Danyil.
3.
Ne migpeyimu si Hari Nibukadnisar te larawan ne bulawan. Daruwa ne pulu wey pitu (27) ne mitrus ka katikang kayi wey tatelu ne mitrus ka kakepal. Diye din seeye ipasasindeg te napu te Dura ne sakup te prubinsya te Babilunya. 
Ne impeumew ni Hari Nibukadnisar ka me gubirnadur, me mayur, me kagawad, me talagtambag, me talaggen-gen te seleppi, me talewukum, me pangulu, wey ka langun ne me upisyal te me prubinsya eyew egpatambungen te peghalad te larawan ne impeyimu rin. 
Te nalibulung e sikandan langun se impatambung te peghalad, diyad sikandan nanasindeg te tangkaan te larawan ne bulawan. 
Ne migpanguleyi e ka tigpanengneng, “Sikaniyu se langun ne keet-etawan te nalein-lein ne tribu wey namuun te minsan hendei ne nasud wey nalein-lein se linalahan, egbanasalan kew 
ne emun ke egkarineg niyu ka dahing te trumpita, pulendag, kuglung, salurey, wey duma pad ne eggamiten te peg-ulahing, usengul kew diye te tane wey simbaa niyu ka larawan ne bulawan ne impeyimu ni Hari Nibukadnisar. 
Ne minsan hentew ne kene eg-usengul diye te tane wey kene egsimba, due-rue ne igdegpak diye te dakel ne hapuy ne egkanlabkanlab.” 
Purisu te pegkarineg te langun ne keet-etawan te nalein-lein ne tribu wey namuun te minsan hendei ne nasud wey linalahan te dahing te trumpita, pulendag, kuglung, salurey, wey duma pad ne eggamiten te peg-ulahing, mig-usengul e sikandan diye te tane wey insimba ran ka larawan ne bulawan ne impeyimu ni Hari Nibukadnisar. 
Te seeye ne timpu, due me mammituen ne migparani te Hari wey migsumbung meyitenged te me Hudiyu. 
Migkahiyan dan si Hari Nibukadnisar, “Mahal ne Hari, egkeuyag ka te ware egtamanan! 
Migsuhu ka ne ka seeye se egpakarineg te dahing te trumpita, pulendag, kuglung, salurey, wey duma pad ne eggamiten te peg-ulahing, keilangan ne eg-usengul diye te tane wey egsimba te larawan ne impeyimu nu. 
Ne seeye se kene eg-usengul wey kene egsimba, igdegpak diye te dakel ne hapuy ne egkanlabkanlab. 
Na, due me Hudiyu ne in-alam nu ne egpangulu diye te intiru ne prubinsya te Babilunya ne ensi Sadrak, Misak wey Abidnigu. Ka seini ne me etew, Mahal ne Hari, ware migparuma-ruma keykew wey ware migpamakey te me manama nu, wey ware migsimba te larawan ne bulawan ne impeyimu nu.” 
Ne dutu, nangebel-ebel e ka langet ni Hari Nibukadnisar wey migsuhu ne igpeuyan ensi Sadrak, Misak wey Abidnigu diye te kandin. Ne in-uuyan e sikandan diye te tangkaan te Hari. 
Ne mig-insaan din e sikandan, “Malehet naan iya Sadrak, Misak wey Abidnigu ne ware kew migpamakey te me manama ku wey ware migsimba te larawan ne bulawan ne impeyimu ku? 
Na kuntee, emun ke eg-usengul kew diye te tane ke egkarineg niyu ka dahing te trumpita, pulendag, kuglung, salurey, wey duma pad ne eggamiten te peg-ulahing, wey egsimbeen niyu ka larawan ne impeyimu ku, ne meupiya iya. Piru ke kene kew, due-rue ne igdegpak kew diye te dakel ne hapuy ne egkanlabkanlab. Pitawen te naan iya ke due manama ne egpakaluwas kaniyu.” 
Ne migtabak ka tatelu ne talag-alukuy, “Mahal ne Hari, kenad ne keilangan ne egtabaken ney pad sikeykew meyitenged due. 
Maresen ka Manama ne impamakey ney, wey egluwasen key nikandin puun keykew wey te dakel ne hapuy ne egkanlabkanlab. 
Piru minsan pad ke kene key nikandin egluwasen, igpanengneng ney keykew ne kene key iya egpamakey te me manama nu wey egsimba te larawan ne bulawan ne impeyimu nu.” 
Te sikan de iya, nangebel-ebel e amana ka langet ni Hari Nibukadnisar wey nahuhus ka ulaula rin te kabelu engki Sadrak, Misak, wey Abidnigu. Sikan naa, migsuhu sikandin ne egkapapituwen ne lupi ka keinit te egkanlabkanlab ne hapuy. 
Ne insuhu din ka kekesehi te me sundalu rin te igpabaku sikandan wey igparegpak diye te dakel ne hapuy ne egkanlabkanlab. 
Purisu imbebaku e sikandan ne duen pad me kumbale dan, diyakit, salakey wey indegpak e diye te dakel ne hapuy ne egkanlabkanlab. 
Tenged te mapahetpet ne suhu te Hari ne egpeiniten amana ka dakel ne hapuy ne egkanlabkanlab, sikan naa ka migpatey seeye se me etew ne migdegpak kandan diye te hapuy. 
Ne sikandan se tatelu diye migdeeg te dakel ne hapuy ne egkanlabkanlab ne nenabbaku pad. 
Ne dutu, neinu-inu si Hari Nibukadnisar wey due-rue ne migsasindeg ne mig-inse te me upisyal rin, “Tatelu man de iya ne etew ka imbaku ta wey indegpak diye te hapuy, menu ma iya?” Ne migtabak sikandan, “Malehet sika, Mahal ne Hari.” 
Ne migkahi ka Hari, “Piru hep‑at ne etew ka egkakita ku kuntee ne warad nenabbaku ne eggiphipanew diye te elat te hapuy wey ware sikandan namenu. Ne ka ikeep‑at kandan hendue te panalihan.” 
Sikan naa ka migparani si Hari Nibukadnisar te gumawan te dakel ne hapuy ne egkanlabkanlab wey migpangumew, “Sadrak, Misak wey Abidnigu ne me suluhuanen te Amana ne Mabantug ne Manama, lihawang kew e rue! Hendini kew e!” Ne miglihawang e sikandan se tatelu puun te hapuy. 
Miglibulungan sikandan te me gubirnadur, me mayur, me kagawad wey te me upisyal te Hari. Ne nakita ran ne ware sikandan namenu te hapuy. Ware natutung ka bulbul ran, ka insaluub dan, wey ware sikandan migngareg te ebel. 
Puun due, migkahi si Hari Nibukadnisar, “Egdayanen ka Manama enni Sadrak, Misak, wey Abidnigu. Impeendini rin ka panalihan din eyew te pegluwas te me suluhuanen din ne migsalig kandin. Ware sikandan migparuma-ruma te suhu ku wey in-awes dan pad ne igtuug te hapuy du te egpamakey wey egsimba te lein ne manama angin e te Manama ran. 
“Purisu egpanengnengen ku ka langun ne keet-etawan te nalein-lein ne tribu wey namuun te minsan hendei ne nasud, ne ka egbaley-baley te Manama enni Sadrak, Misak, wey Abidnigu, egtadtaren wey egguhusen ka me baley ran. Su ware lein ne Manama ne egpakaluwas te iling kayi.” 
Ne intimulan pad te Hari ka katungdanan enni Sadrak, Misak, wey Abidnigu diye te prubinsya te Babilunya.