Isikil.
35.
Ne impanengneng ad man‑e te Magbebaye ne Manama, 
“Etew, tangke ka diye te Bubungan ne Siir te inged ne Idum, wey panagne ka te mareet meyitenged te me matig-Idum. 
Kahii nu sikandan te migkahi a se Magbebaye: Egpakigkuntera a kaniyu, Bubungan ne Siir te inged ne Idum. Eglegparan ku sikaniyu egpatamtamani wey egkeyimu e ne ware eg-ugpe te inged niyu. 
Egpangguhusen ku ka me siyudad niyu wey warad e eg-ugpe. Ne egpakanengneng kew e ne sikeddi ka Magbebaye. 
“Naluhey kew re ka migdumut te me Israilita, inlulusuran niyu sikandan te timpu ne nalised-lised sikandan, te timpu ne inlegparan ku sikandan. 
Purisu egpahunlibet a se ware egpatayan ne Magbebaye, ne egpeyimatayan ku iya sikaniyu su me talaggimatey kew ma. 
Eggimuwen kud e ne ware mahinged te Bubungan ne Siir te inged ne Idum. Ne egpangimatayan ku ka langun ne egpangendiye. 
Ne egpekeempet de ka egpatey te gira diye te me bubungan, me tuhal, me napu, wey me bangalug. 
Eggimuwen kud ka me inged niyu ne ware mahinged te ware egtamanan. Ne warad e me etew ne egmangugpe te me siyudad niyu. Ne egpakanengneng kew e ne sikeddi ka Magbebaye. 
“Migkahi kew te eg-angkenen niyu ka Huda wey ka Israil minsan duen a ka Manama ran ne egtetameng kandan. 
Purisu egpahunlibet a se Magbebaye ne egkeuyag te ware egtamanan ne eglegparan ku iya sikaniyu tenged te langet niyu, wey pegkeimma niyu te keet-etawan ku. Ne emun ke egkakite e te keet-etawan ku ne eglegparan kud sikaniyu, egpakanengneng e sikandan ne sikeddi ka Magbebaye dan. 
Te iling degma rue, egpakanengneng kew e ne sikeddi se Magbebaye, egpakarineg a wey egpakanengneng a te langun ne impanlalag niyu te pegdali-di te me bubungan te Israil. Migkahi kew, ‘Egkeyimu e seini ne mammara ne inged ne ware eg-ugpe, wey egkaahew tad e.’ 
Amana kew pad man‑e migpeggasal te me pegkeetew niyu te pegkuntere keddi. Narineg ku ka langun. 
“Purisu egkahi a se Magbebaye te egkahale ka intiru ne kalibutan ke egkeyimu e ka inged niyu ne disirtu, 
su nenahale kew man de degma te timpu ne neyimu ka tane te me Israilita ne disirtu. Purisu egkeyimu e degma ne ware mahinged ka Bubungan ne Siir te inged ne Idum. Ne egpakanengneng kew e ne sikeddi ka Magbebaye.”