Husiyas.
1.
Seini ka inlalag te Magbebaye ne Manama diye te me matig-Israil pinaahi ki Husiyas ne anak ni Biiri te timpu ne nekegsinsinundul mighari te Huda ensi Usiyas, si Hutam, si Ahas, wey si Isikiyas wey iyan mighari te Israil si Hirubuwam ne anak ni Huwas. 
An-anayan seini ne pegpakiglalag te Magbebaye ne Manama te me matig-Israil pinaahi ki Husiyas. Ne ingkahiyan din si Husiyas, “Hipanew ka wey pangasawa ka te malitan ne egpamelegye te lawa wey egpakaanak sikandin te me anak niyu ne egsupu kandin. Migpahunsiling sika te peg-inniyug te me matig-Israil keddi wey migsimbe e te me diyus-diyus iling te malitan ne migpamelegye te lawa.” 
Sikan naa ka miggipanew e si prupita Husiyas wey impangasawa rin e si Gumir ne anak ni Diblaim. Ne naberes e si Gumir wey mig-anak te lukes. 
Ne ingkahiyan te Magbebaye ne Manama si prupita Husiyas, “Ngarani nu sikandin ki ‘Hisril’ su te kene egkaluhey eglegparan ku ka me kabuhalan ni Dihu tenged te pegpangimatey rin diye te Hisril wey egtamanen kud ka migharian te Israil. 
Te sika ne aldew, egpanggepuen ku ka me pane te me sundalu te Israil diye te bangalug te Hisril.” 
Ne nataman naberes e man‑e si Gumir wey mig-anak te malitan. Ne ingkahiyan te Magbebaye ne Manama si Husiyas, “Ngarani nu sikandin ki ‘Luruhama’ su kene kud e eggeyinawaan wey ke egpasayluwen naa ka me matig-Israil. 
Piru eggeyinawaan ku mule ka me matig-Huda wey egluwasen ku sikandan, kene ne pinaahi te pane, te kampilan wey ke gira naa, te me kudde wey ke sundalu ne migmangudde, su sikeddi iya se Magbebaye ne Manama ran ka eg-uney-uney ne egluwas kandan.” 
Te nalutas e ni Gumir si Luruhama, naberes e man‑e sikandin wey mig-anak e man‑e te lukes. 
Ne migkahi ka Magbebaye ne Manama, “Ngarani nu sikandin ki Luami su kene kud e ne keet-etawan ka me matig-Israil wey kena ad ne Manama ran.” 
Piru ka keet-etawan te Israil, egpekeiling kasulug te pantad diye te dahat ne kene egkatakes, wey kene egkaseel. Ne diye te inged ne ingkahiyan sikandan te, “Kene ku sikaniyu ne keet-etawan,” egngaranan ded sikandan diye te, “Me anak te manekal ne Manama.” 
Ne egkasabeke e man‑e ka me matig-Huda wey ka me matig-Israil wey eg-alam sikandan te pangulu ran. Ne egmasulug sikandan wey egmatubung ka nasud dan. Te seeye kangkuwa ne timpu, egmabantug e ka ngaran te Hisril.