Habakuk.
1.
Seini ka guhuren meyitenged te lalag te Magbebaye ne Manama ne hendue te impataheinep ki prupita Habakuk. 
“He Magbebaye, ken‑u ke bes pad eglinga-linga te impangananey ku keykew? Migpabulig ad keykew, piru wara a pangabangi nikeykew puun te karereetan! 
Ne mania te iyan nu re impapitew keddi ka maddeet? Mania te egpipitawen nu re seeye se layun egmangimu te mareet wey kene nu egsaparan? Layun naan de karereetan, kasamuk, pegpeehetey, wey pegpeusihey ka egkakita ku. 
Ne nekeiling te warad e balaud wey naawe e ka eleg ne peggukum. Layun de egkareeg te maddeet se hinimuwan ka me etew ne matareng, sikan naa ka nareetan e ka matareng ne peggukum.” 
Ne migtabak ka Magbebaye, “Pitawa niyu ka me nasud ne nakalingut kaniyu wey amana kew egkeinu-inu wey egkabenga-benga. Su due eggimuwen ku te timpu niyu ne kene kew egpakapalintutuu minsan ke egkapangguhuran kew e. 
Kema pitew kew, egbehayan ku te karesen ka me matig-Babilunya, ka amana ne mabbulut ne me etew wey me bahani. Eg-empeten dan te egleug-leug ka katantanaan, wey egpangahawan dan ka me etew te me ugpaan dan. 
Egkaaldek wey egkaliyasan kandan ka me etew; minsan nekey ka igkeupii ran te eggimu ne insuman-suman dan ne eleg, eggimuwen dan. 
“Ne meiyal pad ka me kudde dan du te me liyupardu, wey mabbulut pad te me singgalung ne egmanleug-leug te marusilem. Ne egwaheswes de ka egmangudde ne egpepallahuy puun te mariyu ne me inged; egpekeiling sikandan te me banug ne egpasalanap ka egdawi te egdawiyen dan. 
“Egpanlusud sikandan langun eyew te pegdereet, wey egkaalatan ka egmanlusuran dan. Inlibulung dan ka indakep dan ne iling kasulug te pantad. 
Minsan ka me Hari, egbalbalayen dan de, wey eggimuwen dan de ne egkangisiyan ka me pangulu. Egngingisiyan dan de mule ka malig‑en, makepal, wey matikang ne alad te me siyudad, su egtetamundu re sikandan te tane ne egbayaan dan wey eg-ahawen dan e ka siyudad. 
Egkataman, egpabulus sikandan eggipanew ne egpekeiling te manekal ne kalamag. Makasesale sikandan wey iyan dan inggimu ne manama ka kanekal ran.” 
He Magbebaye ne ware egtamanan, sikeykew ka Manama ku. Matulus ka wey ware egpatayan. He Magbebaye ne Sumalem ne batu ne talagpangabang ku, in-alam nu ka me matig-Babilunya eyew iyan eglegpad kanami. Intunde nu sikandan eyew egdisiplina kanami. 
Tenged su matulus ka, kene ka egkeupian ne egpitew te seeye se eggimu te sale. Na, mania te imparuyun-duyunan nu ka me etew ne kene ne matinumanen? Ne mania te egpeeneng-eneng ka ke egdereetan dan ka me etew ne matareng pad kandan? 
Ne impeiling nu re ka me etew te ngalap diye te dahat, wey iling te me mananap ne egdul‑ug ne ware egpangulu. 
Ne egpekeiling ka me etew te me ngalap ne egmamunuwiten te me matig-Babilunya wey egbiyaleen de. Ke egkalimud e ka egsahad te biyale dan, egmanguleyi e sikandan te kahale. 
Purisu, egpanubaran dan ka biyale dan wey egtutungan te insinsu. Su nakabehey seini te keupianan wey katubung kandan. 
Ne egpabulus-bulus naa sikandan ka egdereet te me nasud wey kene egkeyid‑u ne egpangimatey te keet-etawan te ware egtamanan?