ku degma ka keet-etawan te Didan, Tima, Bus, wey ka langun ne keet-etawan diye te disirtu ne migmatabulug isip pegtahud te me diyus-diyus dan. 
Ne imbehayan ku degma ka Hari te Arabya, ka langun ne Hari te nalein-lein ne tribu ne nangugpe diye te disirtu, 
ka langun ne Hari te Simri, Ilam, Midiyan, 
wey ka langun ne Hari te igkahibang ne balabahan, marani ma wey se mariyu, wey ka langun ne migharian kayi te kalibutan. Ne pegkapenga ran, ka Hari e degma te Babilunya ka eg-inum. 
Ne ingkahiyan a te Magbebaye, “Kahii nu sikandan te migkahi a se Amana ne Maresen ne Magbebaye ne Manama te Israil, ‘Inum kew kayi te ubab te langet ku taman te egkengewubug kew e wey egmekeiileb e. Inum kew taman te egkengapeled kew e wey kenad egmakasasindeg tenged te gira ne igpasalerep ku kaniyu.’ 
Ne emun ke kene sikandan eg-inum, kahii nu sikandan te migkahi a se Amana ne Maresen ne Magbebaye te keilangan iya ne eg-inum sikandan! 
Pitew kew! Imbunsuran kud e te eglegpad ka Hirusalim, ka siyudad ne in-alam ku para te kabantug ku. Iyan ku naan pa iya kene legpari sikaniyu! Eglegparan ku iya ka langun ne nangugpe te kalibutan. Sikeddiey ka Amana ne Maresen ne Magbebaye ka miglalag kayi.” 
Ne ingkahiyan ad e man‑e te Magbebaye ne Manama, “Hirimiyas, ipangguhud nu te me etew ka langun ne inlalag ku. Kahii nu sikandan: Iling ka Magbebaye te liyun ne egginihel puun te langit, egkarineg ka laheng din puun diye te matulus ne ugpaan din. Egpatamtamanan din egpanguleyii ka keet-etawan din, wey ka langun ne etew te kalibutan iling te etew ne egkuleyi taheed te egdiriek te behas te paras. 
Ne egkarineg ka laheng din te intiru ne kalibutan, su egbayungan din e ka langun ne nasud. Eggukuman din e ka langun ne etew, wey egpangimatayan din e ka me makasesale.” 
Ne migpabulus ka Amana ne Maresen ne Magbebaye ne migkahi, “Bantey kew! Eggingume e ka karereetan te me nasud iling te bagyu ne egpuun te diriyui ne inged te kalibutan.” 
Te sika ne timpu, egmekeempet te intiru ne kalibutan ka me lawa te egpangimatayan te Manama. Ne warad eglungku kandan, wey warad e eglibulung wey ke eglebeng naa kandan. Egpekeiling e sikandan te tei ne egkatalagtag diye te tane. 
Panaman-taman kew pandalawit, me pangulu wey me talagtameng te keet-etawan! Lungku kew, wey lilid-lilid kew te abu su miggingume e ka timpu ne egpangimatayan kew e iling te me karniru. Egkengalupet kew wey egkengatalagtag iling te mahal ne kuren ne egkapese. 
Warad iya inged ne egkapallahuyan niyu wey egkaaputan. 
Egkarineg ka kuleyian niyu wey ka dalawitan niyu, su eglegparan e te Magbebaye ka me inged niyu. 
Ne tenged te mangune-kune ne langet te Magbebaye, egkeyimu e ne disirtu ka inged niyu ne malinawen. 
Eg-engkeran e te Magbebaye ka keet-etawan din, iling te liyun ne eg-engked te sulung din. Ne egkeyimu e ne disirtu ka inged dan tenged te gira, wey tenged te mangune-kune ne langet te Magbebaye.