Danyil.
4.
Ne due sulat ne impeuyan ni Hari Nibukadnisar diye te langun ne keet-etawan te nalein-lein ne tribu wey namuun te minsan hendei ne nasud wey linalahan te intiru ne kalibutan: “Egkanasnasian pad perem ka keupianan due te kaniyu! 
Igkahale ku ka pegpangguhud kaniyu te me palinneu wey me kein-inuwan ne inggimu keddi te Amana ne Mabantug ne Manama. 
Amana ka me palinneu wey me kein-inuwan ne inggimu rin! Ware egtamanan te migharian din wey te pegmandu din. 
“Sikeddi si Nibukadnisar, meupiya ka peg-ugpe ku wey matubung ded kayi te palasyu ku. 
Piru due sabeka ne marusilem ne nakataheinep a te makaaldek-haldek, wey nakakita a te ingkaliyasi ku diye te taheinep ku. 
Sikan naa ka impanengneng ku ne egpeendiniyen te keddi ka langun ne matagseb ne me etew te Babilunya eyew igpakanangen dan keddi ka igpasabut te taheinep ku. 
Te pegginguma te egmamulingan, te me timbusawen, te egmahehane, wey te mammituen, innangenan kud e sikandan te taheinep ku piru kene dan egkaluwas ka igpasabut dutu. 
“Te katammanan, miggendini te keddi si Danyil ne egngaranan ded ki Biltisasar ne insangey te manama ku. Diye te kandin ka panisingan te matulus ne me manama. Ne innangenan kud e sikandin te taheinep ku. 
Miggenenduen a: Biltisasar, pangulu te me talagbuwas ne egpakaluwas te taheinep, nakanengneng a ne due te keykew ka panisingan te matulus ne me manama, ne ware inneles ne igkeyirapi nu te pegnengneng, purisu pasabuta a te taheinep ku. 
“Seini ka taheinep ku: Due sabeka ne kayu ne nakita ku diye te elat-elat te kalibutan ne lelayati. 
Ne migpabulus migtulin ka kayu wey migmaresen, ne ka kalayat kayi nekeume e te langit wey egkakita seini te tagse sabeka kayi te ampew te tane. 
Mateles ka me dewun kayi wey masulug ka me behas ne eleg ne egkakeen te langun. Ne miggelung ka me mahintalunan ne mananap diye te egkaralungan kayi, wey migsesalag ka me bayaku diye te me sugpang kayi. Ne diye migkuwa te egkakeen ka langun ne eggeheyinawa. 
“Te ware e pad napukew, due nakita ku ne panalihan ne migpamaneug puun te langit. 
Ne migpanguleyi sikandin ne migkahi, ‘Pelera niyu ka kayu wey panempuha niyu ka me sugpang. Awaa niyu ka me dewun wey iregpak niyu ka me behas kayi. Alawa niyu degma ka me mananap ne diye te egkaralungan kayi wey ka me bayaku ne migsesalag diye te me sugpang. 
Piru kene niyu weila ka tued wey ka me dalid due te kabbenesan, ne egbeleberan te putew wey te burunsi. Ne ka igpasabut te tued iyan sika se etew. Balahara niyu seini ne egkasubid te demmug ne egpuun te langit, wey egpakalemung te me mananap diye te kabbenesan. 
Seled te pitu ne leg‑un, ka suman-suman din isip etew, egkaliwanan te suman-suman te mananap. 
Ka sika ne peggukum impataha te me panalihan su eyew egpakanengneng ka langun te ka Amana ne Mabantug ne Manama iyan migmandu te migharian te me etew. Ne egkaayun ne igbehey rin seini diye te minsan hentew ne igkeupii rin, minsan te seeye se subla ne mapariralemen te langun ne etew.’” 
Ne migpabulus si Hari Nibukadnisar ka migkahi, “Seeye ka taheinep ku Biltisasar, ne kuntee nangeni ad nikeykew te igpasabut kayi su warad iya minsan sabeka te me matagseb kayi te migharian ku ne egpakanangen keddi te igpasabut kayi. Piru egpakaluwas ka kayi tenged su due te keykew ka panisingan te matulus ne me manama.” 
Si Danyil ne egngaranan ded ki Biltisasar, natanengan sikandin te dagdahew su naalatan sikandin meyitenged te taheinep te Hari. Purisu migkahiyan sikandin te Hari, “Biltisasar, kene ka kaalati te taheinep ku wey te igpasabut kayi.” Ne migtabak si Danyil, “Mahal ne Hari, meupiya perem ke iyan egkasuhat ka me kuntere nu te taheinep nu wey te igpasabut kayi, wey kene ne sikeykew. 
