Isikil.
31.
Te an-anayan ne aldew, te igkatelu ne bulan, te igkasapulu wey sabeka (11) ne leg‑un te pegkarakepi kanami, impanengneng ad man‑e te Magbebaye ne Manama, 
“Etew, kahii nu ka Hari te Ihiptu, wey ka keet-etawan din te migkahi a se Magbebaye: Hentew buwa ka egpeilingan ku te kabantug nu? 
A, uya, igpeiling ku bes sikeykew te kayu ne sidar diye te Libanun. Mateles amana ne egtengtengan ka sika ne kayu tenged te mallapung ne sugpang din ne nakaralung te me puwalas. Ne nalipawan din pad ka duma ne mallapung ne kayu. 
Ka dakel ne weyig diye te diralem te tane ka nakabulig te pegtubu te sika ne sidar. Ne nenaweyihan degma te sika ne weyig ka duma ne kayu diye te me puwalas. 
Migtimpa ka sika ne kayu te langun ne kayu diye te puwalas. Ne migmasulug pad iya man‑e ka me sugpang kayi wey migmallayat su dakel ma ka weyig ne egkasupsup din. 
Ne migmanesalag diye te me sugpang din ka langun ne klasi te me bayaku wey diye degma migmalelesut te egkaralungan din ka langun ne mananap. Ne migmangelung degma kandin ka langun ne keet-etawan te mabbantug ne me nasud. 
Ne tenged te migpanaman-taman mig-ugseb ka me dalid din wey nakasupsup te dakel ne weyig, migmallayat ka me sugpang din, wey mateles amana ne egtengtengan. 
Ne minsan ka me kayu ne sidar, sipris, wey me armun diye te Idin ne pinamulaan te Manama, kene egpakaseked te me sugpang te sika ne kayu. Langun ne kayu diye te Idin, kene egpekeiling te katelesan te sika ne kayu. 
Inggimu ku ne mateles ka sika ne kayu pinaahi te mallapung ne me sugpang din. Purisu neimma ka langun ne kayu diye te Idin. 
“Purisu egkahi a se Magbebaye: Tenged su migpaambug ma ka sika ne kayu te kalayat din, wey te kalapung te me sugpang din, 
igbehey ku sikandin diye te subla ne maresen ne nasud ne egpaneem-neem kandin te parusa ne eleg te pegkamareet din. Igdegpak kud en iya seini. 
Ne egpepeleren e sikandin te mabbulut ne me lapu, wey eg-eengkeran e sikandin. Ne egkengasagpi e ka me sugpang din wey egkengatahak e ka me dewun diye te me bubungan wey me bangalug ne egkabayaan te weyig. Ne eg-eengkeran e sikandin te langun ne miggelung kandin ne keet-etawan te kalibutan. 
Egkapeled e ka sika ne kayu wey egkeyimu e ne latunanan te nakalkalasi ne me bayaku, wey egpanpanlentayan e te leew ne me mananap ka me sugpang din. 
Purisu puun kuntee, warad e kayu ne egmalayat pad wey egtimpa te duma ne kayu, minsan pad ke dakel ka weyig ne egkasupsup. Egkahangu ka langun ne kayu iling te etew ne egpatey, wey egmekeendiye te inged te me minatey.” 
Ne migpabulus-bulus ka Magbebaye ne migkahi, “Ke diyad e ka sika ne kayu te inged te me minatey, egsagpengan ku ka maddalem ne sebseb palinneu te peglungku. Warad e egdalanag ne weyig, wey egkeetiyan e ka dakel ne weyig. Ne egpalungkuen ku ka Libanun tenged te pegpatey te sika ne kayu, wey maggebu e degma ka langun ne duma pad ne kayu diye. 
Egpangelkelen te pegkaaldek ka keet-etawan te langun ne nasud ke egpakarineg sikandan te masilatipak ne pegkapeled te sika ne kayu te timpu ne igpeendiye kud sikandin te inged te me minatey wey egpakalemung e te seeye se nammatey e. Ne egmanggale-gale ka duma ne kayu ne nenekeendiyad te inged te me minatey puun te Idin wey Libanun ne memeupiya dengan wey naay-ayaran naweyihi. 
Ne ka seeye se migparalung te sika ne kayu, wey migpakigsabeka kandin, egmekeendiye te inged te me minatey, wey egpatey ne egkabalahad de due taman te egkamewu. 
“Ka kayu iyan ka Hari te Ihiptu wey ka langun ne keet-etawan din. Warad iya egpekeiling te katelesan din wey kabantug din minsan ka me kayu te Idin. Piru minsan pad due, igdegpak ded iya sikandin diye inged te me minatey, wey igpalemung te me lapu wey te seeye se migpatey te gira. Sikeddi se Magbebaye ka miglalag kayi.”