Isikil.
27.
Ne impanengneng ad man‑e te Magbebaye ne Manama, 
“Etew, ulahing ka te ulahingen te peglebeng te Tiru, 
ka siyudad ne iling te bayaanan diye te dahat, wey egpameli wey egpamelegye duma te me etew ne nangugpe diye te tagse ilis te dahat. Kahii nu sikandin te migkahi a se Magbebaye: Tiru, migpeggasal ka ne tetelesi ka amana. 
Impeyiluahan nu ka me eletanan te inged nu diye te dahat. Impatelesan ka paay-ayari te me talaggimu keykew. 
Egpekeiling ka te tetelesi ne barku ne inggimu puun te me mateles ne kayu ne sipris ne egpuun te Sinir. Ne ka sungkaleg ne inggiketan te palayap nu, inggimu puun te kayu ne sidar ne egpuun te Libanun. 
Ne ka me begsey nu, inggimu puun te kayu ne uk ne egpuun te Basan. Ne ka me seeg nu, inggimu puun te me kayu ne sipris ne egpuun te isla te Ilisa, wey impangakeban seini pandayan-dayani te me panayew te ilipanti. 
Impandayan-dayanan puun te Ihiptu ka linu ne me palayap nu, wey egpekeiling sika ne egtengtengan te bendila. Meilem wey malugtem ka batek te atep nu, ne egpuun te isla te Ilisa. 
Me matig-Sidun wey me matig-Arbad ka me talagbegsey keykew, wey me etew nu re iya degma ne me mangngateu ka kepitan nu. 
Ne iyan me talag-ayad-ayad te me lungag te barku nu ka me igbuyag te Gibal wey ka me mangngateu ne mahinged diye. Ne egmangendue te keykew ka me etew ne egmanguntud te me barku ne egpuun te nalein-lein ne inged eyew egpanaliyu te me belegye nu. 
Ne iyan nu me sundalu ka me matig-Pirsya, me matig-Ludim, wey me matig-Put. Impananggat dan ka me kalasag dan wey me hilmit dan due te matikang wey makepal ne alad nu ne batu, wey nakatimul seini te katelesan nu. 
Ne iyan me talagbantey te me alad nu ka me matig-Arbad wey me matig-Hilik. Ne ka me sundalu te Gamad ka migbebantey te me matikang ne baley nu. Inlingut dan ipananggat ka me kalasag dan diye te alad nu, wey nakatimul seini te katelesan nu. 
“Ne migmanesaliyu keykew ka me matig-Tarsis su dakel ma ka karatuan nu. Impanaliyuwan dan ka me belegye nu te me pelata, putew, lata, wey me tingga. 
Migmanesaliyu degma keykew ka me matig-Grisya, matig-Tubal, wey me matig-Misik. Impanaliyuwan dan ka me belegye nu te me uripen, wey me kasangkapan ne inggimu puun te burunsi. 
Ne ka seeye degma se me matig-Bit-Tugarma, iyan dan degma impanaliyu te me belegye nu ka me kudde ne igtrabahu, me kudde ne igbubunu, wey me mula. 
Migmanesaliyu degma keykew ka me matig-Rudis, wey masulug ka me suki nu diye te me inged ne ilis te dahat. Ne iyan dan impanaliyu te me belegye nu ka me panayew te ilipanti, wey me kayu ne makehal wey meitem ne egngaranan te Ibuni. 
Migmanesaliyu degma keykew ka me matig-Aram, su masulug ma ka me belegye nu. Ne iyan dan impanaliyu te me belegye nu ka me hinabel ne malugtem, me hinabel ne impandayan-dayanan te impaneyi, me mahal ne linu, wey me batu ne egngaranan te ismiralda, kural, wey agata. 
Migmanesaliyu degma keykew ka me matig-Huda wey me matig-Israil. Ne iyan dan impanaliyu te me belegye nu ka me trigu, iggira, teneb, lana te ulibu, wey me baluhu. 
