Hirimiyas.
50.
Seini ka lalag te Magbebaye ne Manama ne impanengneng keddi meyitenged te me matig-Babilunya: 
“Ipangguhud niyu diye te me nasud ka guhuren meyitenged te Babilunya! Ipasasindeg niyu ka bendila wey kene niyu iheles. Iempet niyu ka guhuren. Kahi kew, ‘Egkaahew e ka Babilunya! Egkengallupet e ka me diyus-diyus din wey egkeyilawan ka diyus-diyus din ne si Bil wey si Marduk.’ 
“Su eglusuran ka Babilunya te nasud ne egpuun te igkahibang ne balabahan, wey egkeyimu e ka Babilunya ne mammara ne inged ne ware mig-ugpe. Egpamallahuy ka me etew wey ka me mananap, wey warad e eg-ugpe te Babilunya.” 
Ne migkahi ka Magbebaye, “Emun ke egginguma ka sika ne timpu, ka keet-etawan te Israil wey Huda, egluyud e ka egmanguli diye te inged dan. Egmanguli sikandan ne egmaninehew ka egpamitew keddiey te Manama ran. 
Ne eg-inse sikandan ke hendei ka dalan peendiye te Hirusalim wey egmangendiyad sikandan. Ne eggimu sikandan te kasabutan ne ware egtamanan duma keddiey wey egtumanen dan seini.” 
Ne migkahi pad man‑e ka Magbebaye, “Nekeiling e ka keet-etawan ku te me karniru ne nallaag. In-inahak sikandan te me talagtameng dan diye te maddeet ne inged te me bubungan, wey nallingew e sikandan te eg-ulian dan. 
Ne egpandawiyen sikandan te seeye se egmakakita kandan, wey egkahi ka me kuntere dan, ‘Nakasale sikandan te Magbebaye ne Manama, purisu kene ne sale ka inggimu ta. Migsalig te Magbebaye ka me kaap-apuan dan, wey eleg perem degma ne egtuman sikandan kandin.’ 
“Keet-etawan te Israil, pangawe kew e due te Babilunya! Engkeri niyud ka sika ne inged! Hun‑a-wun‑a kew e awe 
su egpalusuran ku ka Babilunya te mannekal ne me nasud ne egpuun te igkahibang ne balabahan. Eglusuran dan ka Babilunya wey egkaahew ran seini. Tummawan sikandan ne me talagpane wey kene iya sikandan egkaseyyup. 
Ne egpangahawen dan ka karatuan te Babilunya wey egpanguyanen dan ka langun ne igkeupii ran. Sikeddiey se Magbebaye ne Manama ka miglalag kayi.” 
Ne migkahi pad man‑e ka Magbebaye ne Manama, “Me matig-Babilunya, impanakawan niyu ka keet-etawan ku. Piru minsan pad egpalpallahuy kew te pegkahale niyu iling te nati te baka diye te panabtaban, wey ke iling naa te egdindineg-ey ne kudde, 
egpeyilawan ku iya ka nasud niyu. Ne egkeyimu e seini ne subla ne deisek te langun ne nasud, wey egkeyimu e seini ne disirtu wey inged ne ware mig-ugpe. 
Ne tenged te langet ku, ware iya egpekeugpe te Babilunya. Egkareetan seini wey egkengatanengan wey egkengeinu-inu ka langun ne egmanlihad tenged te egkeyitabu kayi. 
“Me talagpane, linguti niyud ka Babilunya. Iamin niyu ipane kandin ka me tunud niyu, tenged su nakasale sikandin keddiey. 
Ne panguleyi kew langun se nakalingut te siyudad, su migpeiluk-iluk e ka Babilunya! Nagguhus e ka me matikang ne me baley wey ka me matikang wey makepal ne batu ne alad te siyudad. Egsulian kud sikandin, purisu suli kew e degma kandin, wey himuwa niyu kandin ka inggimu rin diye te duma. 
Gulaa niyud ka me talagpamula wey me talaggaani. Ne egkengaaldek te me sundalu ne eglusud kandan ka langun ne lapu ne nangugpe diye, wey egmanguli e sikandan diye te me inged dan.” 
Ne migkahi ka Magbebaye, “Ka keet-etawan te Israil, nekeiling e te me karniru ne natalagtag ne impanalukunan te me liyun. Hun‑a ne miglusud kandan ka Hari te Asirya. Ne nataman, sikan e se Hari te Babilunya ne si Nibukadnisar ne migpanlepu kandan. 
Purisu sikeddiey se Amana ne Maresen ne Manama, ka Manama te Israil, egkahi a te eglegparan kud ka Hari te Babilunya wey ka inged din, iling te peglegpad ku te Hari te Asirya. 
Ne igpalibed kud ka keet-etawan te Israil diye te inged dan. Ne egmangeen sikandan wey egkengabulung-bulung, iling te me karniru diye te Karmil, Basan, diye te me bubungan te Ipraim, wey Gilyad. 
Te sika ne me timpu, egkaawe e ka sale te me matig-Israil wey ka maddeet ne me himu te me matig-Huda su egpasayluwen kud ma ka me etew ne insame ku. Sikeddiey se Magbebaye ne Manama ka miglalag kayi.” 
Ne migkahi ka Magbebaye ne Manama, “Lusuri niyud ka keet-etawan te Mirataim wey Pikud. Pangimatayi niyu sikandan! Himuwa niyu ka langun ne insuhu ku kaniyu. 
Ne egkarineg te intiru ne inged ka kahulub te gira, wey ka mangune-kune ne karereetan. 
Ne ka Babilunya ne iling dengan te buntuk ne egdekdek te intiru ne kalibutan, nareetan e wey warad geem. Ne nenaaldek e ka langun ne inged te neyitabu kandin. 
