Isikil.
23.
Ne impanengneng ad man‑e te Magbebaye ne Manama, 
“Etew, due daruwa ne talaari ne malitan. 
Te me beyi-beyi pad sikandan, migpamelegye sikandan te lawa ran diye te Ihiptu. Imbalahad dan de due ka me lukes ne egbaley-baley te lawa ran. 
Si Uhula ka ngaran te kakey, wey si Uhuliba ka ngaran te hari. Ne impangasawa ku sikandan se daruwa, wey nataman, duen e me anak ney. Si Uhula, iyan ka Samarya, wey si Uhuliba, iyan ka Hirusalim.” 
“Piru minsan asawa kud e si Uhula, migpabulus-bulus pad iya man‑e sikandin ka egpamelegye te lawa rin. Ne egkeupian pad iya man‑e sikandin te me lukes ne inggeyinawaan din ne iyan ka me sundalu ne me matig-Asirya. 
Me bate-bate pad sikandan wey mekein-inniyat. Me gubirnadur ka duma kandan wey me kumandir ne migmangudde ne migpanaluub te memeilem. 
Migpeyilhilabet sikandin te langun ne upisyal te Asirya, wey inlinditan din ka pegkeetew rin pinaahi te pegsimba rin te me diyus-diyus te Asirya. 
Ware din engkeri ka pegpamelegye din te lawa rin iling te inggimu rin dengan diye te Ihiptu te beyi-beyi pad sikandin. Migpeyilhilabet sikandin te me lukes taman te neuralan e sikandan te lawa rin.” 
“Purisu imbehey kud si Uhula te nanggeyinawaan din ne me matig-Asirya, ka me lukes ne igkaam-amaneyi rin en iya. 
Inlelebasan dan sikandin, wey inggimatayan dan e. Ne impandakep dan ka me anak din, wey nasalsalupet e sikandin te me malitan tenged te seeye ne neyitabu kandin.” 
“Ne minsan pad nakite e ni Uhuliba ka neyitabu te kakey rin, migpabulus-bulus pad iya degma sikandin ka egpampamelegye te lawa rin wey migsubla naan pad iya sikandin ne balinggeren du te kakey rin. 
Neupian degma sikandin te me matig-Asirya ne mekein-inniyat. Me gubirnadur ka duma kandan wey me kumandir ne migmangudde ne migpanaluub te memeilem. 
Nakita ku ne lilinditi e sikandin, wey nekeg-iling e sikandan se talaari. 
“Impasublaan pad iya man‑e ni Uhuliba ka pegpamelegye din te lawa rin. Neupian pad iya man‑e sikandin te impangulit diye te alad ne me ulaula te me upisyal te me matig-Babilunya ne migmanguntud te karwahi. 
Mallalab se me kumbale te seini ne me upisyal, due me sinturun, wey me langkus. 
Ne tenged te neupian sikandin te me upisyal te me matig-Babilunya, migsuhu sikandin te me suluhuanen din diye te Babilunya eyew te pegginggat te me upisyal ne egpeendiyeen din te kandin. 
Ne migmanlepew e sikandan wey miggilabet e kandin. Te sika ne paahi, inlilinditan dan sikandin. Ne nataman napelaan e man‑e sikandin kandan, wey impangengkeran din e man‑e. 
Ne tenged te pegpabulus-bulus ni Uhuliba te pegpamelegye te lawa rin, wey nakapeeyang-heyang e ka pegpalawas din, nalangetan ad e kandin, wey in-engkeran kud e degma sikandin iling te kakey rin. 
Piru minsan pad due, nanasnasian naan pad iya ka pegpampamelegye din te lawa rin iling te inggimu rin dengan diye te Ihiptu te beyi-beyi pad sikandin. 
Amana sikandin eglupug-lupug te me lukes ne derakel se me lusi iling te lusi te asnu wey dakel se me muntus iling te muntus te kudde. 
He Uhuliba, egkaam-amanaan ka iya te mareet ne hinimuwan nu iling te inggimu nu dengan diye te Ihiptu te beyi-beyi ke pad, ne neuralan ka me lukes keykew.” 
Purisu ingkahiyan te Magbebaye ne Manama si Uhuliba, “Egpalusuran ku sikeykew te langun ne inggeyinawaan nu ne lukes ne nangengkeran nu 
ne iyan ka me matig-Babilunya, wey ka langun ne matig-Kaldiya ne egpuun te Pikud, Suwa, wey Kuwa duma te me matig-Asirya. Me bate-bate pad sikandan wey me mekein-inniyat ne me lukes. Me gubirnadur, me kepitan, me kumandir, me upisyal, langun dan ne migmangudde. 
Eglusuran ka nikandan duma te susuluhi ne me sundalu ne egmanguntud te me karwahi. Nasangkap sikandan te me kalasag, me hilmit, wey due me akeb te kumeng dan. Sikandan ka egpalegparen ku keykew te kandan mismu ne klasi te peggukum. 
Igpaneem-neem ku keykew ka langet ku pinaahi kandan. Egsapsapen dan ka irung nu wey egpanilapen dan ka talinga nu, wey egpandakepen dan ka me anak nu. Ne ka egkengasame, egpangimatayan dan pinaahi te kampilan wey ke egpanilaban naa. 
