Impakita.
7.
Te pegkapenga kayi, due nakita ku ne hep‑at ne panalihan ne migsasindeg diye te hep‑at ne pikungan te kalibutan. Impahenan dan ka hep‑at ne kalamag te kalibutan eyew kene egkakalamahan ka tane, dahat, wey ka minsan nekey ne kayu. 
Nataman, duen e man‑e nakita ku ne lein ne panalihan ne migparibabew diye te langit puun te igsile ne mig-uyan te kulit te manekal ne Manama. Ne migpanaman-taman sikandin migpanguleyi ka migpangumew te hep‑at ne panalihan ne imbehayan te Manama te geem te pegdereet te tane wey te dahat. 
Migkahi sikandin, “Kene niyu pa dereeti ka tane, ka dahat, wey ka kakayuwan taman te egkakulitan ney e ka buked te me suluhuanen te kanta ne Manama.” 
Ne nakarineg a ne due sabeka ne gatus wey hep‑at ne pulu wey hep‑at ne libu (144,000) ne etew ka nakulitan puun te langun ne me kabuhalan ni Israil. 
Due sapulu wey daruwa ne libu (12,000) puun te me kabuhalan ni Huda, sapulu wey daruwa ne libu (12,000) puun te me kabuhalan ni Rubin, wey sapulu wey daruwa ne libu (12,000) puun te me kabuhalan ni Gad. 
Due sapulu wey daruwa ne libu (12,000) puun te me kabuhalan ni Asir, sapulu wey daruwa ne libu (12,000) puun te me kabuhalan ni Naptali, wey sapulu wey daruwa ne libu (12,000) puun te me kabuhalan ni Manasis. 
Due sapulu wey daruwa ne libu (12,000) puun te me kabuhalan ni Simyun, sapulu wey daruwa ne libu (12,000) puun te me kabuhalan ni Libi, wey sapulu wey daruwa ne libu (12,000) puun te me kabuhalan ni Isakar. 
Due sapulu wey daruwa ne libu (12,000) puun te me kabuhalan ni Sabulun, sapulu wey daruwa ne libu (12,000) puun te me kabuhalan ni Husi, wey sapulu wey daruwa ne libu (12,000) puun te me kabuhalan ni Binhamin. 
Pegkapenga dutu, due nakita ku ne susuluhi ne me etew ne kene egkaseel ne namuun te nalein-lein ne me nasud, me tribu wey me kabuhalan, wey me linalahan. Diye sikandan nanasindeg te tangkaan te trunu wey te Nati ne Karniru ne nangukumbale te maangkag wey nangekemkem te dewun te palmira ne egpekeiling te niyug. 
Ne migpanaman-taman sikandan migmanguleyi ne miggenendue: “Iyan migluwas kanta ka Manama ne migpinnuu te trunu wey ka Nati ne Karniru!” 
Ne miglingut nanasindeg ka langun ne me panalihan diye te trunu, wey diye te me igbuyag wey diye te hep‑at ne hinimuwan ne eggeheyinawa. Ne mig-usengul sikandan diye te tangkaan te trunu wey migsimba te Manama. 
Ne migkahi sikandan, “Malehet iya! Ka Manama likes ne egdayanen, egtahuren, wey egpasalamatan su mabantug sikandin, matagseb, maresen wey manekal te ware egtamanan. Malehet iya.” 
Nataman, mig-insaan a te sabeka te me igbuyag, “Hentew‑a ka sika ne me etew ne nangukumbale te maangkag, wey hendei sikandan namuun?” 
Ne migtabak a, “Ahalen, sikeykew ka nakataha ke hentew sikandan.” Ne migkahiyan a nikandin, “Sika ka me etew ne nakaantus te masumpit ne pegbayad-bayad. Impi‑pian dan ka me kumbale dan te langesa te Nati ne Karniru eyew egmaangkag. 
Sikan naa ka kayi sikandan te tangkaan te trunu te Manama, wey migpamakey kandin te maaldew wey marusilem diye te timplu rin. Ne layun sikandan egdumeyi wey egbantayi te seeye se migpinnuu te trunu. 
Kenad e sikandan egmanggutasan wey egkengammaraan, wey kenad e sikandan egkatutung te aldew wey te minsan nekey pad ne egpakatutung. 
Su ka Nati ne Karniru ne diye te elat-elat te trunu, iyan egtanggu wey egpanulud kandan diye te me sebseb ne egpakabehey te umul. Ne egpunasen te Manama ka tagse luwe dan ne egtihis.”