Isikil.
4.
Ne migpabulus-bulus ka Manama ne migkahi keddi, “Etew, kuwa ka te tisa, wey itahu nu seini due te tangkaan nu. Ne ikulit nu naa kayi ka larawan te siyudad te Hirusalim. 
Ne ipahunsiling nu ne inlusuran kun ubag seini te me kuntere. Himuwi nu seini te alad wey panahui nu te intamundu ne tane ne egkabayaan peendiye te dibabew te matikang wey makepal ne alad ne batu, wey palinguti nu te me kampu, wey te me terusu ne igpamundul te alad. 
Ne kuwa ka te maluag ne putew, wey itahu nu seini isip alad te eletanan nu wey te siyudad. Ne tangke ka te siyudad ne ubag kun inlusuran nu seini. Palinneu sika para te me Israilita ne eglusuran iya sikandan te me kuntere dan. 
“Ne pegkeimpus due, hibat ka ne egkilid te igkahibang, palinneu sika ne imbaba nu ka sale te me Israilita. Egbabeen nu ka sale dan sumale te kasuluhan te me aldew te peggibat nu. 
Eg-antus ka taman te 390 ne aldew ne iyan ka kasuluhan te me leg‑un ne eglegparan ku sikandan. 
Ne pegkeimpus man‑e due, balikid kad e man‑e kilid te igkakawanan, palinneu sika ne imbaba nu degma ka sale te me matig-Huda. Eg-antus ka taman te hep‑at ne pulu (40) ne aldew ne iyan ka kasuluhan te me leg‑un ne eglegparan ku sikandan. 
“Ne tangke ka te Hirusalim ne ubag kun inlusuran. Ne lunsena nu naa ka belad te kumbale nu, wey ipalenged nu ka belad nu te Hirusalim wey panagne ka te mareet meyitenged te sika ne siyudad. 
Ne egbakuen ku sikeykew eyew kene ka egpakaweil-weil taman te egkeimpusan nu te egpahunsiling ka peglusud te Hirusalim. 
“Ne panguwa ka te trigu, sibada, behas te balatung, dawa, wey te duma pad ne klasi te trigu. Ne meg-amuta nu naa sika langun te sabeka ne tahuanan wey himuwa nu ne paan. Sika keena nu taman te 390 ne aldew te peggibat nu ne egkilid te igkahibang. 
Kasabeka ke re keen tagse aldew, wey keilangan ne igkeep‑at de ne baad (¼) te senge-kilu ne paan ka egkeenen nu. 
Ne keilangan ne liware de te litru ka weyig ne eg-inumen nu tagse aldew. 
Ne hilutu ka te paan tagse aldew, wey iyan nu itemeg ka nahangu ne tei te etew taheed te egmanetengteng ka me etew. Ne keena nu ka paan ne iling te migkeen ka te turta ne sibada.” 
Ne migpabulus ka Manama ne migkahi, “Iling due ka egkeyitabu te me Israilita diye te me nasud te keet-etawan ne egpandakep kandan, egmangeen sikandan te egkakeen ne in-isip ne malindit.” 
Piru migkahi a, “He Magbebaye ne Manama, ware de due neyimu ku ne nakamalindit te pegkeetew ku puun pad te pegkabate ku taman kuntee. Ware e re due nakakeen te mananap ne migpatey re due wey ke inggimatayan naa te lein ne mananap. Ware e re due degma nakakeen te mananap ne in-isip ne malindit.” 
Ne migtabak ka Magbebaye, “Ke sikan ma, iyan nu naan de itemeg ka nahangu ne tei te baka, kenad e ne tei te etew.” 
Ne migpabulus ka Magbebaye ne migkahi, “Etew, egpabitilan ku ka Hirusalim. Ne egsekeren naan de te me mahinged ka egkeenen wey eg-inumen dan. Egmangeen wey egmanginum sikandan ne egkengaaldek wey egkengallaggew re due 
su deisek man e ka egkakeen wey weyig. Egmasilsil-apey sikandan ne egkengallaggew re due. Egkengahan-ganaran sikandan egkammatey tenged te me sale dan.”