17
Ka kene ne eleg ne igpanubad
1 Ne ingkahiyan ni Muwisis ka me kabuhalan ni Israil, “Kene kew panubad diye te Magbebaye ne Manama niyu te baka wey ke karniru naa ne nabalbalangan su igkalindit din sika.
2 “Ne emun ke diye te sabeka te me lungsud ne igbehey kaniyu te Magbebaye ne Manama niyu, due egkanengnengan niyu ne kabuhalan ni Israil, lukes wey ke malitan naa ne miggimu te mareet pinaahi te pegsupak din te balaud,
3 ne iyan ka pegpamakey wey pegsimba rin te lein ne me manama, aldew, bulan, me bituen—me himu ne ingkene te Magbebaye ne Manama—
4 keilangan ne egsusiyen niyu seini eg-ay-ayari. Ne emun ke malehet iya ne neyitabu seini se mareet ne himu diye te Israil,
5 uyana niyu diye te gumawan te lungsud ka etew ne miggimu kayi, wey bebatuwa niyu sikandin taman te egpatey.
6 Piru emun ke sabeka re ka talagpamalehet, kene sikandin egkaayun ne eggimatayan. Piru emun ke egkapamalehetan ne nakasale sikandin pinaahi te daruwa wey ke tatelu naa ne talagpamalehet, egkaayun sikandin ne eggimatayan.
7 Ne ka me talagpamalehet ka hun‑a ne egbatu kandin, wey human pad degma ka me etew. Te sika ne paahi, egkaawe ka mareet ne himu due te kaniyu.
8 “Ne emun ke due kasu ne malised ne eggusayen te talewukum diye te sabeka ne lungsud, iling panunggilingan te kasu te peggimatey wey ke pegpeehetey wey ke pegpanlusud naa, uyana niyu seini ne kasu diye te inged ne eg-alamen te Magbebaye ne Manama niyu.
9 Ne parani kew te me talagpanubad ne me Libita, wey diye te talewukum ne migpamakey te sika te timpu, wey egguhuran kew nikandan ke nekey ka igpekewukum dan.
10 Ne keilangan ne egdawaten niyu ke nekey ka igguhud dan kaniyu diye te inged ne eg-alamen te Magbebaye ne Manama, wey tumana niyu ka langun ne iglalag dan kaniyu.
11 Himuwa niyu te eleg ka langun ne igpanulu dan kaniyu ne igpeikul te balaud. Kene niyu supaka ke nekey ka iglalag dan kaniyu.
12 Ne ka minsan hentew ne kene egtuman te talagpanubad wey ke talewukum naa ne iyan migpamakey te sika ne timpu diye te Magbebaye ne Manama niyu, keilangan ne eggimatayan; keilangan ne eg-aween niyu ka mareet ne himu puun te Israil.
13 Ne emun ke egpakanengneng ka duma ne me kabuhalan ni Israil meyitenged te seini, kenad e sikandan eg-abey egsupak.”
Ka me pegpaney-paney te peg-alam te Hari
14 Ne ingkahiyan e man‑e ni Muwisis ka me kabuhalan ni Israil, “Emun ke egpekeuma kew e diye te tane ne igbehey kaniyu te Magbebaye ne Manama niyu, wey egkaangken niyud seeye ne tane wey egpakasuman-suman kew ne eg-alam te Hari iling te me nasud ne nakalingut kaniyu,
15 keilangan ne ka eg-alamen niyu ne etew eyew eggimuwen ne Hari, sikan de se eg-alamen te Magbebaye ne Manama niyu. Ne keilangan ne duma niyu re sikandin ne kabuhalan ni Israil—kene kew alam te lapu eyew iyan egmandu kaniyu.
16 Ne keilangan ne kene din egmasuluhen ka me kudde din, wey kene din egsuhuen ka me kabuhalan ni Israil ne eglibed diye te Ihiptu eyew egbebeli te me kudde, su ingkahiyan kew ma te Magbebaye ne Manama niyu te kene kew e egpaliberen diye.
17 Ne keilangan ne kene din egmasuluhen ka asawa rin, su kema ke eg-inniyug sikandin te Magbebaye ne Manama. Ne keilangan degma ne kene sikandin eglilimud te masulug ne seleppi wey bulawan.
18 “Ne emun ke egpinnuu e sikandin te trunu rin isip Hari, keilangan ne due kupiya rin te balaud wey me panulu te Manama, ne insulat puun te malehet ne kupiya ne impiyal diye te me talagpanubad ne Libita.
19 Ne keilangan ne eg-uy-uyanen din seini, wey layun din egbasaa te intiru ne umul rin, eyew egkateu sikandin ne egtahud te Magbebaye ne Manama rin, wey eg-ikulen din eg-ay-ayari ka langun ne inlalag te balaud.
20 Ne pinaahi degma te pegbasa rin layun te balaud, kene sikandin egpakasuman-suman ne labew sikandin te me karumaan din ne me kabuhalan ni Israil. Ne kene din man‑e egkasupak ka Magbebaye ne Manama, wey eghari sikandin wey ka me kabuhalan din te Israil te egkaluhey.”