Isikil.
8.
Te igkalalimma ne aldew, te igkeen‑em ne bulan, te igkeen‑em e ne leg‑un te pegkarakepi ney, migpinnuu a diye te baley ku duma te me igbuyag te Huda. Ne sahuhune ne in-umaan a te Panisingan te Magbebaye ne Manama 
wey taheed te egpipitew a, nakakita a te egpekeiling te etew. Ne egpekeiling te burunsi ne eg-ilak-ilak ka puun te liwaraan din paribabew, wey egpekeiling te egkalegleg ne hapuy ka pariralem. 
Ne ingketeng din ka iling te belad din, wey inggen-genan din ka bulbul ku. Diye te impakita te Manama, inggenat a te panisingan diye te aw-awangan, wey in-uyan a diye te Hirusalim. Ne in-uyan a diye te igkahibang ne balabahan ne gumawan te igkarangeb ne lama te timplu. Ne diye iya ka diyus-diyus ne igkalanglangeti te Manama. 
Ne nakita ku diye ka katelesan te Magbebaye te Israil iling te nakita ku diye te napu. 
Ne ingkahiyan a te Manama, “Etew, tengteng ka diye te igkahibang ne balabahan.” Purisu migtengteng a diye, wey nakita ku diye te dangdang te gumawan ne marani te altar ka diyus-diyus ne igkalanglangeti te Manama. 
Ne migkahi ka Manama keddi, “Etew, nakita nu naa ka inggimu te me Israilita? Nakita nu naa ka subla ne malindit ne inggimu ran kayi eyew te pegdeldel keddi puun te timplu ku? Piru duen pad iya man‑e egkakita nu ne subla pad ne mallindit ne hinimuwan dan.” 
Ne in-uyan a nikandin diye te gumawan te lama te timplu, wey te pegtengteng ku, iyan kud e se lungag diye te matikang wey makepal ne alad ne batu. 
Ne ingkahiyan a nikandin, “Etew, hiluahi nu ka lungag te matikang wey makepal ne batu ne alad te siyudad.” Purisu inggiluahan ku ka lungag, wey te pegtengteng ku, iyan kud se gumawan. 
Ne ingkahiyan ad e man‑e nikandin, “Lasud ka wey tengtengi nu ka subla ne mallindit ne hinimuwan dan due.” 
Purisu miglasud a, wey nakita ku ne neempet ka alad te me larawan te nakalkalasi ne mananap ne egdul‑ug, lagkes ka me mananap ne in-isip ne malindit. Ne nakita ku degma diye ka langun ne diyus-diyus te me Israilita. 
Ne nakita ku ne migmanasindeg diye te tangkaan te me diyus-diyus ka pitu ne pulu (70) ne me igbuyag te me Israilita, dume en iya dutu si Hasaniyas ne anak ni Sapan. Ne ka tagse sabeka kandan, miggen-gen te tutunganan te insinsu. Ne migparibabew ka meemut-hemut naan de iya ne ebel te insinsu. 
Ne mig-inse sikandin keddi, “Etew, nakita nu naa ka heles de ne inggimu te me igbuyag te me Israilita? Diye ka tagse sabeka kandan te sinabeng te diyus-diyus din. Ne migkahi sikandan te in-engkeran ku kun e ka nasud dan, wey kene ku kun e sikandan egkiteen.” 
Ne migpabulus-bulus pad iya man‑e sikandin ka migkahi, “Duen pad iya man‑e egkakita nu ne subla pad due ne mallindit ne hinimuwan dan.” 
Ne in-uyan a nikandin diye te igkahibang ne balabahan ne gumawan te timplu. Ne nakita ku diye ka me malitan ne migmaminnuu ka egmaninehew tenged te pegpatey te diyus-diyus ne si Tamus. 
Ne ingkahiyan a nikandin, “Etew, nakita nu naa sika? Duen pad iya man‑e egkakita nu ne subla pad due ne mallindit ne hinimuwan dan.” 
Ne in-uyan a nikandin diye te igkarangeb ne lama te timplu, wey nakita ku diye ka daruwa ne pulu wey lalimma (25) ne lukes. Migsasindeg sikandan diye te elat-elat te likansu wey te altar. Mig-inniyug sikandan te timplu wey diye migtangke te igsile wey mig-unduk sikandan eyew egsimba te aldew. 
Ne ingkahiyan a te Magbebaye, “Etew, nakita nu naa sika? Suble e perem ne malindit sika se hinimuwan te keet-etawan te Huda, piru in-empet dan pad iya man‑e te mareet ne hinimuwan ka intiru ne nasud dan, wey impeyibelu a amana nikandan. Tengtengi nu ke immenu a nikandan te egbaley-baley. 
Purisu igpaneem-neem ku kandan ka langet ku te ware pegkeyid‑u wey kenad egkabalbalawan ka suman-suman ku te peglegpad kaniyu. Ne minsan pad egpanaman-taman sikandan egpanguleyi ka egpangananey keddi, kene ku sikandan egpamminehen.”