Danyil.
11.
Te an-anayan ne leg‑un te peghari ni Daryu ne matig-Midiyan, sikeddi mismu ka migbulig wey miglig‑en ki Migil.” 
“Ne kuntee igpanengneng ku keykew ka malehet: duen pad tatelu ne Hari ne eghari diye te Pirsya, ne duen pad igkeep‑at ne subla pad ne meyaman du te duma. Te egmaresen e sikandin pinaahi te karatuan din, egbaggeten din ka langun te pegkuntere te migharian te Grisya. 
Ne due egginguma dutu ne maresen ne Hari ne egmandu te dakel ne migharian wey eggimu te minsan nekey sumale te igkeupii rin. 
Te egmaresen e sikandin, egkareetan e ka migharian din wey egkabaad e seini te hep‑at ne baad, piru kene ne kabuhalan din ka egsubal kandin eghari. Ne ka me Hari ne egsubal kandin, kenad egpekeiling kandin karesen. Ka malehet, eg-aween e ka migharian din wey igpamehey e seini diye te duma. 
“Ne ka Hari te Ihiptu, egmaresen e piru due sabeka te me upisyal rin ne egmadmaresen pad kandin wey eghari te dakel ne peghari. 
Peglihad te masulug ne me leg‑un, eggimu te kasabutan ka Hari te Ihiptu wey ka Hari te Sirya. Igpaasawa te Hari te Ihiptu ka anak din ne malitan te Hari te Sirya isip tuus te kasabutan. Piru kene egkaluhey ka sika ne pegsabeka su eggimatayan ma ka malitan lagkes ka iglukes wey ka anak. Ne lagkes degma ka me suluhuanen ne migduma kandin. 
Te seeye ne me timpu, sabeka te me karumaan te malitan ka egkeyimu ne Hari diye te Ihiptu. Eglusuran din ka Sirya wey eglasuran din ka malig‑en ne ugpaan te Hari wey egkareeg din sikandan. 
Eg-uyanen din diye te Ihiptu ka me larawan ne me manama ran wey ka me mahal ne ubab dan ne hinimu puun te bulawan wey pelata. Seled te pila ne leg‑un kene sikandin eglusud te Hari te Sirya. 
Ne egkataman, eglusuran te Hari te Sirya ka migharian te Ihiptu, piru egpekeuli de sikandin te nasud din. 
“Ne egpangandam ka me anak ne me lukes te Hari te Sirya te pegpakiggira wey eglibulung te susuluhi ne me sundalu. Eglusud sikandan ne egpekeiling te baggiyu ne kene egkapahenan taman diye te malig‑en ne ugpaan te me kuntere. 
Tenged te kabelu te Hari te Ihiptu, egsukul sikandin te Hari te Sirya wey egkatalu rin ka masulug ne me sundalu kayi. 
Te natalu rin e ka susuluhi ne me sundalu, egpegpeggasal e sikandin wey libu-libu pad ka egpangimatayan din. Piru kene sikandin egpakapabulus ne egpanpanalu. 
“Peglihad te pila ne me leg‑un, impamasulug pad te Hari te Sirya ka me sundalu rin du te seeye se an-anayan. Ne egkataman, eglusud e sikandan ne nakumplitu te me panganiban. 
Te sika ne timpu, masulug ne me etew ka egpakigkuntere te Hari te Ihiptu. Apil en iya ka me duma nu Danyil ne me Israilita ne mabbulut. Eggimuwen dan seini eyew egkatuman ka impakita te Manama piru kene sikandan eglampus. 
Ne eglusuran te Hari te Sirya ka sabeka ne siyudad ne sakup te Ihiptu ne naay-ayaran te eg-alad. Ne migpatetabundu te tane ka me sundalu rin diye te impabunsuran te alad eyew egkabayaan dan te eglusud. Ne kene egpakasukul ka me sundalu te Ihiptu wey minsan seeye se me bahani su warad keseg dan ne igpakasukul. 