Migmanesaliyu degma keykew ka me matig-Damasku su masulug ma ka nakalkalasi ne me belegye nu wey dakel ka karatuan nu. Ne iyan dan impanaliyu te me belegye nu ka me binu ne egpuun te Hilbun, wey me maangkag ne hinabel ne egpuun te Sahar. 
Migsesaliyu degma keykew ka me matig-Dan wey me matig-Haban ne egpuun te Usal. Ne iyan dan impanaliyu te me belegye nu ka me putew, wey me meemut ne hilamunen ne egngaranan te Kasiya wey Kalamus. 
Ne ka seeye degma se me matig-Didan, migsesaliyu degma te me belegye nu te me manggad ne ighagpi te sakang. 
Ne ka me matig-Arabya wey ka me talagmandu te Kidar, migsesaliyu degma te me belegye nu te me karniru wey me kambing. 
Migmanesaliyu degma keykew ka me nigusyanti te Siyiba wey Raama. Ne iyan dan impanaliyu te me belegye nu ka langun ne klasi te memeupiya ne peemut, me mahal ne batu, wey me bulawan. 
Migmanesaliyu degma keykew ka me matig-Haran, me matig-Kani, me matig-Idin, me matig-Siyiba, me matig-Asur, wey me matig-Kilmad. 
Ne iyan dan impanaliyu te me belegye nu ka me mahal ne kumbale, me meilem ne hinabel ne impandayan-dayanan te nakalkalasi ne batek ne impaneyi, me trapu ne nakalkalasi se me batek wey inggiresenan te egpaneyi. 
Ne iyan me talagdulan te me belegye nu ka me barku te Tarsis. Egpekeiling ka te barku diye te dahat ne napenu-penu te dulan. 
Piru in-uyan ka te me talagbegsey nu diye te taliware te dahat wey natanled ka su nasuhat ke ma te kalamag ne egpuun te igsile. 
Ne nenallened e ka langun ne karatuan nu, ka me unturanan nu, me talagbegsey, me kepitan, me panday, me talagbelegye te me belegye nu, me sundalu nu wey ka langun ne duma ne nanguntud. 
Impangelkel te liyas ka keet-etawan ne nangugpe diye te ilis te dahat te pegkarineg dan te me kuleyian te me kepitan ne egkengatanled. 
“Ne in-engkeran e te langun ne migmanguntud, me talagbegsey wey me kepitan ka me barku ran, wey diyad sikandan migmanasindeg te ilis te dahat. 
Ne migpanamantaman sikandan migpandalawit tenged te neyitabu keykew. Impamukbukan dan te alinepung ka me ulu ran wey migmanlilid-lilid sikandan te abu. 
Migmanetabulug sikandan wey migsaluub te saku, wey migpanaman-taman migpandalawit ka eglungku. 
Te peglungku dan, mig-ulahing sikandan te ulahingen te peglebeng keykew ne migkahi, ‘He Tiru, ware de due natanled te dahat iling te neyitabu keykew. 
Ke egginguma ka me belegye nu ne igmabaye te dahat, ingkabehey nu te me etew ka me keilangan dan su dakel ma amana ka karatuan nu. Nenaddatu ka me Hari te kalibutan tenged te kasulug te karatuan nu wey me belegye nu. 
Piru kuntee nahuhus kad e diye te dahat, wey natanled kad e lagkes ka me belegye nu wey ka me trabahanti nu.’ 
Ne nenatanengan ka langun ne nangugpe diye te ilis te dahat tenged te neyitabu keykew. Ne egkengeil-ilaan en iya ka ulaula te me Hari dan ne egkengalliyasan. 
Nenakalingi-lingi naan de ka me nigusyanti te me nasud tenged te neyitabu keykew. Makaliyas-liyas ka natamanan nu, wey egkaawe kad en iya.”