Sakariyas.
11.
Sikaniyu se matig-Libanun, panlukati niyu ka me gumawan te me siyudad niyu, eyew egkengasilaban ka me kayu niyu ne sidar. 
Pandalawit kew se me kayu ne sipris su nenapeled e ka me kayu ne sidar, wey nenaddeetan e seeye se mateles ne me kayu! Pandalawit kew se me kayu ne uk diye te Basan, su impamuwalas e ka penpenengan ne puwalas. 
Pammineg kew te pegpandalawit te me talagtameng te me karniru su nenaddeetan e ka mallambeg ne me panabtaban dan. Pammineg kew te pegginihel te me liyun su nareetan e ka Puwalas te Hurdan! 
Ne migkahi ka Magbebaye ne Manama ku, “Tangguwa nu ka me karniru ne intahahe ne egmanggilangen. 
Ka minsan hentew ne egbeli wey eglape te me karniru, kene eglegparan. Seeye degma se migbelegye, egkahi, ‘Egdayanen ka Magbebaye ne Manama su naratu ad e.’ Ne minsan ka talagtameng, kenad egkeyid‑u.” 
Ne migkahi ka Magbebaye ne Manama, “Kena ad iya egkeyid‑u te me etew ne nangugpe te seini ne inged. Igpeuripen kud sikandan te me sumbaley ran ded wey te Hari dan ne iyan ded egdereet te tane dan. Ne warad iya sabeka kandan ne egluwasen ku.” 
Sikan naa ka neyimu a ne talagtameng te me karniru ne intahahe ne egmanggilangen te me nigusyanti. Ne migkuwa a te daruwa ne tuked, ka sabeka ingngaranan ku te “Keupianan” wey ka dangeb ingngaranan ku te “Pegsabeka,” wey intamengan ku ka me karniru. 
Nataman, neupul ad e te tatelu ne talagtameng te me karniru ne nabbelu keddi. Sikan naa ka impaawe kud e sikandan seled de te sabeka ne bulan. 
Ne migkahi a diye te me karniru, “Kena ad e egtanggu kaniyu. Balahad e ke egpatey seeye se egpatey iya, wey balahad e ke egkalaag seeye se egkalaag iya. Ne balahad e ke egmare-deesey ka nenasame.” 
Ne ingkuwa ku ka tuked ku ne ingngaranan ku te “Keupianan” wey inggepu ku seini palinneu ne kenad e igpabulus te Magbebaye ne Manama ka kasabutan din diye te langun ne keet-etawan. 
Ne warad karuan te kasabutan te seeye ne aldew. Ne seeye se me nigusyanti te me karniru ne migpipitew keddiey, nenakanengneng sikandan ne seeye se inggimu ku, lalag te Magbebaye ne Manama. 
Ne ingkahiyan ku sikandan, “Ke suman-suman niyu ne eleg a ne egbayaran, ne bayari a nikaniyu. Piru ke kene, balahad e.” Purisu imbayaran a nikandan te tatelu ne pulu (30) ne pelata. 
Ne ingkahiyan a te Magbebaye ne Manama, “Itahu nu sika diye te tahuanan te seleppi diye te timplu.” Purisu, ingkuwa ku ka seleppi ne pelata ne tatelu ne pulu (30) ne egkahiyen dan ne dakel kun ubag ne bayad dan keddi, wey intahu kud e seini diye te tahuanan te seleppi diye te timplu te Magbebaye. 
Ne inggepu kud e man‑e ka dangeb ne tuked ku ne ingngaranan ku te “Pegsabeka,” palinneu te warad nasabeka ka Huda wey ka Israil. 
Ne ingkahiyan ad e man‑e te Magbebaye ne Manama, “Abey ke pa man‑e tanggu te me karniru, piru palalung-lalung ka. 
Su egpalepawen ku te inged ka sabeka ne talagtameng te me karniru ne egbalaharen ka eggilangen, kene egpamitew te egkatarin, kene egbawi te egkapiulan, wey kene egtanggu te meupiya se peglelawa. Nasi din mule egpangeena ka mallambeg ne me karniru, wey egpanggusien din pad ka me sulu. 
Mekeyid‑u-hid‑u ka lalung ne talagtameng te me karniru ne mig-engked te intamengan din! Egkatempug ka belad din te kampilan wey egkasundang ka mata rin! Egkipes ka belad din wey egkabutud ka kawanan ne mata rin.”