Isikil.
19.
Ne insuhu a te Magbebaye ne Manama te peg-ulahing te seini ne ulahingen te peglungku para te me Hari te Israil. 
“Egpekeiling te beyan ne liyun ka iney nu ne migbuluku ka egtanggu te me anak din diye te taliware te me lukes ne liyun. 
Intanggu rin ay-ayari ka sabeka te me anak din, eyew egkeyimu ne manekal ne liyun. Ne nateu e ne egpandawi wey egpangeen te me etew. 
Te pegkanengnengi te me nasud meyitenged kandin, inderakep dan e sikandin pinaahi te pegpatinugpu kandin te lungag, wey inggehanuy ran e sikandin peendiye te Ihiptu. 
Ne migtetahad ka iney ne liyun ne egpakalibed pad ka anak din. Piru nataman, naawaan e sikandin te pegpallateng. Purisu impatulin din e man‑e ka sabeka ne anak din wey neyimu red man‑e ne manekal ne liyun. 
Ne migduma-rume e seini te masulug ne liyun, wey neyimu e sikandin ne manekal ne liyun. Ne nateu e degma ne egpandawi wey egpangeen te me etew. 
Ne impanempag din ka malig‑en ne inged te me kuntere lagkes ka me siyudad dan. Ne ka langun ne nangugpe dutu amana egkengaaldek ke egdineg te pegginihel rin. 
Ne inlusuran sikandin te me sundalu te me nasud wey inlilingutan dan sikandin. Ne inderegpakan dan sikandin te biyale wey narakep dan e pinaahi te pegpatinugpu kandin te lungag. 
Ne inggehanuy ran e sikandin ne impaseled te kulungan, wey in-uuyan dan e diye te Hari te Babilunya. Ne ingkukulung dan e sikandin eyew kenad e egkarineg ka pegginihel rin diye te me bubungan te Israil. 
Egpekeiling degma ka iney nu te paras ne impamula diye te ilis te weyig. Masulug se sugpang kayi wey behas tenged te dakel ne weyig. 
Ne egkaayun ne eggimuwen ne tuked te Hari, ka amana ne makehal ne sugpang kayi. Ne migpanaman migmalayat ka paras, taman te migtimpe e te duma ne mallayat ne pinamula. Amana egkakita seini su malayat ma amana, wey mallapung ka me sugpang. 
Piru imbebarut ka paras te egkengallangetan, wey imbebantulang dan te tane. Ne nalanes e ka sugpang kayi tenged te meinit ne kalamag ne egpuun te igsile, wey insisilaban e. 
Ne inggalin e seini ipamula diye te disirtu, diye te mammara wey ware weyig ne inged. 
Ne due hapuy ne miglihawang puun te sugpang, wey nenasilaban e ka me behas kayi. Purisu warad e makehal ne sugpang ne egkaayun ne eggimuwen ne tuked te Hari.” Sika ka ulahingen te peglungku ne keilangan ne eg-ulahingen.