Huwil.
2.
Parahinga niyu ka trumpita diye te Hirusalim, eyew egpakapaney-paney ka me etew. Egkelkelen ka langun ne nangugpe kayi te ampew te tane, su mahaan e ka aldew te peglegpad te Magbebaye ne Manama. 
Marusilem sika ne timpu wey delem, timpu te salahapun wey pegpaddusilem. Miglusud ka susuluhi wey maddesen ne me kuntere iling te delem ne migbunbun te me bubungan. Ware pad masumpit ne neyitabu ne iling kayi puun pad dengan wey kenad seini egkeyitabu pad man‑e te minsan ken‑u. 
Egpakarereet sikandan te me pinamula iling te hapuy ne egpakasilab. Egpekeiling pad te Pinamulaan te Idin ka tane te ware pad sikandan miglusud, piru te pegkapenga ran te miglusud, nekeiling e seini te puil. Ware iya egsameen dan. 
Egpekeiling sikandan ne egpitawen te me kudde; egpamallahuy sikandan ne egpekeiling te pegpallahuy te me kudde ne igpakiggira. 
Te pegletu ran diye te me puntul te me bubungan, egmangguhumangkal sikandan iling te me karwahi, wey iling te eggulese ne hapuy ne eggugmas te lahami. Egpekeiling sikandan te susuluhi wey maddesen ne me sundalu ne migluyud eyew egpakiggira. 
Ne egbaluyan te liyas ka me etew, wey egmemakalawag ka me ulaula ran ke egpakakita kandan. 
Eglusud sikandan ne iling te me bahani, wey egmamaneyik sikandan te me alad te siyudad ne iling te me sundalu. Ne eggipanew ka tagse sabeka kandan diye te igbaye dan, wey kene egmanuwey-suwey te egbayaan dan. 
Kene sikandan egmasalsalambahey; kene egtulimpas te egbayaan ka tagse sabeka kandan. Ne ware sikandan napegnel te me panganiban, su nasi de iya sikandan migsuluk. 
Eglusuran dan ka siyudad; egmangahapkap sikandan te me alad; egmamaneyik sikandan te me baley wey iling te me takawen ne egmanuleddu diye te me bintana. 
Eglilinug ka tane te peglusud dan, wey egkawelwel ka langit. Egpaddusilem ka aldew wey ka bulan, wey kenad eglayag ka me bituen. 
Insuhu te Magbebaye ne Manama ka me sundalu rin, wey egpekeiling te luhung ka laheng din. Masulug amana wey maddesen ka me sundalu rin, wey egkaleglehetan iya egkatuman ka igsuhu din. Makaliyas-liyas amana ka aldew te peglegpad te Magbebaye ne Manama! Hentew ka egpakaantus te sika ne aldew? 
Migkahi ka Magbebaye ne Manama, “Piru minsan kuntee, libed kew e keddi te intiru ne pusung niyu duma te pegpuasa, pegsinehew, wey peglungku. 
Inniyug kew te me sale niyu te intiru ne pusung, wey kene de ne pinaahi te peggisi te me kumbale niyu.” Libed kew diye te Magbebaye ne Manama niyu, su hiimenawen sikandin, hiid‑uwen, kene ne mahaan egkabelu, wey dakel ka geyinawa rin ne kene egkabalbalawan, wey andam sikandin ne egpasaylu wey kenad eglegpad. 
Kema ke egkabalbalawan ded ka suman-suman din, wey egpanalanginan kew red nikandin eyew duen ded trigu wey binu ne igpakahalad niyu diye te kandin. 
Parahinga niyu ka trumpita diye te Bubungan ne Siyun; puasa kew langun wey libulung kew. 
Libulunga niyu ka langun ne keet-etawan wey palinisi niyu sikandan se eglibulung. Saamula niyu te eglibulung ka me igbuyag, ka me bate, minsan ka egsusu pad. Ne keilangan degma ne egtambung ka me beuhu pad, wey keilangan ne eglihawang pad sikandan te me baley ran. 
