Mikiyas.
2.
“Mekeyid‑u-hid‑u ka egtamanan te me etew ne egsuman-suman te mareet, wey egpamuhawang te kene ne meupiya minsan diye te me hibatanan dan. Ne emun egkapawe e, eggimuwen dan en iya ka impamuhawang dan su egkeyimu ran ka minsan nekey ne igkeupii ran ne eggimuwen. 
Emun ke due tane ne igkeupii ran, eg-ahawen dan iya seini. Ne emun ke due baley ne igkeupii ran, egkuen dan man‑e seini. Eglupihan dan ka kamuney te baley wey egpangahawen dan ka me kasangkapan din, minsan ka baley wey ka karatuan ne inggaat kandin.” 
Sikan naa ka migkahi ka Magbebaye ne Manama, “Egdereetan ku sikaniyu, wey kene kew iya egpakaalihu. Ne kene kew e egpakapeggasal pad iling dengan su masumpit e ka egkeula-ula niyu wey warad egkeyimu niyu. 
Te sika ne aldew, egbalbalayen kew e te me kuntere niyu, wey egpangeparen dan ka kalasayan wey peglungku niyu, te egkahi, ‘Nenareetan key e natamtamani, su in-awe din e ka katenged ney te tane ney. Ingkuwa rin seini kayi te kanami wey intalad-talad din e diye te migmandakep kanami.’” 
Sikan naa, warad e tane ne baad te me pamilya niyu ke egba-baaren e man‑e seini diye te keet-etawan te Manama. 
Ne migkahi ka me prupita ran, “Kene key e walii te iling due su kene key iya egpeyilawan te Manama. 
Kahiyen niyu buwa ne eglegparan key se me kabuhalan ni Israil te Manama? Mahaan bes egkeupul ka Panisingan te Magbebaye? Egpekeyimu bes sikandin te iling due? Kene bes ne meupiya sikandin diye te me matareng?” 
Ne migtabak ka Magbebaye ne Manama, “Piru indeeg-deeg niyu ka keet-etawan ku iling te me kuntere kew nikandan. Nanguli sikandan puun te giraanan ne warad igkabantali, wey migsuman-suman ne mariyu e sikandan te karereetan. Piru nataman inggepasan niyu sikandan wey in-ahew niyu ka me kumbale dan. 
Ne indeldel niyu ka me malitan te keet-etawan ku puun te inggeyinawaan dan ne me ugpaan dan. Impangahew niyu ka me panalangin ne imbehey ku te me anak dan, eyew kene dan iya seini egkarawat. 
Taggel kew wey awe kew e su kene kew e egmalinawen te seini ne inged. Egdereetan e seini egpatamtamani tenged te me sale niyu ne iyan nakalindit te seini ne inged. 
“Ke eggingume e ka ubaten wey ka talag-akal wey egkahi, ‘Egguhud a daan ne egkabayangan kew te binu wey te inumen ne egpekewubug,’ ne iling iya rue ne prupita ka igkeupii te seini ne keet-etawan. 
Eglibulungen ku red iya sikaniyu langun keureme, kabuhalan ni Hakub. Eglibulungen ku ka nenahaat ne matig-Israil! Eglibulungen ku red man‑e sikaniyu iling te me karniru diye te kulungan, egpekeiling kew te intanggu ne me ayam diye te panabtaban. Egmasulug kew e man‑e, wey egkarineg e man‑e ka kahulub niyu. 
“Egderalan ka Magbebaye wey eggun‑a te egbayaan dan. Egmakapallahuy seeye se impandakep; egmanlungkesu sikandan ka egmanlihawang te gumawan te siyudad ne impamirisuwan kandan. Ne ka Magbebaye ne Hari dan ka eggun‑a kandan wey egpanulu te egbayaan dan.”