Malakyas.
1.
Seini ka lalag te Magbebaye ne Manama ne igpahuhud din ki Malakyas te me Israilita. 
Ne migkahi ka Magbebaye ne Manama, “Inggeyinawaan ku sikaniyu. Piru migkahi kew, ‘Immenu nu te egpapitew ka geyinawa nu kanami?’ Ne seini ka tabak ku rue: Si Isaw wey si Hakub, talaari. Si Hakub ka inggeyinawaan ku wey ka me kabuhalan din, 
piru ware ku geyinawei si Isaw wey ka me kabuhalan din. Indereetan ku ka ugpaan din diye te bubungan wey neyimu e ne ugpaan te me mahintalunan ka inged din. 
“Ne emun ke egkahi ka me kabuhalan ni Isaw ne me matig-Idum, ‘Egbalbalawan ta te eggimu ka nahuhus ne me lungsud ta,’ seini ka igkalalag ku rue: Minsan egbalbalawan niyu sika, piru egdereetan ku red man‑e taman te iyan e igngaran kaniyu ka ‘Mareet ne inged’ wey ‘Me etew ne igkalangeti te Magbebaye ne Manama te ware egtamanan.’ 
“Ne egkakita niyu ne egkeyitabu seini kandan wey egpakakahi kew, ‘Maresen iya ka Magbebaye ne Manama minsan pad diye te kenad ne sakup te Israil!’” 
Migkahi ka Amana ne Maresen ne Magbebaye diye te me talagpanubad, “Ka me anak egtahud te amey wey iney ran, wey ka me suluhuanen egtahud degma te me ahalen dan. Ne emun ke amey a nikaniyu, mania te wara a nikaniyu tahura? Ke ahalen a nikaniyu, mania te wara a nikaniyu tahura? Imbaley-baley a nikaniyu, wey mig-inse kew pad man‑e, ‘Immenu ney sikeykew te egbaley-baley?’ 
Imbaley-baley a nikaniyu pinaahi te peghalad niyu te kene ne likes ne egkakeen diye te altar ku. Piru mig-inse kew pad man‑e, ‘Mania te kene ne likes ne egkakeen ka me halad ney?’ Uya su inlemetan niyu ka altar ku. 
Me butud, me lepu, wey egmanderalu ne me ayam ka immanubad niyu keddi. Meupiya naa sika? Kema ibehey niyu sika diye te gubirnadur niyu, pitawen ta ke egkahale sikandin wey ke igbehey rin naa ka egbuyuen niyu,” kahi te Amana ne Maresen ne Magbebaye. 
Na kuntee, sikaniyu se me talagpanubad, geram kew naa pangananey te Manama ke iling due ka eggimuwen niyu, pitawen ta ke egpamminehen kew nikandin. 
Ne migkahi ka Amana ne Maresen ne Magbebaye, “Meupiya pad ke eglekeban niyu ka me gumawan te timplu eyew kene kew e egpakatutung diye te altar te ware me karuan ne me igmanubad. Wara a nahale kaniyu wey kene ku egdawaten ka igpanubad niyu! 
Egbantuhen ka ngaran ku te duma ne me nasud, puun te igsile taman te iglineb. Egtutungan a te me etew te insinsu wey eg-uyanan a nikandan te malinis ne me halad, su mabantug ka ngaran ku te minsan hendei ne me nasud. 
Piru imbaley-baley a mule nikaniyu su inlemetan niyu ka altar ku wey kenad ne likes ka egkakeen diye te altar. 
Migkahi kew, ‘Napelaan key e!’ wey impamiyeran a nikaniyu. Migpanubad kew keddi te me ayam ne tinakew, nallepuan, wey ke egmanderalu naa. Kahiyen niyu buwa ne egdawaten ku seini? 
Egdilusen ku ka ubaten ne etew ne migsaad ne egpanubad keddi te meupiya ne karniru rin, piru iyan din mule impanubad ka nabalbalangan ne ayam. Su sikeddi ka mabantug ne Hari, wey igkaaldek a te minsan hendei ne me nasud,” kahi te Amana ne Maresen ne Magbebaye.