Isikil.
16.
Ne impanengneng ad man‑e te Magbebaye ne Manama, 
“Etew, ipanengneng nu te Hirusalim ka malindit ne hinimuwan din. 
Kahii nu sikandin te migkahi a se Magbebaye: Diye ka migpuun te tane te me Kanaanen su diye ke ma miglesut. Amurihanen ka amey nu wey Hitihanen ka iney nu. 
Ne te timpu ne miglesut ka, ware migtempug te pused nu, ware migdihus keykew, ware migbaluhu te asin, wey ware migbukus keykew te habet. 
Warad iya sabeka ne neyid‑u keykew ne miggimu minsan te sabeka due diye te keykew. Nasi ke re iya ideregpak diye te kamet, tenged su igkekalindit ke ma te timpu te peglesut nu. 
“Te peglihad ku te marani nu, nakita ku sikeykew ne narihus-dihus te langesa nu. Ne ingkahiyan ku sikeykew te egkeuyag ka iya. 
Ne impatulin ku sikeykew iling te pinamula diye te kamet. Ne migdakel kad, migmalangkew, wey migmengebay kad e. Nateyul e ka me susu nu, wey migmalayat e ka bulbul nu, piru migpalawas ke re due. 
“Te peglihad kud man‑e te marani nu, nakita ku sikeykew ne eleg kad e ne eg-asaween. Purisu imbunbunan ku te hinabel ku ka lawa nu ne migpalawas. Ne migpanaad a ne eggeyinawaan ku sikeykew, wey miggimu a te kasabutan ne eg-asaween ku sikeykew, wey naangken kud sikeykew. Sikeddi se Magbebaye ka miglalag kayi. 
“Ne indihus ku sikeykew wey inlu‑luan ku ka langesa nu, wey imbaluhuwan ku sikeykew te lana. 
Ne impakukumbale ku sikeykew te indayan-dayanan wey impasesandal ku sikeykew te inggimu puun te laplap te mananap. Impakukumbale ku sikeykew te mahal ne kumbale wey imbukusan ku sikeykew te mahal ne hinabel. 
Ne impanaluuban ku sikeykew te me alahas ne iling: binukul, balieg, 
sising te irung, ariyus, wey ingkurunaan ku sikeykew te tetelesi. 
Impatelesan ku sikeykew te me pelata wey me bulawan. Ne inggimu puun te mahal ne hinabel ka kumbale nu wey impamalungpungan ay-ayari. Ne ka me pegkeen nu, egpuun te amana ne memeupiya ne klasi te harina, teneb, wey mentika te ulibu. Tetelesi ke naan de iya ne egtengtengan, wey neyimu kad e ne rayna. 
Ne migmabantug kad e te langun ne nasud tenged te subla ne kateles ne imbehey ku keykew. Sikeddi se Magbebaye ka miglalag kayi. 
“Piru migsalig kad e te kateles nu wey kabantug, wey inggamit nud seini te pegpamelegye te lawa nu. Ne migpanginggat kad e te minsan hentew ne lukes ne eglihad. 
Ne inggamit nud ka duma ne kumbale nu eyew igdayan-dayan te me matikang ne inged ne simbaanan nu, ne iyan ka inged ne egpampamelegyaan nu te lawa nu. Kenad iya perem eleg ne egkeyitabu sika. 
Ne inggamit nu degma ka mateles ne me alahas ne bulawan wey pelata ne imbehey ku keykew, eyew eggimuwen nu ne me larawan te me diyus-diyus ne lukes, eyew egsimbeen nu. Egpekeiling de te migpalibug-libug ka. 
Ne ingkuwa nu ka impamalungpungan ne me kumbale nu, wey immakumbale nu te me diyus-diyus, wey inhalad nu kandan ka lana wey insinsu ku. 
Inhalad nu degma kandan ka imbehey ku keykew ne me pegkeen ne egpuun te amana ne memeupiya ne klasi te harina, teneb, wey mentika te ulibu. Inhalad nu sika kandan isip meemut ne halad. Sikeddi se Magbebaye ka miglalag kayi. 
“Ne ingkuwa nu degma ka me anak nu ne me lukes wey me malitan ne naanak nu keddi, wey inhalad nu sikandan te me diyus-diyus isip pegkeen. Kene naan pad ne eleg ka pegpamelegye nu te lawa nu? 
Impangimatayan nu ka me anak ku wey intutung nu isip igpanubad diye te me diyus-diyus. 
Ne tenged te mallindit ne hinimuwan nu, wey te pegpamelegye nu te lawa nu, nalingawan nud ka pegtanggu ku dengan keykew te bate ke pad ne migpalawas, wey narihus-dihus te langesa nu.” 
