Hirimiyas.
33.
Ne taheed te diye e pad te prisuwan ne diye te lama te me talagbantey te palasyu te Hari, impanengneng ad man‑e te Magbebaye ne Manama. 
Seini ka inlalag te Magbebaye ne iyan miggimu wey migtahu te kalibutan. Magbebaye ne Manama ka ngaran din. Migkahi sikandin, 
“Umew kew keddi wey egtabaken ku sikaniyu. Ne igpakita ku kaniyu ka derakel wey nenekeeles ne me kein-inuwan ne ware niyu pad nanengnengi. 
Su sikeddiey se Magbebaye ne Manama, ka Manama te Israil, egkahi: impangguhus niyu ka me baley diye te Hirusalim, wey ka palasyu te Hari te Huda eyew ig-elet niyu te eglusud ne me kuntere. 
Egpakaseled te siyudad ka me matig-Babilunya ne egpakiggira kaniyu, wey egkapenu ka seini ne siyudad te lawa te me etew ne egpeyimatayan ku kandan tenged te langet ku. Ne eg-engkeran kud e ka seini ne siyudad tenged te maddeet ne hinimuwan niyu. 
Piru egginguma ka timpu ne eg-ay-ayaran ku red seini ne siyudad wey igpalibed ku red ka meupiya ne peglelawa te me mahinged kayi. Ne eg-ugpe sikandan ne matubung wey due keupianan. 
Igpalibed ku red ka keupianan te me matig-Israil wey me matig-Huda, wey igpasasindeg ku red ka me siyudad dan iling te dengan. 
Ne eglinisan ku sikandan puun te langun ne sale dan, wey egpasayluwen ku sikandan te pegribildi ran keddiey. 
Ne emun ke egkeyitabu e seini, egkeyimu ka Hirusalim ne egpuunan te kahalaan, kabantug, wey pegsaye keddiey. Ne ka langun ne nasud te kalibutan, egpangelkelen te liyas ke egpakarineg te langun ne meupiya ne eggimuwen ku te keet-etawan te Hirusalim, wey te katubung, wey keupianan ne igbehey ku kandan.” 
Ne migpabulus ka Magbebaye ne Manama ne migkahi, “Migkahi kew te iling te disirtu ka me lungsud te Huda, wey ka me dalan te Hirusalim, wey warad me etew wey me mananap ne eg-ugpe kayi. Piru egginguma ka timpu ne egkarineg e man‑e kayi ne inged 
ka me laheng te pegkahale, wey te me sahakeen te beuhu. Ne egkarineg niyu ka me etew ne eg-ulahing ne eg-uyan te me halad dan te pegpasalamat peendiye te timplu ku. Egkahi sikandan, ‘Pasalamati niyu ka Amana ne Maresen ne Magbebaye, tenged te keupiya rin wey te geyinawa rin ne kene egkabalbalawan.’ Ne egkahale e ka me etew su igpalibed ku ma ka meupiya ne peg-ugpe dan iling te dengan. Sikeddiey se Magbebaye ne Manama ka miglalag kayi.” 
Ne migpabulus ka Amana ne Maresen ne Magbebaye ne migkahi, “Minsan pad ke kene egkeugpaan ka seini ne inged te me etew wey ke me mananap naa, piru egginguma ka timpu ne duen e keureme me panabtaban diye te langun ne me lungsud, wey diye egpanguyana te me talagbantey ka me karniru ran. 
Ne egseel e man‑e ka me talagtameng te me mananap dan, diye te me lungsud ne diye te me bubungan, te me lungsud diye te iglineb, te me siyudad te Nigib, diye te inged ni Binhamin, diye te me bariyu ne nakalingut te Hirusalim, wey diye te me lungsud te Huda. 
“Ne egginguma ka timpu ne egtumanen kud ka langun ne keupianan ne insaad ku te keet-etawan te Israil wey Huda. 
Te sika ne timpu, eg-alam ad te matareng ne Hari ne egpuun te kabuhalan ni Dabid. Ne eggimuwen din ka eleg wey matareng ne peggukum due te intiru ne inged. 
Ne egkaluwas e ka keet-etawan te Huda, wey eg-ugpe e ne ware samuk ka keet-etawan te Hirusalim. Egngaranan e ka Hirusalim te ‘Ka Magbebaye ne Manama ka migbehey kanta te kaluwasan.’ 
Sikeddiey se Magbebaye ne Manama, igsaad ku ne kene egkaawaan si Dabid te kabuhalan ne eghari te Israil. 
Ne kene degma egkaawaan si Libi te kabuhalan ne egkeyimu ne talagpanubad ne egpamakey keddiey pinaahi te pegpanubad te egtutungen, wey eghalad te harina, wey te duma pad ne igmanubad te ware egtamanan.” 
Ne impanengneng a te Magbebaye ne Manama, 
“Miggimu ad te kasabutan te peglepew te maaldew wey te marusilem, eyew egginguma sikandan te eleg ne timpu, wey kenad egkabalbalawan sika ne kasabutan. 
Ne iling ded degma due ka kasabutan ney te suluhuanen ku ne si Dabid. Kene sikandin egkaawaan te kabuhalan ne eghari te Israil. Ne iling ded degma ka me talagpanubad ne kabuhalan ni Libi, egpabulus sikandan ne egpamakey keddiey. 
Egpamasuluhen ku ka me kabuhalan ni Dabid, wey ka me kabuhalan ni Libi ne talagpanubad ne egpamakey keddiey. Egpekeiling sikandan kasulug te kene egkaseel ne me bituen diye te langit wey te lelanek diye te ilis te dahat.” 
Ne impanengneng ad man‑e te Magbebaye ne Manama, 
“Ware ke bes nakarineg te egmanlalahen te me etew ne mig-inniyuhan ku kun e ka Israil wey ka Huda, ka daruwa ne pamilya ne in-alam ku? Sikan naa ka egle-leihen dan e ka keet-etawan ku, wey ware dan e seini ilaa ne nasud. 
Piru egkahi a se Magbebaye: ke ware ku himuwa ka kasabutan ku te maaldew wey marusilem wey ka me tulumanen te langit wey te tane, 
kene ku egdawaten ka me kabuhalan te suluhuanen ku ne si Hakub wey Dabid, wey kena a eg-alam te me kabuhalan ni Dabid ne egmandu te kabuhalan ni Abraham, Isaak, wey Hakub. Iglibed ku red iya kandan ka meupiya ne peg-ugpe dan wey igkeyid‑u ku sikandan.”