Isikil.
14.
Sabeka ne aldew, migparani keddi ka duma ne me igbuyag te me Israilita. Migpanginginse sikandan meyitenged te pegbuut te Magbebaye ne Manama. 
Ne impanengneng a te Magbebaye, 
“Etew, amana ran geyinawei ka me diyus-diyus dan ne iyan nekeyinalig kandan te pegpakasale. Purisu mania te egtuhutan ku sikandan ne eg-inse keddi? 
“Kahii nu naa sikandan te migkahi a se Magbebaye: Ka minsan hentew ne Israilita ne miggeyinawa te diyus-diyus ne iyan nekeyinalig kandin te pegpakasale, wey egpanginginse sikandin te prupita, sikeddi mismu ka egtabak kandin sumale te kasulug te diyus-diyus din. 
Eggimuwen ku sika eyew egkaangken ku red ka geyinawa te keet-etawan te Israil ne nakapariyu keddi tenged te me diyus-diyus dan.” 
“Purisu kahii nu ka keet-etawan te Israil te migkahi a se Magbebaye, ‘Inniyug kew e te me sale niyu, wey engkeri niyud ka me diyus-diyus niyu, wey ka langun ne mallindit ne hinimuwan niyu.’ 
“Ka minsan hentew ne Israilita wey ke lapu naa ne mig-engked keddi wey migsimba te me diyus-diyus ne iyan nekeyinalig kandin te pegpakasale, wey migpanginginse keddi pinaahi te prupita, sikeddi mismu ka egtabak kandin. 
Egkuntereen ku sikandin, wey eggimuwen ku sikandin ne paney-paney te langun ne etew wey eglelemetan dan sikandin. Ne egdeldelen kud e sikandin puun te keet-etawan ku. Ne egpakanengneng kew e ne sikeddi ka Magbebaye. 
“Piru ke egpanagne te ubat ka sika ne prupita para te sika ne etew, sikeddi naa ka migtuhut kandin ne egpanagne te ubat. Ne eglegparan ku egpatamtamani ka sika ne prupita wey egdeldelen ku puun te keet-etawan ku ne me Israilita. 
Egparusaan ku te nekeg-iling ne parusa ka prupita wey ka etew ne migpanginginse kandin. 
Eggimuwen ku sika eyew kene eg-engked keddi ka me Israilita, wey eyew kene dan eglinditan ka pegkeetew ran pinaahi te pegpakasale. Ne egkeyimu e sikandan ne keet-etawan ku wey egkeyimu ad e ne Manama ran. Sikeddi se Magbebaye ka miglalag kayi.” 
Ne impanengneng ad man‑e te Magbebaye, 
“Etew, emun ke egpakasale keddi ka langun ne mahinged te sabeka ne nasud tenged te kene ne matinumanen keddi, eglegparan ku iya sikandan egpatamtamani, wey eg-aween ku ka egpuunan te egkakeen dan. Ne egpabitilan ku sikandan eyew egkammatey sikandan duma te me ayam dan. 
Minsan pad ke mig-ugpe duma kandan si Nuwi, si Danyil, wey si Hub, sikandan de iya degma se tatelu ka egkaluwas su me matareng ma mule sikandan. Sikeddi se Magbebaye ka miglalag kayi. 
“Ne panunggilingan ke egpeuyanan ku te mabbulut ne mananap ka nasud dan eyew egpangimatayan sikandan, egkeyimu e ka inged dan ne mammara ne inged ne ware eg-ugpe, wey warad me etew ne egmakabaye diye tenged te me mananap. 
Ne minsan pad ke mig-ugpe duma kandan si Nuwi, si Danyil, wey si Hub, sikeddi se Magbebaye ne manekal te ware egtamanan, egpahunlibet a ne kene iya sikandan egkaluwas minsan ka me anak dan, su sikandan de iya se tatelu ka egkaluwas. Ne egkeyimu e ka inged dan ne mammara ne inged ne ware eg-ugpe. Sikeddi se Magbebaye ka miglalag kayi. 
“Ne panunggilingan ke egpeuyanan ku te gira ka nasud dan eyew egkeyimatayan sikandan wey ka me ayam dan, 
minsan pad ke mig-ugpe duma kandan si Nuwi, si Danyil, wey si Hub, sikeddi se Magbebaye ne ware kapatayan ka egkahi te kene iya sikandan egkaluwas minsan ka me anak dan, su sikandan de iya se tatelu ka egkaluwas. Sikeddi se Magbebaye ka miglalag kayi. 
“Ne panunggilingan ke egpeuyanan ku te dalu ka nasud dan wey egpasalerepen kud e sikandan te mangune-kune ne langet ku eyew egkammatey sikandan langun, wey ka me ayam dan, 
minsan pad ke mig-ugpe duma kandan si Nuwi, si Danyil, wey si Hub, sikeddi se Magbebaye ne ware kapatayan ka egkahi te kene iya sikandan egkaluwas minsan ka me anak dan su sikandan de iya se tatelu ka egkaluwas su me matareng ma sikandan. Sikeddi se Magbebaye ka miglalag kayi.” 
Seini iya ka ingkahi te Magbebaye, “Mekeyid‑u-hid‑u ka Hirusalim ke egpeuyanan ku seini te hep‑at ne mabbehat ne parusa ne iyan ka gira, bitil, mabbulut ne mananap, wey dalu ne egpakapatey te me mahinged diye wey te me ayam dan. 
Ke duen ma egkasame kandan, egpanguyanen sikandan kayi te Babilunya, wey igpalemung kaniyu isip me dinakep. Ke egkakita nu ka mareet ne hinimuwan dan, egkasabut nu ne eleg ka pegparusa ku te Hirusalim. 
Ne emun ke egkakita nud ka me hinimuwan dan, egkasabut nud ne duen bes egpuunan ke mania te inggimu ku sika diye te Hirusalim. Sikeddi se Magbebaye ka miglalag kayi.”