Mikiyas.
4.
Te mewuri ne me aldew, ka bubungan ne nasasindehan te timplu, egkeyimu e ne subla ne matikang te langun. Ne egtimpa seini te langun ne kabubunganan wey masulug ka me nasud ne egmangendiye ne egpekeiling te weyig ne egtulayas. 
Ne masulug ka me etew te nalein-lein ne me nasud ka egmangendiye ne egkahi, “Kuwa kew e, egmangendiye ki te bubungan te Magbebaye, diye te timplu te Manama ni Hakub. Igpanulu din kanta ka igkeupii rin ne eggimuwen ta, wey eyew egpekeikul ki te me Balaud din. Su igpangguhud ka Balaud ne egpuun diye te Siyun, wey igparineg ka lalag te Magbebaye ne egpuun te Hirusalim.” 
Eggukuman din ka nalein-lein ne me etew te minsan hendei, minsan seeye se derakel ne me nasud ne diye te mariyu. Egsayaben dan e kangkuwa ka me kampilan dan eyew eggimuwen ne sudsud te daru, wey egsayaben dan e ka me kelaab dan eyew eggimuwen ne me galab. Ne kenad egpeggireey ka me nasud, wey kenad egbebasbas sikandan para te gira. 
Egpinnuu ka etew kangkuwa diye te egdalungan te pinamula rin ne paras wey diye te egdalungan te kayu rin ne iggira, ne warad egginalat kandan. Sika ka saad te Amana ne Maresen ne Magbebaye. 
Minsan ke egpamakey ka langun ne nasud te me manama ran ne kene ne malehet, piru egpamakey ki mule te Magbebaye ne iyan Manama ta te ware egtamanan. 
Ne migkahi ka Magbebaye, “Egginguma ka aldew ne eglibulungen ku seeye se iling te nenapungku ne karniru, wey egsabekeen ku seeye se naddakep diye te mariyu, wey seeye se impanlegparan ku. 
Egbawian ku red ka me lepu, wey eggimuwen ku ne maddesen ne me nasud seeye se naddakep diye te mariyu. Ne ka Magbebaye ka egmandu kandan diye te Bubungan ne Siyun, puun te seeye ne aldew taman te ware egtamanan.” 
Ne sikeykew Bubungan ne Siyun, ka inged ne ugpaanan te Manama isip talagtameng te me karniru, eglibed ded ka katenged nu dengan, ka katenged ne eleg te Hirusalim. 
Ne mania te migpanaman-taman kew migsinehew se me matig-Hirusalim? Ware bes e Hari niyu? Nammatey bes e ka langun ne me talagtambag niyu? Nekeiling kew e te malitan ne egbaletikan ne egpakabalbaleey te masakit. 
Ne, balbaleey kew tenged te masakit, deg-uy kew se me mahinged te Hirusalim, iling te malitan ne egbaletikan. Tenged su igpalihawang kew kuntee te seini ne siyudad, eyew diye kew e egpekeugpe te unayan, wey egpehesen kew eg-uyana diye te Babilunya. Ne diye, egluwasen kew te Magbebaye; egluwasen kew nikandin puun te me kuntere niyu. 
Ne kuntee, masulug ka me etew te nalein-lein ne me nasud ne migsabeka eyew egpakig-ehet kaniyu. Migkahi sikandan, “Egdereetan ta ka kabantug te Hirusalim, wey egtengtengan ta ka mareet ne egtamanan kayi.” 
Piru ware sikandan nakanengneng te suman-suman te Magbebaye; ware sikandan nakasabut te planu rin. Eglibulungen din bes sikandan eyew egdusaan; iling sikandin te etew ne egpanlimud te ginalab ne trigu eyew egdieken. 
Ne migkahi ka Magbebaye, “Sasindeg ka wey diriek ka Hirusalim; egbehayan ku sikeykew te keseg iling te keseg te baka ne putew se sungey wey burunsi se me sulu. Egpangguleen nu ka masulug ne nasud, wey igbehey nu diye te Magbebaye ka me karatuan ne egkaahew nu puun kandan. Ighalad nu ka me karatuan dan kayi te keddi, te Magbebaye te intiru ne inged.”