Purisu sikandin se miglusud te Hari te Ihiptu eggimu te minsan nekey ne igkeupii rin wey ware iya egpakasukul kandin. Ne minsan ka Israil, ka Mateles ne Tane ne insaad te Manama, egsakupen din pad iya wey due geem din te pegdereet kayi. 
“Egplanu ka Hari te Sirya te peglusud te Ihiptu ne eggamiten ka langun ne me sundalu rin. Ne egpakigsabeka sikandin wey igpaasawa rin ka anak din ne malitan te Hari te Ihiptu eyew te pegdereet te migharian din piru kene eglampus ka Hari te Sirya. 
Ne egkataman, eglusuran din ka nangugpe diye te ilis te dahat wey masulug kandan ka egsakupen din. Piru egkatalu sikandin te sabeka ne pangulu ne egpasanggel te kandin ne pegkatampeleen wey igpalibed diye te kandin ka pegkatampeleen din. 
Purisu eg-uli sikandin diye te inged din mismu ne nalingutan te malig‑en ne alad. Piru egkatalu sikandin wey sikan en iya ka katammanan din. 
“Ka egsubal kandin ne Hari egsuhu te sabeka ne etew ne egpamehes te pegpabayad te buhis eyew egkatimulan ka karatuan te migharian din. Piru seled te pila ne me aldew egkapatey sikandin piru kene ne pinaahi te belu wey ke gubut naa.” 
“Ka egsubal man‑e kandin, ware pulus ne etew wey ware katenged ne egkeyimu ne Hari. Egtigkew sikandin eglepew wey eg-angkenen din ka migharian pinaahi te peggulu. 
Masulug ne sundalu ka egguleen din te egpangimatey lagkes ka pangulu te me talagpanubad. 
Puun te timpu te migpakigsabeka sikandin te duma ne me nasud, migpanlimbung e sikandin wey egkeyimu sikandin ne maresen duma te pila-pila ne me etew rin. 
Egtigkawen din te eglusud ka matubung ne inged diye te prubinsya wey eggimuwen din ka ware neyimu te kabuybuyahan din dengan. Egba-baaren din diye te me sakup din ka langun ne naahew rin puun te giraanan. Egsuman-suman sikandin ne eglusud te me lungsud ne due malig‑en ne alad. Piru seini se langun kene egkaluhey. 
“Duma te masulug ne me sundalu rin, migbagget-bagget sikandin ka egkuntere te Ihiptu. Piru egsukul kandan ka Hari te Ihiptu duma te masulug wey malig‑en ne me sundalu. Piru egkatalu ka Hari te Ihiptu tenged su eglimbungan sikandin te Hari te Sirya. 
Sakup din mismu ka egdereet kandin, purisu egkatalu ka me sundalu rin wey masulug kandan ka egpatey. 
Eg-atubang seini se daruwa ne Hari piru ka tagse sabeka egpakannekal ne egsuman-suman te mareet wey egpeub-ubatey sikandan se daruwa. Piru kene egkatuman ka insuman-suman dan tenged su ka katammanan egginguma sumale te intahahe te Manama. 
Eg-uli ka Hari te Sirya diye te inged din ne egpanguyan te dakel ne karatuan. Te diye din e te deralanen, egtulan sikandin diye te tane te Israil, wey egdereetan din ka eleg ne pegsimba te Manama. Eggimuwen din ka igkeupii rin, ne henduen pad sikandin egleus diye te inged din. 
“Te intahahe ne timpu, eglibed e man‑e ka Hari te Sirya diye Ihiptu eyew te peglusud kayi, piru ka egkeyitabu, kenad e ne iling te an-anayan. 
Su egmanguntud te barku ka me matig-Ruma ka egpakig-ehet te Hari te Sirya wey egkaliyasan sikandin. Ne eg-isues e sikandin ne egkabelu-belu. Te diye pad sikandin te deralanen peendiye te Sirya, egtamtamanan din te egbayad-bayad ka keet-etawan te Israil ne egtuman te matulus ne kasabutan, ne eglapihan din mule seeye se kene egtuman kayi. 
