Husiyas.
13.
Emun ke dengan ke eglalag ka kabuhalan ni Ipraim, egpangelkelen ka me etew, wey egkareyrey sikandan diye te Israil. Piru nakasale sikandan su migsimba ma sikandan ki Baal, wey sika ka egpuunan ne napatey sikandan. 
Ne kuntee migpabulus-bulus ka keet-etawan ne eggimu te sale. Migpangimu sikandan te me larawan; me diyus-diyus ne inggimu puun te pelata wey immangimu re te etew. Ne migkahi sikandan, “Panubad kew kayi.” Ne migmangarek pad man‑e ka me etew te bulawan ne larawan te baka! 
Purisu mahaan de sikandan egkaawe iling te gapun te maselem, wey ke demmug naa, wey ke usang naa ne eglayap te kalamag puun te diekanan, wey ke ebel naa ne miglihawang puun te bintana. 
Ne migkahi ka Magbebaye ne Manama, “Sikeddi ka Magbebaye ne Manama niyu; ka migpalihawang kaniyu puun te Ihiptu. Ware lein ne Magbebaye ne Manama niyu su sikeddi de; ware lein ne talagluwas niyu angin e keddi. 
Sikeddi ka migtanggu kaniyu diye te disirtu; diye te tane ne ware weyig. 
Piru te pegpeugpe ku kaniyu diye te meupiya ne tane, nenabulung kew wey amana nahale-gale. Piru nasi kew neyimu ne me hambuhen, wey nalingawan ad e nikaniyu. 
Tenged due, egpekeiling a te liyun; wey liyupardu ne eggepas kaniyu diye te dalan. 
Egpekeiling a te usu ne in-ahawan te anak; egduleen ku sikaniyu wey egbekeen ku ka me kumeng niyu. Egpekeiling a te liyun ne egdees kaniyu, wey egpekeiling a te mabulut ne mahintalunan ne egpamindas-bindas kaniyu. 
“Egdereetan ku sikaniyu, me matig-Israil, wey ware egpakapangabang kaniyu. 
Ne migkahi kew, ‘Kui key te Hari wey me pangulu!’ Hendeid e ka Hari niyu ne egluwas kaniyu? Hendeid e ka langun ne me pangulu te siyudad niyu ne egpangabang kaniyu? 
Tenged te langet ku imbehayan ku sikaniyu te Hari, piru tenged te langet ku in-awe ku sikandin. 
“Nabagkes ka maddeet ne hinimuwan te me matig-Ipraim; nakalista ka me sale dan wey intines. 
Egkeuyag pad perem sikandan, piru kene ne matagseb sikandan su ware dan seini palimmakuti. Egpekeiling sikandan te bate ne mahaan e eglesut, piru ware sikandan miglihawang puun te aanakan. 
Kene ku egluwasen sikandan puun te geem te Siyul; kene ku igpaalihu sikandan puun te geem te kamatayen. He kamatayen, ipaneem-neem nu kandan ka lalas nu! He Siyul, ipakita nu ka karesen nu te peggule! Kena a egkeyimenawan kandan. 
Ne minsan pad ke egmatubung sikandan du te me suled dan, egpakalamahan ku sikandan te meinit ne kalamag ne egpuun te igsile diye te disirtu. Egkeetiyan ka me sebseb, wey warad weyig te me belun, wey egpangahawen e ka langun ne impanines dan ne me karatuan. 
Eg-antus ka me matig-Samarya ne eglegparan tenged te me sale dan, su insupak dan ma ka Manama ran; egpatey sikandan pinaahi te kampilan; egpanadtaren ka me bate wey egpangebuan ka me mangaberes.”