Isikil.
32.
Te an-anayan ne aldew, te igkasapulu wey daruwa (12) ne bulan, te igkasapulu wey daruwa (12) ne leg‑un te pegkarakepi kanami, impanengneng ad man‑e te Magbebaye ne Manama, 
“Etew, ulahing ka te ulahingen te peglungku para te Hari te Ihiptu ne egkahi: Migsuman-suman ka ne iling ka te liyun ne eggiphipanew diye te me nasud. Piru ka malehet, iling ke re te buaya ne miglumbuk-lumbuk diye te me weyig nu. Egbuliyawen nu te me paa nu ka weyig wey egkalebeg e seini. 
Purisu egpeuyan a se Magbebaye te susuluhi ne me etew wey egbiyaleen ka nikandan te biyale ku, wey eggehanuyen kad e diye te gakapan. 
Ne eg-engkeran kud sikeykew diye te tane eyew egpatey kad e. Ne egpangeenen e ka me sapu nu te me manuk-manuk wey te me leew ne mananap. 
Ig-empet ku ka me sapu nu diye te me bubungan wey diye te me bangalug. 
Egparalanahen ku ka langesa nu diye te me bubungan, wey me napu, wey egkasewuhan e te langesa nu ka me weyig. 
Ke egdereetan kud e sikeykew, egbunbunan ku te gapun ka langit wey kenad e eglayag ka me bituen, ka aldew wey ka bulan. 
Egpamarusilemen ku ka langun ne eglayag te langit. Ne egkareleman e ka intiru ne nasud nu. Sikeddi se Magbebaye ka miglalag kayi. 
“Egkengasamuk ka ware nu re due ken‑u neneileyi ne keet-etawan te me nasud ke egpakarineg sikandan ne indereetan kud e sikeykew. 
Egkengaaldek te egkeyitabu keykew ka langun ne etew, lagkes ka me Hari dan. Egpangelkelen te liyas ka tagse sabeka kandan te timpu ne igwelewes ku ka kampilan ku diye te tangkaan dan ke egkareetan kud e sikeykew.” 
Ne ingkahiyan te Magbebaye ka Hari te Ihiptu, “Eglusuran ka iya te Hari te Babilunya. 
Egpeyimatayan ku ka keet-etawan nu pinaahi te kampilan te nasud ne subla ne mabulut te langun ne nasud. Egguleen dan iya ka langun ne matig-Ihiptu, lagkes ka langun ne impaambug te nasud nu. 
Egpangimatayan ku ka langun ne mananap ne egpanabtab diye te ilis te dakel ne weyig te Ihiptu. Ne warad e kangkuwa etew wey ke mananap naa ne eglumbuk-lumbuk te weyig diye. 
Ne egpating-awen kud e ka me weyig te Ihiptu, wey egmandalanag seini ne iling e te lana. Sikeddi se Magbebaye ka miglalag kayi. 
“Te timpu ne eggimuwen kud e ka Ihiptu ne mammara ne inged ne ware eg-ugpe, wey egguleen kud e ka langun ne diye lagkes ka me mahinged, egpakanengneng e sikandan ne sikeddi ka Magbebaye. 
Sika ka ulahingen te peglungku ne eg-ulahingen kangkuwa te keet-etawan te nalein-lein ne me nasud eyew te peglungku para te Ihiptu, wey te langun ne mahinged diye. Sikeddi se Magbebaye ka miglalag kayi.” 
Te igkasapulu wey lalimma (15) ne aldew, te an-anayan ne bulan, te igkasapulu wey daruwa (12) ne leg‑un, impanengneng ad man‑e te Magbebaye ne Manama, 
“Etew, lungku ka para te susuluhi ne keet-etawan te Ihiptu, wey te mabbulut ne keet-etawan te duma ne me nasud. Egpanguluhen kud e sikandan diye te inged te me minatey eyew egpakalemung e te seeye se nammatey e. 
Ne kahii nu ka Ihiptu: Mateles ke bes naan pad du te duma ne me nasud? Kene! Igdegpak ke red iya degma diye te inged te me minatey, eyew egpakalemung kad te seeye se me lapu. 
“Egkahule ka me matig-Ihiptu su in-andam e te me kuntere ka me kampilan ne igpanibbas kandan. Egkareetan iya ka Ihiptu wey ka me mahinged diye. 
Ne diye te inged te me minatey, eglilimbayan te mabbantug ne me pangulu ne egmangelit-elit ka Ihiptu wey ka seeye se me nasud ne migpakigsabeka kandin. Egkekahiyan sikandan, ‘Te, seinid e degma ka lapu ne nammatey te gira.’ 
“Ne diye degma ka Hari te Asirya; nalingutan ka sabalanan din te me sundalu rin ne migpatey te gira. 
Diye ka me sabalanan dan te kinariraleman ne baad te inged te me minatey. Sikandan ka igkengaliliyasi dengan te me etew, piru kuntee nammatey e sikandan te gira. 
“Ne diye degma ka Hari te Ilam; nalingutan ka sabalanan din te me sabalanan te me sundalu rin ne migpatey te gira. Nenammatey sikandan ne mekeyilew-hilew ne nenabalahad de due wey nekeendiye te inged te me minatey. Igkengaaldek dengan sikandan te me etew, piru migpatey e. Ne mig-antus e sikandan te hilew duma te langun ne migpatey wey diyad e degma te inged te me minatey. 
Miggibat-hibat ka Hari te Ilam diye te inged te me minatey, duma te me sundalu rin ne me lapu ne migpatey te gira. Igkengaaldek dengan sikandan te me etew, piru kuntee nakasalerep e sikandan te hilew duma te seeye se impandegpak degma diye. 
“Ne diye degma ka Hari te Misik wey Tubal. Sikandan ka igkengaliliyasi dengan te me etew te minsan hendei. Piru kuntee nenammatey e sikandan pinaahi te kampilan; nenammatey sikandan ne nenabalahad de due taman te nenammewu e. 
Migpatey sikandan ne ware behayi te kabantug te peglebeng, iling te seeye se maddesen ne nammatey te karaan ne timpu ne inlebeng ne impatapikan te me kampilan wey me kalasag dan. Tenged su nakapaliyas ma sikandan te me etew te neneuyag pad sikandan. 
“Ne sikeykew Hari te Ihiptu, egkareetan ka degma wey egpakalemung kad e te lapu ne migpatey te gira. 
“Ne diye degma ka Hari te Idum, duma te langun ne me upisyal rin. Me maddesen dengan sikandan, piru kuntee immeyibat e degma sikandan duma te seeye se diyad te inged te me minatey ne nenammatey ne nenabalahad de due taman te nenammewu e. 
“Ne diye degma ka me upisyal ne egpuun pad te igkahibang ne balabahan, duma te langun ne matig-Sidun. Igkengaaldek degma dengan sikandan te me etew, piru kuntee nakasalerep e sikandan te hilew diye te inged te me minatey duma te langun ne lapu ne migpatey te gira. 
“Ke egkakita te Hari te Ihiptu seeye se nammatey ne diyad e te inged te me minatey, egkahale sikandin wey ka me sundalu rin, su kene bes ne sikandan de ka migpatey te gira. 
“Impeyinalatan ku kandan ka me etew, piru egpatey red iya degma sikandan duma te seeye se nenammatey ne nenabalahad de due taman te nenammewu e. Sikeddi se Magbebaye ka miglalag kayi.”