Sakariyas.
9.
Seini ka lalag te Magbebaye ne Manama: egbayaan din ka inged te Hadrak wey Damasku su eglegparan din. Egmanetengteng te Magbebaye ne Manama ka langun ne keet-etawan, iyan naan pa iya ka langun ne tribu te Israil. 
Eglegparan din degma ka Hamat ne marani te Hadrak wey Damasku, lagkes ka Tiru wey ka Sidun, minsan ke me matagseb ka me mahinged diye. 
Impalingutan pasasindehi te me matig-Tiru ka siyudad dan te matikang wey makepal ne alad ne batu, wey miglilimud sikandan te pelata ne iling kasulug te alinepung, wey te me bulawan ne iling kasulug te tane. 
Piru egpanguen te Magbebaye ne Manama ka langun ne karatuan te me matig-Tiru, wey igpandegpak din diye te dahat, wey egsilaban din ka siyudad dan. 
Ne egkakita sika te me matig-Askalun wey egkaaldek sikandan. Ne egmakabiid-biid e degma te masakit ka me matig-Gasa wey ka me matig-Ikrun su warad e igkasalig dan. Egkapatey ka Hari te Gasa wey warad egmangugpe te Askalun. 
Ne iyan e egmangugpe diye te Asdud ka me etew ne nasinewug se me tribu, wey egtamanen kud e ka pegkaambuhen te me Pilistihanen. 
Ne kene kud e sikandan egpakeenen te ngalap ne duen pad langesa wey te egkakeen ne kene ku igpakeen kandan. Ka me etew ne egkasame, egkeyimu e ne keet-etawan ku wey egpekeiling e sikandan te me kabuhalan ni Huda. Ne ka me mahinged te Ikrun, egkeyimu degma ne keet-etawan ku iling te me Hibusihanen. 
Egbebaley a diye te tane ku eyew egkabantayan ku seini, wey warad egpakabaye-baye diye ne me kuntere ku. Kene kud e egtuhutan ne duen pad egleig-leig te keet-etawan ku su egtamengan kud e kuntee sikandan. 
Ne migkahi ka Magbebaye ne Manama, “Gale-gale kew me matig-Siyun! Panaman-taman kew panguleyi me matig-Hirusalim! Su eggendue te kaniyu ka Hari niyu. Matareng sikandin wey migpanalu. Mapariralemen sikandin wey egginguma ne eg-untud te nati te asnu. 
Eg-aween ku ka me karwahi diye te Ipraim, wey ka me kudde ne eg-unturan te egpakiggira diye te Hirusalim. Egpanggepuen ku ka me piet ne eggamiten te pegpakiggira. Igpanengneng te eglepew ne Hari ka keupianan diye te me nasud. Ka pegmandu din egpekeuma diye te Dahat te Miditiranyu peendiye te Namatey ne Dahat, wey puun te Weyig ne Iyupratis peendiye te katammanan te inged.” 
Migkahi ka Magbebaye ne Manama, “Tenged te kasabutan ku kaniyu ne impamalehetan te langesa, igpalihawang ku ka keet-etawan niyu ne ingkulung diye te belun ne ware weyig. 
Sikaniyu se neneuripen ne migpallateng, libed kew e diye te malig‑en ne inged. Ne kuntee eglalahan ku sikaniyu te egliwanan ku te daruwa ne lupi ka in-ahew puun kaniyu. 
Eggamiten ku ka Huda iling te piet te sundalu wey ka Ipraim iyan ka tunud. Egbanasalan ku sikaniyu se me matig-Hirusalim ne egpakig-ehet te me matig-Grisya, wey egpekeiling kew te kampilan te bahani.” 
Ne egpapitew ka Magbebaye ne Manama te keet-etawan din diye te aw-awangan. Egtandeg ka tunud din ne egpekeiling te kilat. Egparahingen te Magbebaye ka trumpita, wey eglusud sikandin ne egkarumaan te balisusu ne egpuun te igkakawanan ne balabahan. 
Egpangabangan te Amana ne Maresen ne Magbebaye ka keet-etawan din, wey egkatalu ran ka me kuntere dan. Egsahakeen sikandan wey egmanguleyi te kahalaan iling te egkengewubug. Egkengapenu ka me getek dan te eg-inumen dan ne binu iling te yahung ne napenu te langesa ne ig-itis diye te kakiliran te altar. 
Te seeye kangkuwa ne aldew, egluwasen te Magbebaye ne Manama ka keet-etawan din iling te me karniru rin. Ne egmatubung e sikandan diye te tane dan, wey amana sikandan ne mateles ne egtengtengan, iling te mahal ne batu ne egsil‑ew ne impareket te kuruna. 
Tetelesi sikandan ne egpitawen, wey memeupiya ka egkeula-ula ran. Egmanulin ka me kanakan wey ka me mengebay tenged te dakel ne trigu wey behas te paras ne eggimuwen ne binu.