“Ne migkahi a se Magbebaye: Mekeyid‑u-hid‑u iya ka egkeyitabu keykew Hirusalim. Timul pad te dereeti ne hinimuwan nu, 
migpangimu ke pad iya man‑e te me sinabeng ne egsimbaan nu te me diyus-diyus nu, wey migpamelegye ka te lawa nu diye te tagse dalan. 
Makalelanget ka hinimuwan nu, sikan naa ka nalinditan ka kateles nu, wey impanginalig nu ka pegkeetew nu te minsan hentew e ne lukes ne eglihad diye te tagse bebalakan te me dalan. Nasublaan e ka pegkabalinggeren nu. 
Migpeyilabet ka te me matig-Ihiptu ne me balinggeren iya degma. Nasublaan e ka pegkabalinggeren nu purisu nalanglangetan a iya keykew. 
“Purisu inlegparan ku sikeykew patamtamani wey insalinan ku ka baad nu ne panalangin ku. Imbehey ku sikeykew diye te me halamlamen ne me kuntere nu ne iyan ka me Pilistihanen. Ne minsan degma sikandan, nenatanengan te malindit ne hinimuwan nu. 
“Migpeyilabet ka degma te me matig-Asirya su ware ke man pad neurali. Piru minsan pad due, ware ke pad iya man‑e neurali kandan. 
Natimulan pad iya man‑e ka pegkabalinggeren nu su migpeyilabet ke pad iya man‑e te me matig-Babilunya ne me nigusyanti. Piru ware ke pad iya man‑e neurali kandan.” 
Ne migkahi ka Magbebaye, “Nalanglangetan a iya mule keykew su neyimu nu sika langun. Egpekeiling ka te malitan ne ware hilew ne migpamelegye te lawa rin. 
Migpangimu ka te sinabeng ne egsimbaan nu te me diyus-diyus nu, wey migpamelegye ka te lawa nu diye te tagse bebalakan te deralanen. Subla ke pad ne mareet du te duma ne malitan ne migpamelegye te lawa ran, su ware kad ma migpabayad te miggilabet keykew. 
Egpekeiling ka te asawa ne migpalibug-libug te me mahaliyug. Igkeupii nu pad ne eggulid te lein ne lukes du te iglukes nu mismu. 
Egpabayad mule ka duma ne malitan ne migpamelegye te lawa ran. Piru sikeykew mule ka egdasag te me lukes eyew egkeyinalig ne egparani puun te minsan hendei eyew eggilabet keykew. 
Senge-klasi ka te duma ne malitan ne migpamelegye te lawa ran. Su ware mule migginalig keykew ne egpamelegye te lawa. Kene ka egpabayad su sikeykew mule ka egbayad.” 
“Purisu, malitan ne egpamelegye te lawa, pammineha nu seini se eglalahen ku. 
“Migkahi a se Magbebaye: Miglelebas ka, wey migpeyilabet ka te me lukes su balinggeren ke ma. Insimba nu ka makalelanget ne me diyus-diyus nu, wey impangimatayan nu ka me anak nu eyew igpanubad kandan. 
“Ne tenged due, eglibulungen ku igpalingut keykew ka langun ne inggeyinawaan nu—seeye se ingkeupii nu wey seeye se ingkengeepes nu. Eglibulungen ku sikandan eyew egpakigkuntere keykew. Ne eglebasan ku sikeykew diye te tangkaan dan, eyew egkamelmelehan dan ka lawa nu. 
Eglegparan ku sikeykew tenged te pegpalibug-libug nu, wey tenged te pegpangimatey nu. Igpaneem-neem ku keykew ka langet ku wey ka pegkatalikuren ku. 
Igbehey ku sikeykew diye te me lukes ne inggeyinawaan nu. Ne egpangguhusen dan ka me sinabeng ne egsimbaan nu te me diyus-diyus nu, wey egpamelegyaan nu te lawa nu. Ne eglebasan ka nikandan, wey egpanguen dan ka me mateles ne me palamuti nu, wey eg-engkeran ka nikandan se migpalawas. 
“Ne egduruma sikandan te me etew ne egkuntere keykew. Egbebatuwen ka nikandan wey egpanadtaren te kampilan dan. 
Ne egpanilaban dan ka me baley nu, wey eglegparan ka nikandan diye te tangkaan te masulug ne malitan. Eg-epusen kud ka pegkabalinggeren nu, eyew kene kad e egpakapamayad te me lukes ne inggeyinawaan nu. 
Ne egkabewu-bewu e ka langet ku keykew, wey egkaawe e ka pegpangalikud ku. Egkabewu-bewu ad e wey kena ad e egkabelu. 