Ne keilangan ne egsinehew diye te elat-elat te altar wey te gumawan te timplu ka me talagpanubad ne iyan ka me suluhuanen te Magbebaye ne Manama. Pakahiya nu sikandan, “Ikeyid‑u nu, Magbebaye ne Manama ka keet-etawan nu. Kene nu balahara ne egkeyilawan sikandan wey eglemetan te duma ne me nasud wey egkahiyan, ‘Hendeid naan e ka Manama niyu?’” 
Ne neipeng ka Magbebaye ne Manama te tane din, wey neyid‑u te keet-etawan din. 
Ne intabak te Magbebaye ne Manama ka peg-ampu dan, “Egpeuyanan ku sikaniyu te trigu, binu, wey mentika, wey egmatubung kew iya. Kene kud e egpalemetan sikaniyu te duma ne me nasud. 
Igpariyu ku kaniyu ka me talaglusud puun te igkahibang ne balabahan. Eg-alawen ku sikandan diye te mammara ne inged ne kene egkeugpaan; ka miggun‑a kandan eg-alawen ku diye te igsile ne dahat, wey diye te iglineb ne dahat ka namewuriyan. Egpamatey sikandan wey egmangareg ka me lawa ran. Egguleen ku sikandan tenged te inggimu ran kaniyu. 
“Kene kad e kaaldek, e tane. Gale-gale ka tenged te dakel ka neyimu te Magbebaye ne Manama keykew. 
Kene kew e kaaldek, me mahintalunan ne mananap su egmemeilem e ka me panabtaban. Egpamehas e ka me kayu, lagkes ka me iggira wey me paras.” 
“Gale-gale kew, me keet-etawan te Hirusalim, kahale kew tenged te inggimu te Magbebaye ne Manama niyu! Imbehayan kew nikandin te ingkeilangan niyu ne uran te pegpeila ne matareng sikandin. Impeuranan kew nikandin te an-anayan ne uran wey te egsinundul pad ne uran iling dengan. 
Eglelatambu ka trigu diye te diekanan, wey egsibu ka binu wey mentika te ulibu diye te egtayaan ne lungag. 
Igpalibed ku ka naawe kaniyu te me leg‑un ne migpasubsubaley ka hep‑at ne punduk te me talangas ne nangulud-kulud ne impeuyan ku due te kaniyu. 
Dakel ka egkakeen niyu wey egkeuralan kew iya. Ne egkataman, egdeyrayen ad nikaniyu se Magbebaye ne Manama niyu, ne miggimu te me kein-inuwan due te kaniyu. Ne kene kew egkaabayan egkeyilawi se keet-etawan ku. 
Ne egkatahaan niyu me Israilita, ne miglemung a kaniyu, wey sikeddi se Magbebaye, sikeddi de iya ka Manama niyu wey warad duma. Ne kene kew e egkaabayan egkeyilawi se keet-etawan ku.” 
“Egkataman, igbehey ku te langun ne etew ka Panisingan ku. Ne ka anak niyu ne me lukes wey me malitan, egpangguhud e te igpanengneng te Manama kandan. Ne ka me buyag e ne me lukes, egmakataheinep, wey ka me kanakan niyu, egmakakite e te igmakita te Manama. 
Te seeye ne timpu, igbehey ku ka Panisingan ku minsan diye te me suluhuanen ne me lukes wey me malitan.” 
“Egpapitew a te kein-inuwan diye te langit wey te tane; due langesa, hapuy, wey dakel ne ebel. 
Ne egpaddusilem ka aldew, wey egmalalab ka bulan iling te langesa, te kene pad egkeyitabu ka makariyab-diyab wey makaliyas-liyas ne aldew te peglegpad te Magbebaye ne Manama. 
Piru egkaluwas ka langun ne egpangananey te Magbebaye ne Manama. Sumale te ingkahi te Manama, ‘Due egpakapallahuy diye te Hirusalim ne ingngaranan te Bubungan ne Siyun. Sikandan seeye se ware migpatey ne in-alam te Magbebaye ne Manama.’”