Isikil.
24.
Te igkasapulu ne aldew, te igkasapulu ne bulan, te igkasiyam ne leg‑un te pegkarakepi kanami, impanengneng ad man‑e te Magbebaye ne Manama, 
“Etew, isulat nu ka pitsa te seini ne aldew, su kunteen iya ne aldew ne eglusuran te Hari te Babilunya ka Hirusalim. 
Ne ihuhud nu naa seini ne panunggilingan diye te me masinupaken ne Israilita, wey panengnenga nu sikandan ne migkahi a se Magbebaye, ‘Iriken niyu ka kendiru wey weyihi niyu. 
Ne panubbuki niyu naa seini te memeupiya ne ginetad ne sapu te ngalap, iling te me pamanayen, wey me bubun. Ne lagkesi niyu degma te memeupiya ne klasi te me tul‑an. 
Ne iyan niyu re kua ka sapu te amana ne meupiya ne karniru. Ne pangunduli niyu ka kendiru, wey pakalkalei niyu ka sapu wey me tul‑an.’ 
“Purisu egkahi a se Magbebaye: Mekeyid‑u-hid‑u ka egkeyitabu te siyudad ne neempet te pegpeyimmimatayey, su nekeiling seini te taangen ne kendiru ne ware nalinisi. Purisu pangua niyu te egsallimbeka ka ginetad ne kenad e egpangalamen pad. 
Namelmelehan te langun ka pegpangimatey ran, su impamalahad dan man de diye te me batu ka langesa te impangimatayan dan, purisu namayanpayan seini. 
Ne nakita ku ka langesa diye te me batu wey imbalahad ku re seini ne egkamelmelehan te langun. Ne egpekeiling seini te egpangananey ne egpabulig keddi egpasuli. 
“Purisu egkahi a se Magbebaye: Mekeyid‑u-hid‑u ka egkeyitabu te siyudad ne neempet te mangngimatey. Sikeddi mismu ka egpanlimud te me kayu ne igtemeg, eyew egsilaban ku sika ne siyudad. 
Na, panimuli niyu pa ka me kayu ne igtemeg, wey pandisuli niyu. Pakal-kalei niyu ka sapu te ngalap taman te egkeetiyan, wey egkatutung e ka me tul‑an. 
Ne iriken niyu ka kendiru ne warad tahu, taman te egmalalab seini, wey egkengalleney ka me taang wey egmalinis e. 
Piru neyimu re seini ne ware karuan, su kene ma egkaleney te hapuy ka makepal ne taang. 
He Hirusalim, iyan nakamalindit keykew ka mareet ne hinimuwan nu. Inlinisan kud perem dengan sikeykew, piru ware ka migmalinis. Purisu kene kad en iya egmalinis taman te igpaneem-neem kud keykew ka langet ku. 
Sikeddi se Magbebaye ka miglalag kayi, wey ware egpakabalabag keddi. Kena a egkeyimenawan keykew, wey kenad e egkabalbalawan ka suman-suman ku. Eglegparan ku sikeykew ke nekey ka hinimuwan nu. Sikeddi se Magbebaye ka miglalag kayi.” 
Ne impanengneng a te Magbebaye, 
“Etew, egkuen ku egtigtigkani ka etew ne amana nu geyinawei. Piru keilangan ne kene ka eglungku wey ke egsinehew naa. 
Kaayun ne egpaseseksek ka piru keilangan ne kene egkarineg. Ne keilangan ne kene nu igpapitew ka peglungku nu. Kene nu awaa ka langkus nu wey kene nu luunga ka sandal nu palinneu te peglungku. Ne kene nu bunbuni ka ulaula niyu, wey kene ka keen te egkeenen te egderamag.” 
Purisu te seup ne maselem, inlalag kud e seeye te keet-etawan. Ne te pegkamarusilem, migpatey e ka asawa ku. Ne intuman kud e te seup ne maselem ka langun ne insuhu keddi te Magbebaye. 
Ne mig-inse keddi ka keet-etawan, “Mania te inggimu nu sika?” 
Ne ingguhuran kud sikandan te impanengneng keddi te Magbebaye ne miggenendue, 
“Kahii nu ka me Israilita te migkahi a se Magbebaye: Andam ad e ne eglindit te timplu ku ne inggeyinawaan niyu, ingkeey-eyami wey impeggasal niyu ne kene egkahuhus. Ne egpatey te gira ka me anak niyu ne egkengasame diye te Hirusalim. 
Ne himuwa niyu ka impeyimu ku ki Isikil; kene niyu bunbuni ka ulaula niyu, wey kene kew keen te egkeenen te egderamag. 
Kene niyu awaa ka langkus niyu wey kene niyu luunga ka sandal niyu palinneu te peglungku. Kene kew paninehew wey ke eglungku naa. Egmemagguye kew ka masireg-uy tenged te me sale niyu. 
Ne si Isikil ka eg-ilingan niyu. Purisu keilangan ne eggimuwen niyu ka langun ne inggimu rin. Ke egkeyitabu e sika ne legpad kaniyu, egpakanengneng kew e ne sikeddi ka Magbebaye.” 
Ne ingkahiyan a te Magbebaye ne Manama, “Ne etew, te timpu ne egdereetan kud e ka aputanan dan ne impeggasal ran, indakelan dan te geyinawa, wey ingkeey-eyami ran, egpangimatayan kud e ka me anak dan, 
due etew ne egpakapallahuy puun te Hirusalim, wey egpanugtul keykew te me guhuren. 
Te sika ne aldew, egpakalalag kad e man‑e, wey egpekeglalag kew e se daruwa. Purisu egkeyimu kad e ne palinneu diye te kandan, wey egpakanengneng e sikandan ne sikeddi ka Magbebaye.”