He Babilunya, imbaled ku sikeykew wey ware nu natagtaheyi ne migsahad ke bes e. Migsahad ka tenged su migsupak ke ma keddiey te Magbebaye. 
Inlukatan ku ka tahuanan te me panganiban ku, wey impalihawang kud ka me panganiban ne eggamiten ku eyew igpeula-ula ku ka langet ku. Tenged su sikeddiey se Amana ne Maresen ne Manama, due eggimuwen ku keykew, Babilunya. 
Linguti niyu ka Babilunya wey lusuri niyu. Panlukati niyu ka me lelapeng. Ne panlimura niyu ka nenaahew niyu ne me kasangkapan, iling te peglimud niyu te trigu. Pangimatayi niyud ka langun ne me matig-Babilunya, wey kene niyu samei minsan sabeka. 
Pangimatayi niyu ka langun ne sundalu rin. Mekeyid‑u-hid‑u ka keet-etawan te Babilunya su miggingume e ka timpu te peglegpad kandan.” 
Pammineha niyu ka me etew ne nenakapallahuy puun te Babilunya peendiye te Hirusalim wey migpangguhud te makaalat-halat ne pegsuli te Magbebaye ne Manama ta tenged te inggimu te matig-Babilunya diye te timplu rin. 
Ne migkahi ka Magbebaye ne Manama, “Palusuri niyud te me talagpane ka Babilunya. Ne palinguti niyu naa sika eyew ware egpakapallahuy, wey himuwa niyu diye te kandin ka inggimu rin diye te duma su migsukul sikandin keddiey te Magbebaye ne Manama te Israil. 
Purisu egkengammatey ka me kanakan din diye te me deralanen, wey egsahap ka langun ne sundalu rin te sika ne aldew. 
“He Babilunya, amana ka ne hambuhen. Sikeddiey ka Amana ne Maresen ne Manama ka egkuntere keykew, wey egginguma ka timpu ne eglegparan ku sikeykew. 
Egkareetan ka iya se hambuhen ne inged wey ware egbulig keykew egpasasindeg. Egsilaban ku ka me siyudad nu wey ka langun ne lungsud ne nakalingut keykew.” 
Ne migkahi pad man‑e ka Amana ne Maresen ne Magbebaye, “Inleig-leig ka keet-etawan te Israil wey Huda. Inderakep wey intamengan te mapahenget wey kene egpalihawangen. 
Piru maresen a se talagluwas kandan. Iyan ku ngaran ka Amana ne Maresen ne Magbebaye. Egpangabangan ku sikandan wey egpeyimelayen ku diye te Israil. Piru ka keet-etawan mule te Babilunya, ware keyimmelayan!” 
Ne migkahi pad man‑e ka Magbebaye ne Manama, “Egpangimatayan ka keet-etawan te Babilunya, ka me pangulu wey ka matagseb ne me etew kayi. 
Ne egpangimatayan degma ka kene ne mallehet ne me prupita diye, wey egkengeil-ilaan en iya ne me ungel sikandan. Egpangimatayan ka me sundalu diye wey egkengaaldek sikandan! 
Egpangimatayan degma ka me kudde wey egguhusen ka me karwahi! Egpangimatayan ka insuulan kayi ne me sundalu wey egpekeiling e sikandan te me malitan ne egkaliyasan! Ne eg-ahawen te me kuntere ka me karatuan kayi. 
Ne egpakasalerep te gulabung ka inged kayi wey egkengeetiyan ka me weyig su ka Babilunya inged te makaliyas-liyas ne me diyus-diyus ne nekeungel te keet-etawan. 
“Ne tenged due, eg-ugpaan e ka Babilunya te me mananap te disirtu wey me mahintalunan ne asu wey me manuk-manuk. Ne kenad e seini egkeugpaan te me etew te ware egtamanan. 
Ka egkeyitabu te Babilunya, egpekeiling te neyitabu te Suduma wey Gumura, wey te me lungsud ne nakalingut diye ne warad mig-ugpe. Sikeddiey se Magbebaye ne Manama ka miglalag kayi.” 
“Pitew kew! Eggingume e ka me sundalu ne egpuun te igkahibang ne balabahan. Ka maresen ne nasud ne masulug se me Hari, egpangandam e sikandan ka egpakiggira te Babilunya. 
Ingkubayan dan e ka me deldeg dan wey ka me piet dan. Mabbulut amana sikandan wey ware keyid‑u. Egpekeiling te dahat ne egbubunlud ka kahulub dan, wey andam e sikandan ne egpalungkesu te me kudde dan eyew egpakiggira te Babilunya. 
Ne nakarineg ka Hari te Babilunya meyitenged kayi wey naawaan e te keseg ka me belad din. Nalaggew sikandin wey naaldek wey nasakitan sikandin iling te malitan ne eglesutan. 
“Ne egtigkawen ku te eglusud ka Babilunya iling te liyun ne egpuun te puwalas ne marani te Weyig ne Hurdan ne egpanalukun te me karniru diye te panabtaban. Egdeldelen ku ka me matig-Babilunya wey egpepanguluwan ku sikandan te etew ne eg-alamen ku. Hentew naan de iya ka egpekeiling keddiey, wey hentew naan de iya ka eg-aku ne egsukul keddiey? Hentew naan de iya ka pangulu ne egkuntere keddiey? 
Purisu pammineg kew te implanu ku ne eggimuwen diye te me mahinged te Babilunya. Egpandakepen ka me anak dan wey egtamtamanan ku egdereeti ka tane dan tenged te inggimu ran. 
Egkaantag ka intiru ne kalibutan te pegdahegsal te Babilunya ne egkareetan, wey egkarineg te duma ne me nasud ka me kuleyian dan.”