Isikil.
21.
Ne impanengneng ad man‑e te Magbebaye ne Manama, 
“Etew, tangke ka diye te siyudad te Hirusalim, panpanayi nu ka me Israilita, wey panagne ka te mareet diye te me inged dan ne matulus. 
Kahii nu sikandan te migkahi a se Magbebaye: Egkuntereen ku sikaniyu. Eggulabuten ku ka kampilan ku wey egpanibbasen ku sikaniyu langun, matareng ma wey se mareet. 
Egpangimatayan ku iya sikaniyu langun pinaahi te kampilan ku, puun te igkakawanan ne balabahan taman te igkahibang ne balabahan. 
Ne egpakanengneng e ka langun te miggulabut a te kampilan ku se Magbebaye, wey kene kud e seini iglipi. 
“Sikan naa etew, deg-uy ka te peglungku wey pegkalaggew diye te tangkaan te me etew. 
Ne emun ke eg-inse sikandan, ‘Mania te migdeg-uy ka?’ ne kahii nu sikandan, ‘Tenged seini te guhuren ne makaliyas-liyas ne egpakakelkel wey egpakalepu te langun ne etew.’ Egkeyitabu iya seini te kene egkaluhey. Sikeddi se Magbebaye ka miglalag kayi.” 
Ne migpabulus-bulus ka Magbebaye ne migpanengneng keddi, 
“Etew, ihuhud nu ka lalag ku diye te keet-etawan. Kahii nu sikandan te migkahi a se Magbebaye, ‘Ingkamanga kud wey impasilak kud e ka kampilan. 
Tenged te pegsamsamili niyu te pegdisiplina ku kaniyu, impasilak kud ka kampilan ku ne igpanibbas ku kaniyu wey egpangilak-ilak e seini iling te kilat. Ne tenged due, warad e eggale-gale. 
Ingkamanga wey impasilak kud iya ka kampilan ku, wey eggamiten e seini te pegpangimatey. 
Pandalawit ka etew, wey pamukpuka nu ka kumeng nu tenged te pegkalange. Egkammatey iya ka keet-etawan ku wey ka me pangulu ran pinaahi te sika ne kampilan. 
Egginguma iya ka me peg-eleg-eleg. Emun ke kene sikandan eg-inniyug te me sale dan, egkeyitabu iya ka seini langun diye te kandan.’ Sikeddi se Magbebaye ka miglalag kayi. 
Sikan naa etew, panpanayi nu sikandan. Pegtagpi ka te pegpapitew te langet. Ne kuwa ka te kampilan, wey itibbas nu seini te kararuwa wey iabey nud man‑e te igkatatelu, palinneu te masulug ka egkapatey kandan te gira. 
Egpangelkelen sikandan te kaaldek wey masulug ka egpatey kandan. Inteenan kud e te me kampilan ka langun ne gumawan te siyudad dan, eyew te peggimatey kandan. 
He kampilan, panibbas kad e diye te minsan hendei. 
Egpegtagpi a degma te pegpapitew te langet ku, eyew egkaawe e ka langet ku. Sikeddi se Magbebaye ka miglalag kayi.” 
Ne impanengneng ad man‑e te Magbebaye, 
“Etew, himu ka te mapa wey tahui nu te daruwa ne dalan ne egbaybayaan te Hari te Babilunya ne egkekemkem te kampilan din. Diye egbunsud te Babilunya ka sika se daruwa ne dalan. Ne tahui nu te palinneu ka bebalakan peendiye te me siyudad. 
Ka sabeka ne dalan, egpeendiye te Raba, ka iney ne siyudad te Amun, wey ka dangeb ne dalan, egpeendiye te Huda, wey diye te Hirusalim, ka malig‑en ne siyudad. 
Egsasindeg diye te bebalakan ka Hari te Babilunya, wey egwelwelen din ka me tunud din eyew te pegnengneng ke hendei sikandin egbaye. Ne egpanginginse man‑e sikandin te me diyus-diyus din wey egpitawen din ka atey te karniru ne impanubad. 
Ne emun due marka ne Hirusalim te tunud ne egkewulabut din te igkakawanan ne belad din, egpanguleyi sikandin ka egmandu te peglusud te Hirusalim, wey te pegpangimatey te me mahinged diye. Egpanlimud sikandin te derakel ne terusu eyew igpamundul te gumawan te Hirusalim. Ne egpatetamundu sikandin te tane diye te kakiliran te matikang wey makepal ne alad ne batu eyew due egkabayaan te eglusud. 
Piru kene egpakapalintutuu ka me matig-Hirusalim ne egkeyitabu sika kandan, su duen ma kasabutan dan te Hari te Babilunya. Piru igpasuman-suman te Hari te Babilunya kandan ka pegribildi ran kandin, wey egpandakepen din sikandan. 
“Purisu egkahi a se Magbebaye, ‘Namayanpayan e ka me sale niyu. Impapitew niyu iya ka pegkamasinupaken niyu. Ne tenged due, igbehey ku sikaniyu diye te me kuntere niyu. 
Ne sikeykew se makasesale ne pangulu te Israil, miggingume e ka timpu ne eglegparan ka.’ 
Egkahi a se Magbebaye, ‘Awaa nu ka langkus wey kuruna nu, su nabalbalawan e ka langun. Ka seeye se me lerew, egkengeyimu e ne talahuren, wey ka seeye se me talahuren, egkengeyimu e ne lerew. 
Egdereetan ku iya ka Hirusalim, wey kene seini igpakaabey igpakapasasindeg taman te egginguma ka in-alam ku ne iyan eggukum te seini ne siyudad. Igbehey ku kandin ka seini ne siyudad.’” 
Ne migpabulus-bulus ka Magbebaye ne migkahi, “Etew, kahii nu ka me Amunihanen ne migdali-di te me Israilita te migkahi a se Magbebaye: Andam e ka kampilan ne igpanibbas. Impatamtamanan e seini pasilaka wey eg-ilak-ilak e iling te kilat. 
Taheed te egmanetengteng kew te kene ne mallehet ne igmakita, wey egmanagne te ubat, egpanamperen e ka me lieg niyu tenged te pegkamareet niyu, su miggingume e ka timpu ne eglegparan kew.” 
“Ne kuntee, migkahi ka Manama te iglipi e man‑e ka kampilan wey migkahi sikandin diye te kampilan: eggukuman kud e sikeykew due te nasud ne neetawan nu mismu. 
Igpaneem-neem ku keykew ka mangune-kune ne langet ku, wey igbehey ku sikeykew diye te mabbulut ne me etew ne nalayam ne egpangimatey. 
Egsilaban ka, wey egmandalanag ka langesa nu diye mismu te tane nu. Ne kene kad e egkatanuran. Sikeddi se Magbebaye ka miglalag kayi.”