Ka kayu ne nakita nu ne migtulin wey migmalig‑en, ne nekeuma diye te langit se kalayat wey egkakita seini te tagse sabeka kayi te ampew te tane, 
ne mateles se me dewun wey masulug se me behas ne eleg ne egkakeen te langun, wey miggelungan te me mahintalunan ne mananap ka egkaralungan kayi wey migsesalahan te me bayaku ka me sugpang, 
sikeykew seeye, Mahal ne Hari. Migtulin ka wey migmaresen taman te nekeuma diye te langit ka katelesan nu, wey nekeempet te kalibutan ka peghari nu. 
Ne nakita nu degma ka panalihan ne migpamaneug puun te langit ne migkahi, ‘Tempuha niyu ka kayu wey dereeti niyu piru balahara niyu re ka tued wey ka dalid diye te tane ne inggiketan te putew wey burunsi. Egbalaharen de due seini ne egkasubid te demmug ne egpuun diye te langit wey egpakalemung te me mahintalunan ne mananap seled te pitu ne leg‑un.’ 
“Mahal ne Hari, seini ka igpasabut te taheinep nu ne implanu te Amana ne Mabantug ne Manama ne egkeyitabu due te keykew. 
Egdeldelen ka puun te keet-etawan wey egpakalemung ka te mahintalunan ne me mananap. Egpanabtab kad iling te baka wey egkasubid ka te demmug ne egpuun diye te langit. Eglihad ka pitu ne leg‑un ne henduen pad ne eg-ila ka ne ka Amana ne Mabantug ne Manama iyan migmandu te migharian te me etew wey igbehey rin seini diye te minsan hentew ne igkeupii rin. 
Ne meyitenged te suhu ne egbalaharen de due ka tued te kayu, iyan igpasabut kayi ne egpakalibed ded diye te keykew ka migharian nu te timpu ne eg-ila kad e ne ka Manama iyan iya migmandu te langun. 
Purisu, Mahal ne Hari, meupiya perem ke egpamminehen nu seini se tambag ku keykew. Engkeri nud ka peggimu te sale wey matareng e himuwa nu, wey ikeyid‑u nu ka egkengaayu-ayu. Ke eggimuwen nu sika, kema ke egpabulus ke pad ka egmatubung.” 
Seeye se langun neyitabu iya diye ki Hari Nibukadnisar. 
Su peglihad te sabeka ne leg‑un, miggiphipanew sikandin diye te atep te palasyu rin ne mapatag diye te Babilunya, 
wey migkahi, “Amana ne maresen ka Babilunya ne inggimu ku pinaahi te keddi ne kanekal eyew eg-ugpaan te Hari. Pinaahi kayi, egkakita ka karesen ku wey ka kabantug ku.” 
Te ware pad nekeimpus ka Hari ka eglalag, due laheng ne egpuun diye te langit ne miggenendue, “Hari Nibukadnisar, pammineg ka te iglalag ku keykew: In-awaan kud sikeykew te katenged isip Hari. 
Ne egdeldelen ka puun te me etew wey egpakalemung ka te me mahintalunan ne mananap wey egpanabtab kad iling te baka. Ne eglihad ka pitu ne leg‑un ne henduen ke pad eg-ila ne ka Amana ne Mabantug ne Manama iyan egmandu te migharian te etew wey igbehey rin seini diye te minsan hentew ne igkeupii rin.” 
Due-rue ne neyitabu seeye diye ki Nibukadnisar. Ne indeldel e sikandin puun te me etew wey migpanabtab e sikandin iling te baka. Nasubid sikandin te demmug ne egpuun diye te langit wey migmalayat e ka bulbul rin iling te bulbul te banug wey ka me sulu rin nekeiling e te sulu te bayaku. 
Ne migpabulus si Hari Nibukadnisar ka migkahi, “Te miglihad e ka pitu ne leg‑un, migleng‑ag a diye te langit wey nakalibed e ka meupiya ne suman-suman ku. Purisu indayan wey insaye ku ka Amana ne Mabantug ne Manama wey intahud ku sikandin se ware egpatayan. Ka migharian din ware katamanan, wey egpabulus taman te langun ne timpu. 
Ne in-isip din ne ware karuan te langun ne nangugpe te tane, wey eggimuwen din ka igkeupii rin diye te me panalihan te langit wey te me etew kayi te tane. Ne ware egpakabalabag kandin wey ke egpakapegnel ke nekey ka eggimuwen din. 
“Te nakalibed e ka meupiya ne suman-suman ku, nakalibed e degma ka keddi ne pegkatalahuren, kabantug, wey katelesan isip Hari. Miglibed e degma keddi ka me upisyal ku wey ka me suluhuanen ku, wey mighari ad e man‑e wey migmabantug e pad ne subla. 
Purisu egdayanen ku, egsayeen, wey egtahuren ku kuntee ka Hari diye te langit tenged su eleg ka langun ne himu rin wey matareng ka me paahi rin. Ne igpariralem din seeye se mapegpeggasal.”