Eglebasan ka nikandan wey egpanguen dan ka me mahal ne alahas nu. 
Ne egkataman e ka mareet ne hinimuwan nu ne iyan ka pegkabalinggeren nu wey pegpamelegye nu te lawa nu, iling te inggimu nu dengan diye te Ihiptu. Kene nud e seeye egkasuman-suman, wey egkalingawan nud e ka me matig-Ihiptu. 
“Sikeddi se Magbebaye, egkahi a te igbehey ku sikeykew te me etew ne ingkalangeti nu, me etew ne ingkapeleyi nu wey impangengkeran nu. 
Eglelegparan ka nikandan tenged te langet dan keykew, wey egpanguen dan e ka langun ne inlasayan nu. Ne eg-engkeran kad e nikandan se migpalawas, wey egpamayanpayan e ka mekeyilew-hilew ne hinimuwan nu ne iyan ka pegpampamelegye nu te lawa nu. 
Egkeyitabu sika keykew su egpekeiling ma te miggulid ka te duma ne nasud te pegsalig nu kandan wey kene ne sikeddi ka insalihan nu. Ne inlinditan nu ka pegkeetew nu pinaahi te pegsimba nu te me diyus-diyus. 
Mig-ikul ka te hinimuwan te kakey nu, purisu eglegparan ku degma sikeykew iling te peglegpad ku kandin. 
“Sikeddi se Magbebaye ka egkahi, ‘Eglegparan ku sikeykew iling te kakey nu ne malitan. Egpekeiling te inumen diye te dakel wey maralem ne ubab ka iglegpad ku keykew. Ne egngingisiyan kad e wey eglelemetan ke eg-inumen nud e sika. 
Ne egkewubug-hubug ka wey eglungku su napenu-penu ma te karereetan ka sika ne ubab. Sika ka ubab ne napenu te peg-antus ne impeinum ku te kakey nu ne iyan ka Samarya. 
Eg-aminen nu iya sika te eg-inum, wey egpeseen nud ka ubab. Ne egpamalpalian nu ka kumeng nu tenged te peglungku. Sikeddi ka Magbebaye ka miglalag kayi.’ 
Ne tenged te inlingawan ad e nikeykew wey in-engkeran, eg-antus ka iya tenged te mareet ne hinimuwan nu ne iyan ka pegpamelegye nu te lawa nu. Sikeddi se Magbebaye ka miglalag kayi.” 
Ne ingkahiyan a te Magbebaye, “Etew, hukumi nud si Uhula wey si Uhuliba. Ne ipanengneng nu kandan ka makalelanget ne hinimuwan dan. 
Migpanlibug sikandan pinaahi te pegsimba ran te me diyus-diyus, wey migpangimatey pinaahi te pegtutung dan te me bate ne naanak ku kandan eyew igpanubad dan diye te me diyus-diyus dan isip pegkeen. 
Ne kene ne sikan de ka inggimu ran, inlinditan dan pad iya man‑e ka timplu ku, wey ware dan tahura ka Aldew te Peggimeley, 
su te aldew ne impangimatayan dan ka me anak dan eyew igpanubad diye te me diyus-diyus dan, miglasud sikandan te timplu ku, wey inlinditan dan seini. Sika ka inggimu ran te timplu ku. 
“Ne migsuhu pad iya man‑e sikandan te me suluhuanen dan eyew egpaangayen te me lukes puun te maddiyu ne inged. Te nanlepew e ka me lukes, migpamanihus e sikandan se daruwa, wey migngimmimasad e. 
Ne migpinnuu e sikandan se daruwa te mateles ne pinnuuwan. Ne due lamisa diye te katangkaan te pinnuuwan, wey diye dan naa ipanahu ka insinsu ku wey lana. 
Ne maggulub naan de iya ka sabeka ne punduk te keet-etawan ne nenewubug ne egmanggale-gale ne egmamuun te disirtu. Ne imbinukulan wey ingkurunaan e sikandan se talaari te seini ne me etew. 
Ne nakakahi a mismu te pegkeetew ku, ‘Balahad e ka seini ne me etew ne eggilabet te sika ne me malitan ne nalayam e ne egpamelegye te lawa ran.’ 
Miglibed-libed iya sikandan miggilabet engki Uhula wey Uhuliba te me malitan ne egpamelegye te lawa. 
Piru eglegparan te me matareng ka seini se talaari ne malitan te eleg ne legpad te pegpalibug-libug, wey pegpangimatey ran.” 
Ne migpabulus-bulus ka Magbebaye ne migkahi, “Egpalusuran ku sikandan te susuluhi ne etew eyew egkengaaldek sikandan, wey igpaahew ku ka me karatuan dan. 
Ne igpabatu ku sikandan, wey egpeyimatayan pinaahi te kampilan lagkes ka me anak dan, wey egpasilaban ku ka me baley ran. 
Te sika ne paahi, egtamanen kud e ka mareet ne hinimuwan puun te sika ne nasud. Ne egkeyimu e degma seini ne paney-paney te langun ne malitan eyew kene eggimu te mareet. 
Ne sikaniyu se talaari, eglegparan ku iya sikaniyu tenged te pegsimba niyu te me diyus-diyus wey te pegkabalinggeren niyu. Ne egpakanengneng kew e ne sikeddi ka Magbebaye.”