Husiyas.
9.
He me matig-Israil, kene kew e gale-gale! Kene kew e kahale ne iling te duma ne me nasud su imbelegye niyu ka lawa niyu wey in-engkeran niyu ka Magbebaye ne Manama niyu. Migmanggale-gale kew diye te minsan hendei ne me diekanan niyu tenged te me uma ne insuman-suman niyu ne insuul kaniyu te me diyus-diyus ne insimba niyu. 
Kenad egpekeuyag te keet-etawan ka diekanan te trigu wey kelesanan, wey egkaddeetan e ka me behas te paras dan ne iyan eggimuwen ne iyam ne binu. 
Kenad e sikandan egpekeugpe te Israil ne tane te Magbebaye ne Manama, ke kene, egpanguyanen sikandan diye te Asirya wey egpanguripenen e man‑e iling te me kaap-apuan dan ne impanguripen dengan diye te Ihiptu. Ne diye te Asirya, egmakakeen sikandan te me pegkeen ne in-isip ne malindit. 
Kenad e sikandan eg-itis te binu ne ighalad diye te Magbebaye ne Manama, wey kenad e sikandan eg-uyan te igmanubad ne egpakapahale kandin. Egmekeiling e te egkakeen diye te lantangan ka egkakeen dan, wey egmalindit ka langun ne egkeen due, uya su ka egkakeen dan para man de te gutas dan, wey kene egkaayun ne ighalad diye te timplu te Magbebaye ne Manama. 
Nekey naa ka eggimuwen niyu ke eggingume e ka in-alam ne aldew te sahakeen ne para te Magbebaye ne Manama? 
Ne minsan ke egpanalliya sikandan puun te karereetan, egpekeiling ded iya man‑e te iglebeng sikandan te me matig-Ihiptu diye te Mimpis. Ne ka me karatuan dan ne pelata egkabunbunan e te me sehe, wey egkampetan e te me duhi ka me baley ran. 
Miggingume e ka aldew te peglegpad wey ka aldew te pegsuli. Egpakasalerep iya kayi ka Israil. Migkahi kew te egpamusawen e ka me prupita te Manama. Inlalag niyu sika su egkalangetan kew ma keddi. Dakel e ka sale niyu. 
In-alam te Manama ka prupita eyew egtameng te me matig-Israil, piru egsesahiluten sikandin iling te bayaku minsan hendei sikandin eggendiye. Egdumutan sikandin te me etew minsan diye te timplu te Manama. 
Impatamtamanan dan linditi ka pegkeetew ran iling te inggimu ran diye te Gibiya. Egtantanuran te Manama ka mareet ne me himu ran, wey eglegparan din sikandan tenged te me sale dan. 
Ne migkahi ka Magbebaye ne Manama, “Nakita ku ka Israil iling te paras ne migtubu diye te disirtu. Nakita ku ka me amey niyu ne egpekeiling te hun‑a ne behas te iggira ne neyinuhan. Piru migpangendiye sikandan te bubungan te Piyur, wey inhalad dan diye ki Baal ka pegkeetew ran, wey nekeiling e sikandan kalindit te diyus-diyus ne inggeyinawaan dan. 
Ne egkaawe e ka kabantug te Israil iling te bayaku ne eglayang; warad e bate ne egkeetew diye te Israil, wey warad e malitan ne egkaberes, wey warad e egpangalalin. 
Ne minsan ke egpakaanak pad sikandan, egpangaween ku ka me anak dan langun taman te warad egkasame. Mekeyid‑u-hid‑u naan de iya sikandan ke eg-engkeran kud e!” 
Ne nakita ku ne egpandawiyen ka me anak ni Ipraim, ne si Ipraim ka eg-uney ne egpanguyan te me anak din diye te gilanganan. 
He Magbebaye ne Manama, seini himuwa nu te keet-etawan nu: Kene nud ituhut ne egkaberes pad ka me igbeyi ran; kene nud ituhut ne egmanggatasan pad ka me susu ran. 
Ne migkahi ka Magbebaye ne Manama, “Diye migbunsud te Gilgal ka mareet ne hinimuwan dan, wey diye migbunsud ka pegkalangeti ku kandan. Tenged te mareet ne me himu ran, egdeldelen ku sikandan puun te ugpaanan ku. Kene kud e eggeyinawaan sikandan; me masinupaken langun ka me pangulu ran. 
Egpekeiling ka me matig-Israil te pinamula ne nahangu se dalid purisu kenad e egbebehas. Ne minsan pad egmanganak sikandan, egpangimatayan ku red iya man‑e ka immandakelan dan te geyinawa ne me anak dan.” 
Insamsamilian e sikandan te Manama ku su ware sikandan migpammineg kandin. Purisu egkaleleug e sikandan diye te duma ne me inged.