Isikil.
18.
Ne migpanengneng e man‑e keddi ka Magbebaye ne Manama, 
“Nekey‑a ka igpasabut niyu te pegkahi niyu te seini ne lalahen meyitenged te Israil ne eggenendue, ‘Migkeen te matahimtim ne behas te paras ka me amey, piru nangingilu mule ka me anak’? 
“Ne sikeddi se Magbebaye ne manekal te ware egtamanan egkahi a: Kene niyud abayi te eglalag ka sika ne lalahen diye te Israil. 
Sikeddi ka kamuney te langun ne umul—ka umul te amey wey iney, wey te me anak dan. Ne ka makasesale ne etew iyan de egpatey.” 
“Ne panunggilingan ke due matareng ne etew ne eggimu ke nekey ka eleg wey nekeikul te me balaud. 
Kene sikandin egkeen te me pegkeen ne inhalad diye te me diyus-diyus diye te bubungan, wey kene sikandin egsimba te me diyus-diyus te Israil. Kene sikandin egpanlibug, wey kene eggilabet te malitan ne eglangeseen. 
Kene sikandin egleig-leig te minsan hentew, ke kene, ig-uli din mule ka gerentiya te etew ne nekeutang kandin. Kene sikandin egpanakew, egmakeenen din ka egmanggutasan, wey egpamehayan din te me kumbale ka ware me kumbale. 
Egpeutang sikandin ne kene egpatubu. Kene sikandin eggimu te mareet, wey egbehey sikandin te eleg ne peggukum. 
Amana sikandin egtuman te me balaud wey me suhu ku. Matareng ka sika ne etew, wey egmalayat iya ka umul rin. Sikeddi se Magbebaye ka miglalag kayi.” 
“Ne panunggilingan ke due bandidu wey talaggimatey ne anak te matareng ne etew, kene eggimu te minsan sabeka re ne meupiya ne himu. 
Egkeen mule sikandin te me pegkeen ne inhalad diye te me diyus-diyus, wey egpanlibug. 
Egleig-leig mule sikandin te egkengaayu-ayu wey te egkengaware-ware, egpanakew, wey kene eg-uli te gerentiya te etew ne egpekeutang kandin. Egsimba sikandin te me diyus-diyus, wey eggimu te mallindit ne hinimuwan. 
Egpeutang sikandin piru egpatubuan din mule. Egmalayat bu naan ded ka umul rin? Kene! Egpatey iya sikandin tenged te makalelanget ne hinimuwan din. Sikandin de iya degma ka egkabasuli te kamatayen din.” 
“Piru panunggilingan man‑e ke due anak te seini se mareet ne etew. Ne nakita te anak ka langun ne mareet ne hinimuwan te amey rin, wey ware din mule ilingi. 
Kene sikandin egkeen te me pegkeen ne inhalad diye te me diyus-diyus te Israil, wey kene degma egsimba te seini ne me diyus-diyus, wey kene sikandin egpanlibug. 
Kene sikandin egleig-leig te minsan hentew, ig-uli din mule ka gerentiya te etew ne nakasambey kandin, wey kene sikandin egpanakew. Egmakeenen din ka egmanggutasan, wey egpamehayan din te me kumbale ka ware me kumbale. 
Kene sikandin eggimu te mareet, egpeutang sikandin wey kene egpatubu. Amana sikandin egtuman te me balaud wey me suhu ku. Ne tenged due, kene sikandin egpatey tenged te me sale te amey rin, ke kene, egmalayat mule ka umul rin. 
Piru egpatey mule ka amey rin tenged te me sale din ne iyan ka pegpanlimbung, pegpanakew, wey peggimu te seyyup diye te duma rin. 
“Piru ke eg-inse kew, ‘Mania te kene eg-antus ka anak tenged te sale te amey rin?’ Uya su emun ke miggimu mule ka anak ke nekey ka eleg wey nekeikul te me balaud, wey migtuman te langun ne me suhu ku, egmalayat iya mule ka umul rin. 
Iyan de iya egpatey ka etew ne eggimu te sale. Kene ne iyan eglegparan ka anak tenged te sale te amey rin. Ne ka amey, kene degma ne iyan eglegparan tenged te sale te anak din. Eg-unahan ka matareng ne etew tenged te pegkamatareng din, wey eglegparan ka mareet ne etew tenged pegkamareet din.” 
“Piru ke eg-inniyug ka mareet ne etew te langun ne sale din, wey egtuman e te langun ne suhu ku, wey eggimu ke nekey ka eleg wey nekeikul te me balaud, egmalayat iya ka umul rin. 
Eglingawan e ka langun ne sale din, wey egmalayat e ka umul rin su miggimu man e sikandin te matareng. 
Sikeddi se Magbebaye, kena a egkahale ke egpatey ka sabeka ne makasesale. Igkeupii ku ne eg-inniyug sikandin te mareet ne hinimuwan din, eyew kene sikandin egpatey. 
“Piru ke eg-inniyug degma ka matareng ne etew te pegkamatareng din, wey nasi e eggimu te sale wey te makalelanget ne hinimuwan iling te eggimuwen te me mareet ne etew, kene iya egmalayat ka umul rin. Ne eglingawan e ka langun ne matareng ne hinimuwan din dengan. Ne tenged su migsupak ma sikandin keddi, wey miggimu te sale, egpatey iya sikandin. 
“Piru egkahi kew, ‘Kene ne matareng ka paahi te Magbebaye.’ Pammineg kew me Israilita: Ka keddi naa ne paahi ka seyyup, wey ke, kaniyu? 
Ke eg-inniyug ka matareng ne etew te pegkamatareng din, wey nasi e eggimu te mareet, egpatey iya sikandin tenged te me sale din. 
Piru ke eg-inniyug ka mareet ne etew te langun ne sale din, wey eggimu e ke nekey ka eleg wey nekeikul te me balaud, egkaluwas din ka umul rin. 
Egmalayat ka umul rin su migsuman-suman ma sikandin wey mig-inniyug te langun ne sale din. 
Piru kema ke egkahi kew se me Israilita, ‘Kene ne matareng ka paahi te Magbebaye.’ He me Israilita, kene ne seyyup ka paahi ku, ke kene, iyan seyyup ka kaniyu. 
“Purisu me Israilita, sikeddiey se Magbebaye ne Manama, eggukuman ku ka tagse sabeka kaniyu ke nekey ka hinimuwan din. Ne kuntee, inniyuhi niyud ka me sale niyu eyew kene kew red egparusaan. 
Engkeri niyud ka langun ne sale niyu. Balbalawi niyud ka me pusung wey suman-suman niyu. Pammineg kew me Israilita: Mania te keilangan ne egpatey kew? 
Kena a egkeupian ne due egpatey ne minsan sabeka kaniyu. Purisu inniyug kew e te me sale niyu eyew egmalayat ka umul niyu. Sikeddi se Magbebaye ka miglalag kayi.”