Mikiyas.
6.
Pammineha niyu ka iglalag te Magbebaye ne Manama: Ne hipanew kew e, ipangguhud niyu ka igkasu niyu keddi diye te kabubunganan, pepamaleheti niyu te me labuntud ke nekey ka iglalag niyu. 
Pammineg kew te sumbung te Magbebaye, sikaniyu se me bubungan, wey pammineg kew se maddesen ne me pabunsuranan te kalibutan. Su due sumbung te Magbebaye meyitenged te keet-etawan din, wey egpakig-apul sikandin te Israil. 
Migkahi sikandin, “Keet-etawan ku, nekey‑a ka neyimu ku kaniyu? Nekey‑a ka neyimu ku ne nakapabehat kaniyu? Tabaka a nikaniyu! 
Inluwas ku sikaniyu puun te inged te Ihiptu, inlekat ku sikaniyu puun te pegkeuripen niyu diye. Insuhu ku si Muwisis, si Aarun, wey si Miryam eyew egpangulu kaniyu. 
Sumsumana niyu keet-etawan ku, ke nekey ka implanu ni Balak ne Hari te Muwab, wey ke nekey ka tabak ni Balaam ne anak ni Biyur, wey ke nekey ka neyitabu puun te Sitim taman te Gilgal. Sumsumana niyu sika eyew egkanengnengan niyu ka inggimu ku ne pegluwas kaniyu.” 
Ne migtabak ka sabeka ne Israilita, “Nekey‑a ka eg-uyanen ku diye te tangkaan te Magbebaye ne Manama ne diye te langit ke egsimba a kandin? Eg-uyan e naa te nati te baka ne sabeka pad ne leg‑un eyew igpanubad ne egtutungen? 
Egkahale naa ka Magbebaye te linibu ne lukesan ne me karniru, wey ke mentika naa ne egtulayas te ware egtamanan? Eleg naa ne igpanubad ku ka panganey ne anak eyew igbayad te me sale ku?” 
Ne migtabak si Mikiyas, “Impanulu kid e te Magbebaye ke nekey ka meupiya. Ne ka igkeupii rin kanta, iyan ka peggimu te matareng, pegpapitew layun te geyinawa diye te duma, wey peg-ikul kandin duma te pegpariralem. 
“Pammineg kew! Impangumew te Magbebaye ka siyudad. Matagseb seeye se egkaaldek te ngaran din: Pammineg kew, sikaniyu se me tribu te Huda ne migliblibulung diye te siyudad! 
Egkalingawan ku naa ka me tinakew ne karatuan te maddeet ne me etew ne impanahu dan diye te me baley ran? Ne egbalaharen ku naa ka peggamit dan te kene ne eleg ne takesanan ne igkeepes ku? 
Egpasayluwen ku naa ka etew ne egpanlimbung ne eggamit te kene ne eleg ne me timbangan wey kene ne eleg ne me palibehat? 
Egpanleig-leig ka me meyaman ne me etew ne due te kaniyu, me ubaten ka me mahinged due, wey egmanlimbung. 
Purisu migbunsuran kud sikaniyu te eglampes; egdereetan ku sikaniyu tenged te me sale niyu. 
Egkeen kew piru kene kew egkabulung, ne ware ded man‑e tahu te getek niyu. Kene kew egpakatitines te minsan nekey ne inlimud niyu su minsan eglilimud kew, igpamehey ku red iya man‑e seini diye te me kuntere niyu. 
Egpamula kew piru kene kew egpakahaani, egkekeles kew te me ulibu piru kene kew egpakahamit te lana kayi, egkekeles kew te me behas te paras piru kene kew egpekeinum te binu. 
Egkeyitabu seini su in-ikul niyu ka me suhu ni Hari Umri, wey ka langun ne mareet ne hinimuwan te kabuhalan ni Ahab, wey migpabulus-bulus kew miggimu te mareet iling kandan. Purisu egdereetan ku sikaniyu wey eglemetan kew e te me mahinged due, wey egngingisiyan kew te keet-etawan te minsan hendei ne me inged.”