Habakuk.
2.
Ne migpabulus si Habakuk ka migkahi, “Egpamaneyik a diye te matikang ne pamantawan, wey egtaharan ku ke nekey ka iglalag te Magbebaye ne Manama keddi, eyew egkatabak ku sikandin ke eg-apulen din ka sumbung ku.” 
Ne migtabak ka Magbebaye, “Ay-ayari nu te egsulat diye te malumpayag ne batu ka egkakita nu eyew malemu re ne egbaseen. 
Su nateil e ka timpu ne egkatuman ka immakita, wey egkeyitabu iya ka langun ne impanagne, su kene ne ubat seini. Purisu minsan hendue te mananey pad iya seini egkatuman, tahari nu su egkeyitabu iya seini wey kene egkabalabahan. 
Pitawa nu ka me hambuhen! Kene ne matareng ka hinimuwan dan. Piru ka me matareng, egkeuyag mule tenged te pegpalintutuu ran.” 
Ka malehet, egpakalimbung iya ka karatuan. Ka me etew ne leheren, me hambuhen sikandan wey kene egpekegteil. Egpekeiling sikandan te kamatayen ne kene egkeuralan su egkeupian sikandan ne eg-ameluk te me nasud wey egmandu te langun ne me etew. 
Egginguma ka timpu ne seeye se indakep ne me etew, egkuntere e kandan pinaahi te peglemet wey pegbaley-baley kandan ne egkahi, “Piru mekeyid‑u-hid‑u kew ka miglilimud te me tinakew! Te suman-suman niyu, ken‑u naan pad egkataman ka pegparatu niyu pinaahi te pegpehes niyu te pegpabayad te dakel te seeye se nekeutang kaniyu?” 
Egginguma ka timpu ne seeye se impabayad niyu te dakel ne tubu, egtigkew eglibed kaniyu. Egpangahawen dan e ka me karatuan niyu wey egginalatan kew nikandan. Sahuhune ne egginguma ka me kuntere niyu wey egginalatan kew nikandan. 
Su masulug ne inged ka impangahawan niyu te karatuan, ne sikaniyud e degma ka eg-ahawan te nenasame ne me etew. Egsulian kew tenged su masulug ka impangimatayan niyu, wey te pegleig-leig niyu due te kalibutan, wey te pegdereet niyu te me siyudad wey te me mahinged. 
Ne seeye se naratu se me pamilya pinaahi te mareet ne hinimuwan, mekeyid‑u-hid‑u amana! Migsuman-suman kew ne egpakaalihu kew te karereetan iling te bayaku ne migsesalag diye te matikang, piru kene bes! 
Impeyilawan niyu ka me pamilya niyu, pinaahi te pegpangimatey niyu te masulug ne me etew. Nekeiling de te in-uney niyu bigtawa ka geyinawa niyu. 
Ka me batu ne in-alabat niyu te mateles ne me baley niyu, hendue te egbalbalukan wey egbayung kaniyu, wey eg-apil degma ka me salahunting. 
Mekeyid‑u-hid‑u ka migpasasindeg te lungsud pinaahi te pegpangimatey, wey ka migpasasindeg te siyudad pinaahi te mareet ne hinimuwan! 
Tantanuri niyu seini: Intahahe e te Amana ne Maresen ne Magbebaye ne ka inlasayan te me etew te eggimu, egkeigmuk de. Egkaruruhu ka me etew te me nasud ne egpasasindeg te egdereetan de. 
Su egkeempet ka kalibutan te me etew ne napenu te katuenan meyitenged te katelesan te Magbebaye, iling te dahat ne napenu te weyig. 
Mekeyid‑u-hid‑u kew se migpeinum te me sumbaley niyu te inumen ne palinneu te langet niyu. Iling de te impewubuhan niyu sikandan te binu, eyew egkeyilawan sikandan su nakita niyu ka pegpalawas dan! 
Ne kuntee, sikaniyud e degma ka egkeyilawan wey kenad egkarayan. Sikaniyud e degma ka egpeinumen wey egkalebasan. Egginguma kaniyu ka ubab te langet te Magbebaye. Egparusaan kew, wey ka kabantug niyu egkaridiekan e wey egkeyilawan kew e! 
Egsulian kew te pegdereet niyu te Puwalas te Libanun; sikaniyud e degma ka egdereetan. Impangimatayan niyu ka me mahintalunan, ne kuntee sikaniyud e degma ka egginaalreken. Egsulian kew tenged te pegpangimatey niyu te me etew, wey te pegdereet niyu te me nasud, te me lungsud, wey te langun ne nangugpe dutu. 
Nekey‑a ka karuan te diyus-diyus ne inggimu re te etew? Ka putew ne larawan ne egpakapanulu te ubat! Ne mania te iyan egsalihan te etew ka diyus-diyus ne inggimu rin de, ne kene pad iya man‑e egpakalalag? 
Mekeyid‑u-hid‑u kew se egpeyimata te me kayu, wey egpeenew te me batu. Egpakapanulu naa seini kaniyu? Minsan napulitan seini te bulawan wey pelata, kene iya seini egpakageheyinawa. 
Piru ka Magbebaye, diye mule te matulus ne timplu rin; keilangan ne ka langun ne keet-etawan egpeeneng-eneng diye te tangkaan din.