Danyil.
7.
Te an-anayan ne leg‑un te peghari ni Bilsasar diye te Babilunya, nakataheinep si Danyil wey due immakita te Manama kandin. Insulat din seini langun ne miggenendue, 
“Te sabeka ne marusilem, impakita a te Manama te dakel ne dahat ne imbuliyew te kalamag ne egpuun te hep‑at ne pikungan te kalibutan. 
Ne due hep‑at ne derakel ne mananap ne ware nenekeg-iling ne migmanlepew puun te dahat. 
Ka an-anayan ne mananap egpekeiling te liyun ne due pakpak te banug. Ne nakita ku ne nabarut ka me pakpak din wey innenat sikandin wey impasasindeg iling te etew wey imbehayan seini te suman-suman te etew. 
“Ka igkarangeb ne mananap egpekeiling te usu. Ingkengkeng din ka manmanekal ne limang ne belad din wey migbange sikandin te tatelu ne gusuk. Due migkahi diye te kandin, ‘Keen ka te dakel ne sapu.’ 
“Te neimpusan e seeye, nakakita ad man‑e te igkatelu ne mananap ne egpekeiling te liyupardu ne due hep‑at ne pakpak diye te peka rin ne iling te pakpak te bayaku. Ka seini ne mananap due hep‑at ne ulu wey imbehayan seini te katenged te pegmandu. 
“Nataman, impakita ad man‑e te Manama te igkeep‑at ne mananap. Makaalat-halat seini wey subla ne makaaldek-haldek ne egtengtengan wey amana ne manekal. Putew se ngipen kayi ne derakel, ne due impamangeitan wey ingkeen, ne indi-diekan din ka nasame. Ware seini nekeiling te duma ne me mananap su duen ma sapulu ne sungey kayi. 
“Taheed te migmemetmetan ku ka me sungey, nakita ku ne due migtubu ne deisek ne sungey diye te elat-elat dutu ne nakapabarut te tatelu ne sungey. Ka seeye se migtubu ne deisek ne sungey, due mata ne iling te mata te etew wey due be‑be ne mapegpeggasal.” 
“Te pegpitew ku, iyan kud iya se impanahu ne me trunu, wey migpinnuu diye te sabeka ne trunu seeye se Tapey e ne Due. Ne eangkahi ka kumbale din wey ka bulbul rin. Ne migkanlabkanlab ka trunu rin wey hapuy ne egkalegleg ka me liggid kayi. 
Ne due beuhan ne hapuy ne migtulayas diye te tangkaan din, ne me libu-libu ka migpamakey kandin wey me minilyun ka nanasindeg diye te tangkaan din. Ka hukumanan andam e wey imbelat e ka me baseen. 
“Ne migpabulus a ka egpipitew su narineg ku ka sungey ne egpegpeggasal. Ne dutu, nakita ku ne innimatayan ka mananap wey indereetan ka lawa rin wey indegpak diye te migkanlabkanlab ne hapuy. 
Ne in-awaan te geem ka duma ne me mananap piru insumpulan pad te malepet ka umul ran. 
“Ne impakita te Manama keddi ka migngaranan te anak te etew ne migginguma ne indumaan te gapun te langit. Ne miggendiye sikandin diye te seeye se Tapey e ne Due wey impeparani e diye te tangkaan din. 
Imbehayan sikandin te geem, katelesan wey katenged te migharian din eyew egpamakayen sikandin te langun ne keet-etawan te nalein-lein ne tribu wey namuun te minsan hendei ne nasud wey linalahan. Egpabulus ka peghari din wey ware katamanan. Ne ware egpakarereet te migharian din.” 
“Sikeddi si Danyil, migmasakit se geyinawa ku wey nabantalan te impakita keddi. 
Imparaniyan ku ka sabeka te nanasasindeg diye wey mig-insa a kandin ke nekey ka malehet ne igpasabut te seini se langun. Ne migkahi sikandin, 
‘Seini se hep‑at ne derakel ne mananap iyan ka hep‑at ne Hari ne eglepew te kalibutan. 
Piru te katammanan, ka keet-etawan te Amana ne Mabantug ne Manama, iyan egpaharien wey ware egtamanan te pegmandu dan.’ 
“Egkeupian a ne egpakanengneng ke nekey ka malehet ne igpasabut te seeye se igkeep‑at ne mananap ne ware nekeiling du te duma wey amana ne makaaldek-haldek ne egtengtengan. Ne putew ka ngipen wey burunsi ka sulu, ne impamangeitan din wey ingkeen din ka narawi rin, ne indi-diekan din ka nasame. 
Egkeupian a degma ne egpakanengneng ke nekey ka igpasabut meyitenged te sapulu ne sungey te seeye se igkeep‑at ne mananap wey te sungey ne migtubu ne nakapabarut te tatelu ne sungey. Ka seini ne sungey due mata wey due be‑be ne mapegpeggasal, ne hendue te madmaresen pad seini te duma ne me sungey. 
Ne nakita ku ka seini ne sungey ne migpakig-ehet te keet-etawan te Manama, wey natalu rin sikandan. 
Nataman, miggingume e wey migpinnuu diye te sabeka ne trunu seeye se Tapey e ne Due wey miggukum lapig te keet-etawan te Manama. Ne migginguma ka timpu ne iyan e eghari ka keet-etawan te Manama. 
“Ne seini ka ingkahi te mig-insaan ku, ‘Ka igkeep‑at ne mananap iyan ka igkeep‑at ne migharian kayi te tane wey lein seini te langun ne me migharian. Eglusuran din ka intiru ne kalibutan wey egdi-diekan din seini wey eglupeten. 
Ka sapulu ne sungey iyan ka me Hari ne egpuun te seeye ne migharian. Egsubal kandan ka sabeka ne Hari ne lein du te nekewun‑a wey egkatalu rin ka tatelu te seeye se sapulu ne me Hari. 
Eglalag sikandin te mareet meyitenged te Amana ne Mabantug ne Manama wey egbaybayaran din ka keet-etawan te Manama wey egsuman-suman sikandin ne egbalbalawan ka balaud wey ka nabatasan dan ne eggimuwen. Ne egkasakup din ka keet-etawan te Manama seled te tatelu ne leg‑un wey liware. 
Te egkeimpusan e sika, eggingume e ka timpu ne eggukuman sikandin, eg-aween e ka geem din, wey egdereetan en iya te ware egtamanan. 
Ne igbehey ka geem wey katenged te peghari diye te keet-etawan ne in-alam te Amana ne Mabantug ne Manama, wey eghari sikandan te langun ne migharian kayi te kalibutan. Ware katamanan te peghari dan wey ka langun ne migharian egpamakey wey egpalintutuu kandan.’ 
“Ne seeye ka katamanan te taheinep ku, wey nabantalan a amana wey migmakalawag ad. Piru ware ku seeye iwangal-wangal.”