Isikil.
17.
Ne impanengneng ad man‑e te Magbebaye ne Manama, 
“Etew, ihuhud nu seini ne panunggilingan diye te me Israilita. 
Kahii nu sikandan te migkahi a se Magbebaye, ‘Due dakel ne agila ne miglayang peendiye te Libanun. Maluag ka me pakpak din, wey makepal ka me bulbul rin ne nakalkalasi se batek. Ne miglatun sikandin diye te uud te kayu ne sidar. 
Ne inggepu din ka mangnguwed pad ne sugpang diye te uud. Ne in-uyan din e diye te siyudad te me nigusyanti, wey impamula rin diye. 
Ne migkuwa man‑e sikandin te beni puun te tane te Israil, wey impamula rin diye te malambeg ne tane ne ilis te weyig, wey mahaan de seeye migtubu. 
Migtubu seeye wey neyimu ne pinamula ne egdul‑ug. Migpanulin ka me sugpang dutu pariralem peendiye te agila wey mig-ugseb te tane ka me dalid. Neyimu seeye ne paras wey migpanaman migsusugpang wey migmalapung. 
“‘Piru due lein ne dakel ne agila ne miglepew. Maluag degma ka me pakpak dutu wey me makepal degma se me bulbul. Ne ka me dalid wey me sugpang te seeye ne paras, migtulin peendiye degma te seeye ne agila eyew egkaweyihan te agila, 
minsan pad ke ingkapamule e seeye diye te meupiya ne tane ne diye te ilis te dakel ne weyig, eyew egmanusugpang wey egpamehas, wey egmateles ne pinamula.’ 
“Ne eg-insa a se Magbebaye, ‘Egpakapabulus-bulus naan pad seini egtubu? Kene! Egbaruten din seini, wey egpanempuhen din ka me sugpang, wey egbalaharen din ne egkahangu. Ne kenad egkeilangan te makeseg ne etew wey ke masulug naa ka egbarut te sika ne pinamula. 
Ne minsan igpamula red sika diye te lein ne inged, kenad iya egtubu. Egkalanes en iya sika ke egkasuhat te kalamag puun te igsile. Egkalanes en iya sika due te intubuan din.’” 
Ne impanengneng a te Magbebaye, 
“Panginsei nu ka masinupaken ne keet-etawan ke nakanengneng naa sikandan te igpasabut te seini ne panunggilingan. Kahii nu sikandan te seini ka igpasabut due: Miggendiye te Hirusalim ka Hari te Babilunya, wey indakep din ka Hari diye duma te me upisyal, wey impanguyan din e diye te Babilunya. 
Ne mig-alam sikandin te sabeka te me kabuhalan te Hari te Huda. Ne miggimu sikandin te kasabutan duma te in-alam din, wey impepanaad din ne egpamakey kandin. Impandakep din degma ka me igbuyag te Huda 
eyew kenad e egmalig‑en ka sika ne migharian, wey kenad e egpakasukul kandin. Egpariralem naan de wey egpabulus-bulus egtuman te kasabutan din. 
Piru migsukul te Hari te Babilunya ka in-alam din ne sabeka te me kabuhalan te Hari te Huda. Migsuhu sikandin te me etew peendiye te Ihiptu eyew te pegbuyu te me kudde wey te pegpabulig te susuluhi ne sundalu. Piru kene sikandin eglampus, wey kene egpakaalihu te legpad kandin tenged te pegsupak din te kasabutan te Hari te Babilunya. 
Sikeddi se Magbebaye ne Manama ne egkeuyag te ware egtamanan, ne iyan miggimu kandin ne Hari, igpahunlibet ku ne egpatey iya sikandin diye te Babilunya su insupak din ma ka kasabutan dan te Hari te Babilunya. 
Kene egpakabulig kandin te pegpakiggira ka Hari te Ihiptu duma te maddesen wey susuluhi ne sundalu, ke eglusud e ka me matig-Babilunya ne egpangimatey te masulug ne etew. 
Kene sikandin egpakaalihu su insupak din ma ka kasabutan ne impanaaran din ne egtumanen din iya. 
Purisu sikeddi se Magbebaye ne ware kapatayan, igsaad ku ne eglegparan ku iya sikandin, su insupak din ma ka kasabutan ku ne impanaaran din pinaahi te ngaran ku. 
Egsaklahen ku sikandin iling te mananap wey egsahad e sikandin kayi. Ne eg-uyanen ku sikandin diye te Babilunya wey eggukuman ku sikandin diye tenged te peg-akal rin keddi. 
Ne ka langun te sundalu rin ne egpamallahuy, egpatey red iya, wey ka egkasame, egmemekegsuwey-suwey te minsan hendei. Ne egpakanengneng kew e ne sikeddi se Magbebaye ka miglalag kayi.” 
Ne migpabulus-bulus ka Magbebaye ne migkahi, “Eggepu a te mangnguwed pad ne sugpang diye te uud te kayu ne sidar, wey igpamula ku seini diye te puntul te titikangi ne bubungan te Israil. 
Egsusugpang seini wey egbebehas, wey egkeyimu ne mateles ne sidar. Ne egmanesalag diye ka langun ne klasi te me bayaku, wey egmanlatun diye te me sugpang. 
Ne ka langun ne kayu diye te kamet, egpakanengneng ne sikeddi se Magbebaye, ka migpanempug te me mallayat ne kayu, wey migpatulin te mallepet ne kayu. Sikeddi degma ka miggihangu te mallapung ne kayu, wey sikeddi degma ka mig-uyag te nenallanes ne me kayu. Sikeddi se Magbebaye, igsaad ku ne egtumanen ku iya seini.”