“Inlingawan nu ke immenu ku sikeykew te egtanggu dengan te bate ke pad. Nasi a nikeykew peyibelua tenged te mareet ne hinimuwan nu. Purisu eglegparan ku sikeykew. Ka pegkamareet nu, nakatimul te mallindit ne hinimuwan nu. Sikeddi se Magbebaye ka miglalag kayi.” 
“Ka langun ne etew ne eglalag te me lalahen, egkahi keykew, ‘Ke nekey ka iney, iling ded ka anak ne malitan.’ 
Iling ka te iney nu ne migsamsamili iya te iglukes din, wey te me anak din. Iling ka man‑e te hari nu ne me malitan ne migmanamsamili iya te me iglukes dan, wey te me anak dan. Hitihanen ka iney nu, wey Amurihanen ka amey nu. 
“Ne ka kakey nu ne malitan, iyan ka Samarya, ne diye te igkahibang ne balabahan, duma te me anak din ne me malitan. Ne ka hari nu ne malitan, iyan ka Suduma, ne diye te igkakawanan ne balabahan, duma te me anak din ne me malitan. 
Mig-ikul ka te mallindit ne hinimuwan dan, wey te malepet de ne timpu, migsubla ke pad ne mareet kandan. 
“Sikeddi se Magbebaye ne egkeuyag te ware egtamanan, egpahunlibet a keykew te malehet: ka kakey nu ne malitan ne iyan ka Suduma wey ka me anak din ne me malitan, ware de nekeyimu te iling kareet te neyimu nu wey neyimu te me anak nu ne me malitan. 
Ka sale te kakey nu ne Suduma wey te me anak din ne me malitan, iyan ka pegkaambuhen. Dakel se egkakeen dan, meupiya se peg-ugpe wey ware igkabantali piru ware migbulig te egkengaayu-ayu. 
Miggimu sikandan te makalelanget kayi te tangkaan ku, tenged te pegkaambuhen dan. Purisu inlegparan ku sikandan te pegkakita ku te hinimuwan dan. 
“Ne minsan ka Samarya, ware ma nekeyimu minsan te katenge de te me sale nu. Subla ne dakel ka mallindit ne neyimu nu du te hari nu ne me malitan. Purisu matmatareng pad sikandan keykew su masmasulug ma ka neyimu nu ne mallindit. 
Ne kuntee, antusa nu ka hilew su impapitew nu ma ne subla ke pad ne mareet du te me hari nu ne me malitan. Dawata nu wey antusa nu ka hilew nu su sikeykew ma ka migpapitew ne matmatareng pad sikandan keykew. 
“Piru egginguma ka timpu ne igpalibed ku te Suduma wey Samarya wey te me lungsud dan ka katubung dan. Ne igpalibed ku degma Hirusalim ka me karatuan nu, 
eyew egkeyilawan ka tenged te langun ne inggimu nu ne iyan nakapapitew ne memeupiya pad sikandan keykew. 
Egpakalibed iya ka katubung te me atebey nu ne iyan ka Suduma, Samarya, wey te me anak dan ne me malitan. Ne iling ke red degma wey ka me anak nu ne me malitan. 
Indali-dian nu pad dengan ka Suduma tenged te pegkaambuhen nu, 
wey te ware pad nakita ka mareet ne hinimuwan nu. Piru kuntee nekeiling kad e kandin, inderali-dian kad e degma te me matig-Idum, me matig-Pilistiya, wey te duma pad ne inged ne nakalingut keykew. 
Mig-antus kad e te legpad tenged te pegkabalinggeren nu, wey te mallindit ne hinimuwan nu. Sikeddi se Magbebaye ka miglalag kayi.” 
Ne migpabulus-bulus ka Magbebaye ne migkahi, “Eglegparan ku sikeykew te eleg te hinimuwan nu, su insamsamilian nu ma ka kasabutan ta wey insupak nu ka saad nu ne egtumanen nu seini. 
Piru egtumanen ku red iya man‑e ka kasabutan ne inggimu ku duma keykew te bate ke pad. Eggimu a duma keykew te kasabutan ne ware egtamanan. 
Ne egkasuman-suman nu ka me hinimuwan nu dengan, wey egkeyilew ka te pegkeetew nu, ne wey naan pa iya ke eggimuwen kud ne iling e te anak nu ne me malitan ka me atebey nu ne iyan ka Suduma wey Samarya, minsan ke kene seini ne apil te kasabutan ku keykew. 
Eglig‑enen ku ka kasabutan ku duma keykew, wey egpakanengneng kad e ne sikeddi ka Magbebaye. 
Ne ke egpasayluwen kud e ka langun ne sale nu, egkasuman-suman nu ka me sale nu. Ne kene kad e egpakalalag ka egkeyilew-hilew tenged te neneyimu nu. Sikeddi se Magbebaye ka miglalag kayi.”