18
Ka egkarawat te me talagpanubad
1 Ne ingkahiyan e man‑e ni Muwisis ka me kabuhalan ni Israil, “Ka me talagpanubad ne me Libita wey ka duma ne sakup te me kabuhalan ni Libi, kene egbaaran te tane isip egkapanunud ne karatuan ne inggaat, iling te duma ne me kabuhalan ni Israil. Iyan dan de egkarawat ka me baad te egtutungen ne igpanubad niyu diye te Magbebaye ne Manama, wey ka duma pad ne ighalad niyu kandin;
2 ware ubag mule egkapanunud dan iling kaniyu te suled dan ne me kabuhalan ni Israil, su sumale te ingkahi kandan te Manama, iyan dan himu ka egpamakey isip me talagpanubad.
3 “Ne puun te igpanubad niyu ne me baka wey me karniru, seini ka me baad ne para te me talagpanubad ne me Libita: ka pamanayen, ka bake, wey ka getek.
4 Ne ibehey niyu degma kandan ka an-anayan ne baad te me trigu niyu, iyam ne binu, lana te ulibu, wey ka bulbul te me karniru niyu,
5 su puun te langun ne tribu te Israil, ka me Libita ka in-alam te Magbebaye ne Manama niyu eyew egpamakey kandin isip me talagpanubad te ware egtamanan.
6 “Ne ka minsan hentew ne Libita ne mig-ugpe diye te minsan hendei ne me lungsud te Israil, egkaayun degma ne eggendiye te inged ne eg-alamen te Manama,
7 wey egkaayun sikandin ne egpamakey te Manama rin, iling te duma rin ne me Libita ne migpamakey degma diye te tangkaan te Manama.
8 Ne egpakarawat degma sikandin te baad puun te me halad, minsan due egkarawat din ne seleppi puun te halin te karatuan te me pamilya rin.”
Ka me pegpaney-paney te me himu ne igkeepes te Manama
9 Ne ingkahiyan e man‑e ni Muwisis ka me kabuhalan ni Israil, “Emun ke egpekeuma kew e diye te tane ne igbehey kaniyu te Magbebaye ne Manama niyu, kene kew ikul te maddeet ne hinimuwan te me mahinged diye;
10 kene kew tutung te me anak niyu diye te altar, lukes ma wey se malitan isip igpanubad. Kene kew degma panagne, kene kew panlambus, kene kew panlumay, kene kew pahehane,
11 wey kene kew parani te me mammulingan
12 su egkalindit ka Magbebaye ne Manama te langun ne eggimu te sika ne me himu. Sika ka egpuunan ne egpandeldelen te Magbebaye ne Manama niyu ka keet-etawan te sika ne nasud ke egpalinggumaan kew e.
13 Keilangan ne ware igkarew‑ey kaniyu te Magbebaye ne Manama niyu.”
Ka saad te Manama ne egpeuyan te prupita
14 Ne ingkahiyan e man‑e ni Muwisis ka me kabuhalan ni Israil, “Ka keet-etawan ne egpandeldelen niyu, migparani te me manenagne wey te egmahehane. Piru kene egkeupian ka Manama niyu ne eggimuwen niyu sika.
15 Egpeuyan ka Manama niyu te prupita ne egpuun ded kaniyu, iling keddi, wey keilangan ne egtahuren niyu sikandin.
16 Sika ka imbuyu niyu diye te Manama niyu te timpu ne nanlibulung kew diye te Bubungan ne Sinay. Migkahi kew te, ‘Kene key e ubag parineha te laheng nu Manama ney wey ke egpapitawen key naa nikeykew te egkanlabkanlab ne hapuy nu su kema ke egkammatey key.’
17 Purisu ingkahiyan a te Manama, ‘Eleg iya ka ingkahi ran.
18 Egpeuyan a te prupita iling keykew wey karumaan dan ded, eyew egpepangguhuren ku sikandin te langun ne iglalag ku kandan.
19 Ne egparusaan ku ka minsan hentew ne kene egpammineg te me lalag ku ne igguhud te prupita pinaahi te ngaran ku.
20 Piru ke egpangguhud ka prupita pinaahi te ngaran ku te ware ku ipahuhud kandin, wey ke egpangguhud naa sikandin pinaahi te ngaran te lein ne manama, ka sika ne prupita keilangan ne eggimatayan.’
21 “Ne emun ke eg-inse kew, ‘Egmenuwen ney naa te egnengneng ne ka inlalag te prupita, kene egpuun te Manama?’
22 Egkanengnengan niyu seini, su ke nekey ka igguhud te prupita pinaahi te ngaran te Manama, piru kene egkatuman, ka sika ne lalag kene naa egpuun te Manama; migpangguhud sikandin te kandin de ne katenged, purisu kene kew kaaldek kandin.”