Hunas.
2.
Ne mig-ampu si Hunas te Magbebaye ne Manama rin te diye din e te getek te isda. 
Miggenendue sikandin, “Te keyirapan ku Magbebaye ne Manama, in-umew ku sikeykew wey intabak a nikeykew. Puun te inged te me minatey, migpangananey a keykew wey indineg a nikeykew. 
Indegpak a nikeykew diye te pused te dahat, wey nakaseneb a te weyig wey natanled a te derakel ne me luwak wey me bunlud ne impeuyan nu. 
Nakakahi a, ‘Nakariyu-diyu ad te tangkaan nu, wey kena ad egpakakita te matulus ne timplu nu.’ 
Naleplep a te dakel ne weyig wey natanled a. Ne nabeleberan ka ulu ku te me hilamunen te dahat. 
Natanled a diye te kinariraleman te weyig, diye te igtubu te me bubungan ne hendue te naprisu a ne warad kaligwangan te ware egtamanan. Piru Magbebaye ne Manama ku, impalepew e red nikeykew ne neuyag pad puun diye te kinariraleman. 
Te naheram ku ne egkabigtawan ad e, migpangananey a keykew Magbebaye ne Manama wey indineg nu ka peg-ampu ku diye te matulus ne timplu nu. 
Ka me etew ne migsimba te me diyus-diyus ne ware karuan, mig-inniyuhan dan e ka hid‑u nu kandan. 
Piru sikeddiey, egpanubad a keykew ne eg-ul-ulahing te pegpasalamat, wey egtumanen ku ka insaad ku. Ka kaluwasan diye egpuun keykew Magbebaye ne Manama.” 
Ne dutu, insuhu e te Magbebaye ne Manama ka isda wey inluwe e si Hunas diye te ilis te dahat.