Isikil.
10.
Te pegtengteng ku diye te dibdibabew te atep‑atep ne diye te dibdibabew te ulu te me kirubin, iyan kud e se egpekeiling te trunu ne sapiru. 
Ne ingkahiyan te Manama ka etew ne migkukumbale te linu, “Hendutun ka te taliware te egkatileng ne me liggid ne diddiralem te me kirubin. Ne akup ka te baha dutu wey isawed nu seini te siyudad.” Ne intetengtengan ku ka etew ne migseled diye te taliware te egkatileng ne liggid. 
Te pegseled te etew, migmanasindeg ka me kirubin diye te igkakawanan ne balabahan te timplu, wey napenu te gapun ka igkarangeb ne lama te timplu. 
Ne mig-awe ka katelesan te Magbebaye ne Manama puun te me kirubin, wey miggalin diye te gumawan te timplu. Napenu te gapun ka timplu, wey nalayahan te katelesan te Magbebaye ka diye te lama. 
Ne egkarineg taman diye te an-anayan ne lama te timplu ka dahing te me pakpak te me kirubin, iling te laheng te Amana ne Maresen ne Manama. 
Te pegsuhu te Magbebaye te etew ne egpakuen te baha puun te taliware te egkatileng ne me liggid diye te diddiralem te me kirubin, miggendiyad sikandin wey migsasindeg diye te dangdang te sabeka te me liggid. 
Ne ka sabeka te me kirubin, migpurut te baha ne diye te taliware dan, wey imbehey rin e seeye te etew ne migsaluub te kumbale ne linu. Ne intinawe seeye te etew, wey miggipanew e sikandin. 
Ne ka tagse kirubin, due belad ne hendue te belad te etew, wey naakeban seeye te me pakpak dan. 
Ne taheed te egtetengteng a, nakita ku degma ne due hep‑at ne liggid diye te dangdang te tagse sabeka te hep‑at ne kirubin. Migmangilak-ilak ka me liggid iling te mahal ne batu ne egngaranan te kristal. 
Nenekeg-iling ka me liggid, wey ka tagse sabeka, due lein ne liggid ne impasumbalak diye te taliware. 
Ne egpekeendiye te minsan hendei ka seeye ne me liggid duma te me kirubin ne kenad keilangan ne egbaliyung pad. Ne minsan hendei sikandan nakatangke ne egpekeendiye iya sikandan ne kenad egbaliyung. 
Ne neempet te mata ka intiru ne lawa te me kirubin, ka peka, me belad, wey me pakpak dan. Ne iling ded ka me liggid, neempet degma te mata. 
Ne meyitenged te me liggid, narineg ku ne ingngaranan seeye te, “Ka egkatileng ne me liggid.” 
Ne tighep‑at se ulaula te tagse sabeka te seeye ne me kirubin: ka hun‑a, ulaula te kirubin, ka igkarangeb, ulaula te etew, ka igkatelu, ulaula te liyun, wey ka igkeep‑at, ulaula te agila. 
Sikandan ka me hinimuwan ne eggeheyinawa ne nakita ku diye te ilis te Weyig ne Kibar. Ne nataman, migparibabew e ka me kirubin. 
Ne minsan hendei egpatangke ka me kirubin, tapik de degma ka me liggid. Ke egbekalen dan ka me pakpak dan eyew egparibabew puun te tane, egparibabew degma ka me liggid. 
Purisu te tagse timpu ne eggipanew ka me hinimuwan wey ke eglene naa wey ke eglayang, egtapik de iya degma ka me liggid, su ka panisingan ma te me hinimuwan ne eggeheyinawa ka egpaweil te me liggid. 
Ne mig-awe puun te gumawan te timplu ka katelesan te Magbebaye, wey miggalin e diye te ampew te me kirubin. 
Ne taheed te migtetengteng a, imbekal te me kirubin ka me pakpak dan wey migparibabew e puun te tane wey tapik de ka me liggid. Ne migsanggel sikandan diye te dapit te igsile ne gumawan te timplu, wey diye te ampew ran ka katelesan te Magbebaye te Israil. 
Seeye ka me hinimuwan ne eggeheyinawa ne nakita ku diye te diddiralem te Manama te Israil, diye te ilis te Weyig ne Kibar. Ne nanengnengan ku ne sikandan iya ka me kirubin. 
Ne hep‑at se me ulaula te tagse sabeka kandan, wey hep‑at degma se pakpak. Ne hendue te due belad te etew ne naakeban te me pakpak dan. 
Egpekeiling ka me ulaula ran te me ulaula te me hinimuwan ne eggeheyinawa ne nakita ku diye te ilis te Weyig ne Kibar. Ne eggipanew ka tagse sabeka kandan ne kene egsuwey-suwey.