Egsuhuen te Hari te Sirya ka me sundalu rin te peglindit te timplu, ka nalingutan te malig‑en ne alad. Eg-aween din ka aldew-aldew ne pegpanubad wey egtahuan din te sabeka ne makaalat-halat ne ‘talagdereet ne lilinditi.’ 
Egguluan din seeye se ware migtuman te matulus ne kasabutan. Piru ka me etew ne nekeila te Manama ran, maresen ne egpakig-ehet kandin. 
Ka seeye se me matagseb, migbulig ne egpasabut te masulug ne etew minsan egpangimatayan sikandan pinaahi te kampilan wey ke egtutungen naa. Ka duma egpandakepen wey eg-ahawan te kasangkapan seled te malepet ne timpu. 
Te timpu te pegbayad-bayad kandan, deisek de ka egkarawat dan ne bulig wey masulug ka me etew ne egduma kandan ne egpapitew-pitew re. 
Ka duma te me matagseb, egbaybayaran su eyew egmatulus wey egmalinis sikandan taman te katammanan ne timpu ne iyan ka intahahe te Manama. 
“Eggimuwen te Hari te Sirya ke nekey ka igkeupii rin. Migpeggasal sikandin te pegkeetew ne labew sikandin te langun ne manama wey miglalag sikandin te makaaldek-haldek ne pegbaley-baley kuntere te Manama ne labew te langun ne me manama. Egmalampusen sikandin taman te egkeepus e ka langet te Manama. Su ke nekey ka intahahe, egkeyitabu iya. 
Kene din e eglinglingeen ka me manama te kabuybuyahan din wey ka seeye se inggeyinawaan amana te me malitan, wey ka duma pad ne me manama su egpeggasal sikandin ne labew sikandin te langun. 
Piru iyan din de egtahuren ka manama ne migpangabang te me siyudad ne nalingutan te malig‑en ne me alad, ne iyan ka manama ne ware neileyi te me kabuybuyahan din. Eghalaran din te bulawan, pelata, mahal ne me batu, wey duma pad ne mahal ne me dasag. 
Eglusuran din ka me siyudad ne nalingutan te mallig‑en ne me alad pinaahi te pegbulig te lapu ne manama. Ne egkabantug seeye se me etew ne migdawat kandin. Eggimuwen din sikandan ne me talagmandu te masulug ne me etew wey egbehayan din sikandan te tane isip dasag. 
“Te timpu te katammanan, egpakig-ehet ka Hari te Ihiptu te Hari te Sirya. Piru egsukul kandin ka Hari te Sirya duma te langun ne geem din wey eggamit sikandin te me kerumata, me kudde, wey me barku. Egpekeiling sikandin te baggiyu ka eglusud te me nasud wey egdereetan din seini. 
Eglusuran din degma ka tane te Israil wey masulug ka me etew ne egpatey. Piru egpakapallahuy ka Idum, ka Muwab, wey ka me pangulu te Amunihanen. 
Eglusuran din ka masulug ne me nasud wey kene iya egpakaalihu ka Ihiptu. 
Egkariralem te geem din ka karatuan ne me bulawan, pelata, wey me mahal ne kasangkapan te Ihiptu. Egkasakup din e degma ka Libya wey ka Itiyupiya. 
Piru due me guhuren ne egpuun diye te igsile wey diye te igkahibang ne balabahan ne nakapabantal kandin. Purisu eggipanew sikandin ne egpangebel-ebel se langet eyew te pegdereet wey te peggule pegpangimatey te masulug. 
Ne egpasasindeg sikandin te balungbalung din te pegkahari diye te elat-elat te dahat wey te bubungan ne napes-ekan te timplu. Minsan pad due, egginguma kandin ka kamatayen ne warad iya egpakabulig kandin.”