Huwil.
1.
Seini ka igpepangguhud te Magbebaye ne Manama ki Huwil ne anak ni Pituwil: 
Pammineha niyu seini, sikaniyu se me igbuyag wey sikaniyu se langun ne nangugpe te Huda. Ware de due iling kayi kasumpit ne neyitabu te seini ne timpu wey dengan te duen pad ka me kabuybuyahan ta. 
Ihuhud niyu seini te me anak niyu, eyew igpangguhud dan degma seini te me anak dan, wey igguhud dan e degma seini te seup ne kabuhalan dan. 
Migpasubsubaley migdalapak ka hep‑at ne punduk te me talangas ne nangeen te me pinamula; ka nasame te an-anayan ne punduk, ingkeen e degma te nakasinundul, ka nasame te nakasinundul, indeesan e degma te igkatelu ne punduk, ka nasame te igkatelu ne punduk, intebas e degma te namewuriyan ne punduk te me talangas. 
Himata kew e se me talewubug wey sinehew kew; pandalawit kew se egmangiinum te egpekewubug su nareetan e ka behas te paras ne eggimuwen ne iyam ne binu. 
Su migdalapak ka migguli-huli ne talangas ne egpekeiling te me mannekal ne sundalu ne eglusud te tane ta; maggalang ka me ngipen dan, iling te ngipen wey panayew te liyun. 
Indereetan dan ka me parasan ta wey ka me kayu ta ne iggira. Impangetket dan seini wey impanluwitan, sikan naa ka migmaangkag e ka me sugpang te iggira wey paras. 
Paninehew kew iling te mengebay ne migsaluub te saku ne miglungku tenged te pegpatey te lukes ne egpangasawa iya perem kandin. 
Warad e trigu wey binu ne innalad diye te timplu te Magbebaye ne Manama, sikan naa ka miglungku ka me talagpanubad ne suluhuanen te Magbebaye ne Manama. 
Nareetan ka me kamet, wey mekeyid‑u-hid‑u e ka tane iling te egkabaybayaran ne etew ne miglungku, su nareetan man e ka me trigu wey nahangu e ka me paras, wey naamin e ka mentika te ulibu. 
Kalaggew kew ka me talagbasukan, paninehew kew ka me talagtanggu te parasan, su nareetan e ka langun ne pinamula lagkes ka trigu, wey ka sibada. 
Nenaggangu e ka me paras wey nenallanes e ka me iggira, ka me granada, ka me palmira, ka me mansanas, wey ka langun ne kayu diye te kamet. Ne malehet iya ne warad kahalaan te me etew. 
Saluub kew te saku wey pandalawit kew se egmanubad diye te altar ne eg-unturan te egtutungen. Pangendiye kew te timplu wey lungku kew te intiru ne marusilem, su warad e trigu wey binu ne igpakahalad diye te Manama niyu. 
Palibulunga niyu ka keet-etawan wey puasa kew langun. Ne palibulunga niyu degma diye te timplu te Magbebaye ne Manama ka me pangulu wey ka langun ne mahinged te Huda. Ne pangananey kew te Magbebaye ne Manama niyu. 
Mahaan e egginguma ka aldew te Magbebaye, ka aldew ne igpaneem-neem e te Maresen ne Manama ka karereetan. Makaliyas-liyas amana ka sika ne aldew! 
Mata-mata te re iya te pegkaawe te egkakeen ta. Ne warad kahale diye te timplu te Manama ta. 
Nangepis e ka me beni ne impamula diye te mammara ne tane. Nagguhus e ka me lelapeng, wey nenaddeetan e ka me tinesanan te egkahaani tenged su warad e nabaluy ka me trigu. 
Masingangang ka me baka te kalaggew! Nallaggew ka punduk dan su ware man‑e egpanabtaban dan. Mig-antus degma ka me punduk te me karniru. 
Egpangananey a keykew, Magbebaye ne Manama, su nenasilaban e ka me panabtaban ne nahangu diye te inged ne ware mig-ugpe, wey migkanlabkanlab ka langun ne kayu diye te kamet. 
Egpepangabang keykew minsan ka me mahintalunan ne me mananap, su neetiyan e ka me beuhan wey newugmas e ka me panabtaban diye te katalunan.