PSALMORUM.
147.
Alleluja. Lauda, Jerusalem, Dominum; lauda Deum tuum, Sion. 
Quoniam confortavit seras portarum tuarum; benedixit filiis tuis in te. 
Qui posuit fines tuos pacem, et adipe frumenti satiat te. 
Qui emittit eloquium suum terræ: velociter currit sermo ejus. 
Qui dat nivem sicut lanam; nebulam sicut cinerem spargit. 
Mittit crystallum suam sicut buccellas: ante faciem frigoris ejus quis sustinebit? 
Emittet verbum suum, et liquefaciet ea; flabit spiritus ejus, et fluent aquæ. 
Qui annuntiat verbum suum Jacob, justitias et judicia sua Israël. 
Non fecit taliter omni nationi, et judicia sua non manifestavit eis. Alleluja.