Hirimiyas.
34.
Ne inlusuran ni Nibukadnisar ne Hari te Babilunya ka Hirusalim wey ka me lungsud ne nakalingut kayi. Imbulihan sikandin te langun ne sundalu rin, wey te me sundalu te langun ne migharian ne nasakup din. Te seeye ne timpu, ingkahiyan a te Magbebaye ne Manama, 
“Hendiyei nu si Sidikiyas ne Hari te Huda wey kahii nu sikandin te migkahi a se Magbebaye ne Manama te Israil te igbehey kud ka seini ne siyudad diye te Hari te Babilunya, wey egsilaban din e seini. 
Ne kene ka iya egpakapallahuy, egkarakep ka iya wey igbehey kad e kandin. Egpekegkita kew wey egpekeglalag kew iya. Ne eg-uyanen kad e nikandin diye te Babilunya. 
Piru pammineg ka te eglalahen ku meyitenged keykew, Hari Sidikiyas. Kene ka egpatey te gira. 
Egpatey ka ne malinawen. Ne diye te lebeng nu, egtutung te insinsu ka keet-etawan nu te pegtahud keykew iling te inggimu ran diye te lebeng te me kaap-apuan nu ne nekewun‑a keykew mighari. Eglungku sikandan keykew wey egkahi, ‘Migpatey e ka Hari ta!’ Sikeddiey se Magbebaye ne Manama ka miglalag kayi.” 
Ne inlalag kud iya seini langun ki Hari Sidikiyas diye te Hirusalim 
taheed te inlusuran te me sundalu te Hari te Babilunya ka siyudad. Ne inlusuran dan degma ka Lakis wey ka Asika su seini naan de ka nasame ne me siyudad te Huda ne in-alad. 
Ne due inlalag te Magbebaye ne Manama keddiey te nekeimpus e si Hari Sidikiyas wey ka langun ne keet-etawan te Hirusalim ka migpasabutey ne egbehayan te kaligwangan ka me uripen dan; 
ka me malitan wey me lukes eyew warad Hibruwanen ne eg-uripenen te duma rin ded. 
Ne mig-uyun te seini ne kasabutan ka langun ne etew lagkes ka me pangulu ran, wey imbehayan dan iya te kaligwangan ka me uripen dan. 
Piru te ware naluhey, nabalbalawan e ka me suman-suman dan, wey impanguripen dan e man‑e ka me uripen dan ne me lukes wey malitan ne imbehayan dan te kaligwangan. 
Purisu impanengneng a te Magbebaye ne Manama, 
“Egkahi a se Magbebaye ne Manama te Israil: Miggimu a te kasabutan duma te kaap-apuan niyu te timpu ne impalihawang ku sikandan puun te Ihiptu, ka inged ne mig-uripen kandan. Ingkahiyan ku sikandan 
te tagse igkapitu ne leg‑un, keilangan ne due eglekaan dan ne Hibruwanen ne uripen ne nakapamakey e kandan te hen‑em ne leg‑un. Piru warad iya migpammineg wey ke miglinga-linga naa keddiey ka me kaap-apuan niyu. 
Ware kew pad naluhey ka mig-inniyug te me sale niyu, wey miggimu te eleg kayi te tangkaan ku. Migpasabutey kew ne eglekaan e ka langun ne uripen niyu ne duma niyu red, wey miggimu kew te kasabutan kayi te tangkaan ku, kayi te timplu ne egsimbaan keddiey. 
Piru kuntee, nabalbalawan e ka me suman-suman niyu wey wara ad nikaniyu tahura. Impanguripen niyu red man‑e ka me uripen niyu ne me lukes wey malitan ne imbehayan niyud te kaligwangan ne eggimu te igkeupii ran. Impehes niyu red man‑e sikandan panguripena. 
Sikan naa ka egkahi a se Magbebaye ne Manama te insupak a nikaniyu su ware niyu ma behayi te kaligwangan ka me suled niyu wey me sumbaley niyu. Purisu egbehayan kud sikaniyu te kaligwangan, kaligwangan ne egpatey te gira, gutas, wey dalu. Ne tenged te egkeyitabu kaniyu, egkengaaldek ka langun ne migharian kayi te kalibutan. 
Ne tenged su insupak niyu ma ka kasabutan ta wey ware niyu himuwa ka neuyunan, eggimuwen kud due te kaniyu ka inggimu niyu te nati ne baka ne imperi niyu wey diye kew migbaye te taliware kayi. 
Ne igbehey kud te me kuntere ka me pangulu te Huda wey Hirusalim, wey ka me upisyal te Hari, lagkes ka me talagpanubad, wey duma pad ne mahinged ne migbaye diye te taliware te imperi ne nati te baka. 
Igbehey kud sikandan te me kuntere dan ne egkeupian ne eggimatey kandan. Ne egpangeenen e ka me lawa ran te me manuk-manuk wey te mahintalunan ne me mananap. 
Igbehey kud si Sidikiyas ne Hari te Huda lagkes ka me upisyal rin diye te me kuntere dan ne egkeupian ne eggimatey kandan. Igbehey kud sikandan diye te me sundalu te Hari te Babilunya ne mig-engked e ka eglusud kaniyu. 
Ne egmanduan kud man‑e ka me sundalu ne eglibed kayi te siyudad. Eglusuran dan seini, eg-ahawen, wey egsilaban. Eggimuwen ku ne disirtu ka inged eyew kenad egkeugpaan ka me lungsud te Huda, wey warad eg-ugpe kayi.”